ന്യൂഡല്ഹി: പരിസ്ഥിതി പ്രവര്ത്തകനായ സോനം വാങ്ചുക്കിനെ ദേശീയ സുരക്ഷാ നിയമപ്രകാരം (എന്.എസ്.എ.) തടങ്കലില് വെച്ചതിനെ ചോദ്യം ചെയ്തു ഭാര്യ ഗീതാഞ്ജലി ജെ. ആംഗ്മോ സമര്പ്പിച്ച ഹേബിയസ് കോര്പ്പസ് ഹര്ജിയില് സുപ്രീം കോടതി കേന്ദ്ര സര്ക്കാരിന്റെയും ലഡാക്ക് കേന്ദ്ര ഭരണ പ്രദേശത്തിന്റെയും പ്രതികരണം തേടി. വാങ്ചുക്കിനെ ഉടന് മോചിപ്പിക്കണമെന്നും ഹര്ജിയില് ആവശ്യപ്പെടുന്നുണ്ട്.
ജസ്റ്റിസുമാരായ അരവിന്ദ് കുമാര്, എന്. വി. അഞ്ജരിയ എന്നിവരടങ്ങിയ ബെഞ്ചാണ് കേസ് പരിഗണിച്ചത്.
ലഡാക്കിന് സംസ്ഥാന പദവി ആവശ്യപ്പെട്ടുള്ള പ്രതിഷേധങ്ങള്ക്ക് പ്രേരിപ്പിച്ചു എന്നാരോപിച്ചാണ് സെപ്റ്റംബര് 26-ന് വാങ്ചുക്കിനെ എന്.എസ്.എ. പ്രകാരം തടങ്കലിലാക്കിയത്. സെപ്റ്റംബര് 24-ന് ലേയില് നടന്ന പ്രതിഷേധം അക്രമാസക്തമാവുകയും പോലീസ് വെടിവെപ്പില് നാല് പേര് മരിക്കുകയും അമ്പതോളം പേര്ക്ക് പരിക്കേല്ക്കുകയും ചെയ്തിരുന്നു.
അതേസമയം, അറസ്റ്റിന്റെ കാരണങ്ങള് ഉടന് ഭാര്യക്ക് നല്കണമെന്ന ആവശ്യത്തില് കോടതി ഇപ്പോള് ഉത്തരവ് പുറപ്പെടുവിക്കാന് വിസമ്മതിച്ചു. കേസ് കൂടുതല് വാദം കേള്ക്കുന്നതിനായി ഒക്ടോബര് 14-ലേക്ക് മാറ്റി വെച്ചു.
Related News
