പതിനെട്ടാം പിറന്നാള്‍ ദിനത്തില്‍ പിതാവിനെ ഓര്‍ത്ത് വൈകാരികമായ കുറിപ്പ് പങ്കുവെച്ച് അന്തരിച്ച നടനും മിമിക്രി താരവുമായ കലാഭവന്‍ നവാസിന്റെ മകന്‍ റിഹാന്‍ നവാസ്. പിതാവിന്റെ ആശംസകള്‍ കേള്‍ക്കാത്ത ആദ്യത്തെ പിറന്നാളാണ് ഇത്തവണത്തേതെന്ന് റിഹാന്‍ സാമൂഹികമാധ്യമത്തില്‍ കുറിച്ചു. 50 വയസ്സുപൂര്‍ത്തിയാക്കും മുമ്പാണ് പിതാവ് മരിച്ചത്. തങ്ങളെ സുരക്ഷിതരാക്കിയാണ് പിതാവ് പോയതെന്നും റിഹാന്‍ കുറിച്ചു.

കുറിപ്പിനൊപ്പം നവാസിന്റെ വസ്ത്രങ്ങള്‍ ധരിച്ച ഫോട്ടോകളും റിഹാന്‍ പങ്കുവെച്ചിട്ടുണ്ട്. നവാസ് മരിക്കുംമുമ്പുള്ള പിറന്നാള്‍ ആഘോഷത്തിന്റെ വീഡിയോയും കുറിപ്പിനൊപ്പമുണ്ട്.

സിനിമാ ചിത്രീകരണം പൂര്‍ത്തിയാക്കി വീട്ടിലേക്ക് മടങ്ങാനിരിക്കെ നവാസിനെ ഹോട്ടല്‍ മുറിയില്‍ അബോധാവസ്ഥയില്‍ കണ്ടെത്തുകയായിരുന്നു. ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഹൃദയാഘാതത്തെത്തുടര്‍ന്നായിരുന്നു മരണം.

റിഹാന്‍ നവാസിന്റെ കുറിപ്പിന്റെ പൂര്‍ണ്ണരൂപം:

ഒക്ടോബര്‍ എട്ട്, ഇന്നെന്റെ പിറന്നാളാണ്.

ഏതൊരു കുട്ടിയുടേയും ആഗ്രഹമായിരിക്കും 18 വയസ്സാകുക എന്നത്. പക്ഷേ എനിക്ക് 18 വയസ്സായത് കാണാന്‍ വാപ്പിച്ചി ഇല്ല.

വാപ്പിച്ചിയുടെ ആശംസകള്‍ കേള്‍ക്കാന്‍ പറ്റാത്ത ആദ്യത്തെ പിറന്നാള്‍.

വാപ്പിച്ചിയുടെ വസ്ത്രങ്ങള്‍ അണിയാന്‍ എനിക്കും റിദുവിനും വലിയ ഇഷ്ടമാണ്.

എപ്പോള്‍ ചോദിച്ചാലും വാപ്പിച്ചി സന്തോഷത്തോടെ എടുത്തു തരും, എന്നിട്ട് ഏതാ വേണ്ടതെന്നു ചോദിക്കും.

ഞങ്ങള്‍ അത് ധരിക്കുമ്പോള്‍ നിറഞ്ഞ ചിരിയോടെ നോക്കി നില്‍ക്കും.

ഇപ്പോള്‍ ഞാനും റിദുവും ആ വസ്ത്രങ്ങള്‍ അണിഞ്ഞാണ് പുറത്തിറങ്ങുന്നത്. എന്നാല്‍ ഇപ്പോള്‍ അത് അണിയുമ്പോള്‍ വാപ്പിച്ചി ഞങ്ങളെ കെട്ടിപ്പിടിച്ച ഫീല്‍ ആണ്, വല്ലാത്ത ധൈര്യവും തോന്നും.

വാപ്പിച്ചി 50 വയസ്സു പൂര്‍ത്തിയാക്കിയില്ല (രേഖകളില്‍ ജനനതീയതി തെറ്റാണ്, ഓഗസ്റ്റ് 10, 1974-ലാണ് യഥാര്‍ഥ ജനനതീയതി).

പക്ഷേ ഞങ്ങള്‍ക്ക് 24 വയസ്സാണ് വാപ്പയെ കണ്ടാല്‍ തോന്നാറുള്ളു അത്ര യംഗ് ആയ മനസ്സാണ് വാപ്പിച്ചിയുടേത്. ഞങ്ങളെ സേഫ് ആക്കിയിട്ടാണ് വാപ്പിച്ചി പോയത്.