വാഷിംഗ്ടണ്‍: യുഎസ് ഫെഡറല്‍ ഗവണ്‍മെന്റ് ഷട്ട്ഡൗണ്‍ രണ്ടാം ദിവസത്തിലേക്ക് കടന്നതോടെ രാജ്യമെമ്പാടുമുള്ള ഭരണപരമായ പ്രവര്‍ത്തനങ്ങളിലും സമ്പദ്വ്യവസ്ഥയിലും ഗുരുതരമായ പ്രത്യാഘാതങ്ങള്‍ ഉണ്ടാവാന്‍ തുടങ്ങി. ഒബാമകെയറിനായുള്ള (Obamacare) അധിക സബ്സിഡികളെച്ചൊല്ലി റിപ്പബ്ലിക്കന്‍മാരും ഡെമോക്രാറ്റുകളും തമ്മിലുള്ള തര്‍ക്കമാണ് പ്രതിസന്ധിക്ക് കാരണം. കാലഹരണപ്പെട്ട ആരോഗ്യ സംരക്ഷണ സബ്സിഡികള്‍ നീട്ടണമെന്ന ഡെമോക്രാറ്റുകളുടെ ആവശ്യം അംഗീകരിക്കാന്‍ പ്രസിഡന്റ് ട്രംപും റിപ്പബ്ലിക്കന്‍ ഭരണകൂടവും തയ്യാറായിട്ടില്ല. വിശാലമായ ആരോഗ്യ സംരക്ഷണ ആവശ്യങ്ങളെ ഫണ്ടിംഗ് ബില്ലുമായി കൂട്ടിക്കെട്ടാന്‍ അനുവദിക്കില്ലെന്ന നിലപാടിലാണ് പ്രസിഡന്റ് ട്രംപ്.

7,50,000-ത്തോളം ഫെഡറല്‍ ജീവനക്കാര്‍ ശമ്പളമില്ലാത്ത അവധിയായ ഫര്‍ലോവിലാണ്. സൈനികര്‍, എയര്‍ ട്രാഫിക് കണ്‍ട്രോളര്‍മാര്‍, അതിര്‍ത്തി സുരക്ഷാ ഉദ്യോഗസ്ഥര്‍ ഉള്‍പ്പെടെയുള്ള ലക്ഷക്കണക്കിന് 'അത്യാവശ്യ' ജീവനക്കാര്‍ ശമ്പളമില്ലാതെ ജോലി ചെയ്യാന്‍ നിര്‍ബന്ധിതരാവുകയാണ്. ഷട്ട്ഡൗണ്‍ നീണ്ടുപോയാല്‍ ഫെഡറല്‍ ജീവനക്കാര്‍ക്ക് സ്ഥിരമായി പിരിച്ചുവിടല്‍ (മാസ് ലേഓഫ്) ഉണ്ടാകുമെന്ന വൈറ്റ് ഹൗസിന്റെ ഭീഷണി ജീവനക്കാര്‍ക്കിടയില്‍ ആശങ്ക വര്‍ദ്ധിപ്പിച്ചിട്ടു
ണ്ട്. ഷട്ട്ഡൗണ്‍ പ്രതിദിനം 400 മില്യണ്‍ ഡോളറിന്റെ (ഏകദേശം 3,300 കോടി രൂപ) നഷ്ടമാണ് ഉണ്ടാക്കുന്നത്.

സെപ്റ്റംബറിലെ നിര്‍ണായകമായ തൊഴില്‍ റിപ്പോര്‍ട്ട് ഉള്‍പ്പെടെയുള്ള സാമ്പത്തിക വിവരങ്ങളുടെ റിലീസ് നിര്‍ത്തിവച്ചത് സാമ്പത്തിക വിപണികളില്‍ അനിശ്ചിതത്വം സൃഷ്ടിച്ചു. വാഷിംഗ്ടണ്‍ ഡി.സി.യിലെ മ്യൂസിയങ്ങള്‍, സ്മാരകങ്ങള്‍, ദേശീയോദ്യാനങ്ങളിലെ സന്ദര്‍ശക കേന്ദ്രങ്ങള്‍ എന്നിവ അടച്ചുപൂട്ടിയതോടെ വിനോദസഞ്ചാര മേഖലയെയും ബാധിച്ചു. തുറന്നിരിക്കുന്ന ദേശീയ പാര്‍ക്കുകളില്‍ ജീവനക്കാരുടെ കുറവ് സുരക്ഷാ പ്രശ്‌നങ്ങളുണ്ടാക്കുന്നുണ്ട്.

13,000-ത്തിലധികം എയര്‍ ട്രാഫിക് കണ്‍ട്രോളര്‍മാര്‍ ശമ്പളമില്ലാതെ ജോലി ചെയ്യുന്നത് ജീവനക്കാരുടെ മനോവീര്യം തകര്‍ക്കുകയും, സുരക്ഷയിലും വിമാനങ്ങളുടെ സമയക്രമത്തിലും പ്രശ്‌നങ്ങളുണ്ടാക്കുമെന്നും യൂണിയനുകള്‍ മുന്നറിയിപ്പ് നല്‍കി. വിദ്യാഭ്യാസ വകുപ്പ്, നാഷണല്‍ ഇന്‍സ്റ്റിറ്റ്യൂട്ട് ഓഫ് ഹെല്‍ത്ത് (NIH) തുടങ്ങിയ ഏജന്‍സികളിലെ മിക്ക പ്രവര്‍ത്തനങ്ങളും നിലച്ചു. പുതിയ ഗ്രാന്റുകള്‍ നല്‍കുന്നതും ഗവേഷണ പഠനത്തിനുള്ള രോഗികളെ പ്രവേശിപ്പിക്കുന്നതും നിര്‍ത്തിവച്ചു.

ഡെമോക്രാറ്റുകള്‍ക്ക് വോട്ട് ചെയ്ത സംസ്ഥാനങ്ങള്‍ക്കുള്ള കോടിക്കണക്കിന് ഡോളറിന്റെ അടിസ്ഥാന സൗകര്യ വികസന ഫണ്ടുകള്‍ റദ്ദാക്കുകയോ താല്‍ക്കാലികമായി നിര്‍ത്തുകയോ ചെയ്തുകൊണ്ട് ട്രംപ് ഭരണകൂടം രാഷ്ട്രീയ സമ്മര്‍ദ്ദം ചെലുത്തുകയാണ്. പ്രതിസന്ധി തുടര്‍ന്നാല്‍ യുഎസ് സമ്പദ്വ്യവസ്ഥയുടെ വളര്‍ച്ചാ നിരക്ക് കുറയാന്‍ സാധ്യതയുണ്ടെന്ന് സാമ്പത്തിക വിദഗ്ധര്‍ മുന്നറിയിപ്പ് നല്‍കി. പ്രതിസന്ധി പരിഹരിക്കാന്‍ കോണ്‍ഗ്രസില്‍ അടിയന്തരമായി ഫണ്ടിംഗ് കരാര്‍ പാസാക്കാനുള്ള നീക്കങ്ങള്‍ നടക്കുന്നുണ്ടെങ്കിലും എങ്ങും എത്തിയിട്ടില്ല.