ന്യൂദല്ഹി- ഇന്ത്യ തദ്ദേശീയമായി വികസിപ്പിച്ചെടുത്ത ആണവ ശേഷിയുള്ള അഗ്നി പ്രൈം മിസൈല്, റെയില് അധിഷ്ഠിത മൊബൈല് ലോഞ്ചര് സംവിധാനത്തില് നിന്ന് വിജയകരമായി പരീക്ഷിച്ചു. ആദ്യമായാണ് ഇത്തരമൊരു പരീക്ഷണം നടത്തുന്നത്. 2000 കിലോമീറ്റര് വരെ ദൂരപരിധിയുള്ള ഈ അടുത്ത തലമുറ മിസൈല്, നൂതന സവിശേഷതകളോടെയാണ് രൂപകല്പ്പന ചെയ്തിരിക്കുന്നത്.
റെയില് അധിഷ്ഠിത മൊബൈല് ലോഞ്ചര് സിസ്റ്റം ഉപയോഗിച്ചുള്ള ഈ വിക്ഷേപണം, വിശാലമായ ഇന്ത്യന് റെയില് ശൃംഖല ഉപയോഗിച്ച് അഗ്നി പ്രൈം മിസൈല് അതിവേഗം കൊണ്ടുപോകാന് സഹായിക്കുന്നു. ഇത്തരത്തിലുള്ള ആദ്യ വിക്ഷേപണം ഒരു റെയില് നെറ്റ് വര്ക്കിലൂടെ യാതൊരു മുന്കരുതലുകളുമില്ലാതെ സഞ്ചരിക്കാന് കഴിവുള്ള, പ്രത്യേകം രൂപകല്പ്പന ചെയ്ത ഒരു ലോഞ്ചറില് നിന്നാണ് നടത്തിയത്. ഇത് കുറഞ്ഞ സമയത്തിനുള്ളില്, എളുപ്പത്തില് മിസൈല് വിക്ഷേപിക്കാന് സൈന്യത്തെ സഹായിക്കുമെന്ന് പ്രതിരോധ മന്ത്രി രാജ്നാഥ് സിംഗ് എക്സ് പ്ലാറ്റ്ഫോമില് പങ്കുവെച്ച വീഡിയോയില് പറഞ്ഞു.
വിജയകരമായ ഈ പരീക്ഷണത്തിന് ഡിഫന്സ് റിസര്ച്ച് ആന്ഡ് ഡെവലപ്മെന്റ് ഓര്ഗനൈസേഷനെയും (DRDO), സ്ട്രാറ്റജിക് ഫോഴ്സസ് കമാന്ഡിനെയും (SFC), സായുധ സേനകളെയും രാജ്നാഥ് സിംഗ് അഭിനന്ദിച്ചു. സഞ്ചരിക്കുന്ന റെയില് ശൃംഖലയില് നിന്ന് മിസൈല് വിക്ഷേപിക്കാന് ശേഷിയുള്ള ചുരുക്കം ചില രാജ്യങ്ങളുടെ പട്ടികയില് ഈ പരീക്ഷണം ഇന്ത്യയെ ഉള്പ്പെടുത്തിയെന്നും അദ്ദേഹം കൂട്ടിച്ചേര്ത്തു.
Related News
