ന്യൂദല്ഹി- സ്ത്രീകളെ ലൈംഗികമായി പീഡിപ്പിച്ചുവെന്ന് ആരോപിക്കപ്പെടുന്ന സ്വാമി ചൈതന്യാനന്ദ സരസ്വതി എന്ന സ്വാമി പാര്ഥസാരഥി, വനിതാ ഹോസ്റ്റലില് രഹസ്യ ക്യാമറകള് സ്ഥാപിച്ചിരുന്നതായി റിപ്പോര്ട്ട്. ഒരു സ്വകാര്യ മാനേജ്മെന്റ് ഇന്സ്റ്റിറ്റ്യൂട്ടിലെ 17 വിദ്യാര്ഥിനികള് ഇയാള്ക്കെതിരെ പരാതി നല്കിയിട്ടുണ്ട്.
പോലീസിന്റെ പ്രഥമ വിവര റിപ്പോര്ട്ട് അനുസരിച്ച്, രാത്രി വൈകി തന്റെ മുറി സന്ദര്ശിക്കാനും വിദേശ യാത്രകളില് തന്നെ അനുഗമിക്കാനും പാര്ഥസാരഥി വിദ്യാര്ഥിനികളെ നിര്ബന്ധിച്ചിരുന്നു. 62 വയസ്സുള്ള ഇയാള് ഒരു വിദ്യാര്ഥിനിയെ നിര്ബന്ധിച്ച് പേര് മാറ്റിച്ചതായും എഫ്.ഐ.ആറില് പറയുന്നു.
വസന്ത് കുഞ്ചിലെ ശ്രീ ശാരദാ ഇന്സ്റ്റിറ്റ്യൂട്ട് ഓഫ് ഇന്ത്യന് മാനേജ്മെന്റിന്റെ ഡയറക്ടറാണ് പാര്ഥസാരഥി. കര്ണാടകയിലെ ശൃംഗേരിയിലുള്ള ശ്രീ ശ്രീ ജഗദ്ഗുരു ശങ്കരാചാര്യ മഹാസംസ്ഥാനം ദക്ഷിണാംനായ ശ്രീ ശാരദാ പീഠമാണ് ഈ ഇന്സ്റ്റിറ്റ്യൂട്ട് നടത്തുന്നത്. പീഠം പ്രതിയുമായുള്ള എല്ലാ ബന്ധങ്ങളും വിച്ഛേദിച്ചതായി അറിയിച്ചു.
നിലവില് ഒളിവിലുള്ള പാര്ഥസാരഥിയെ അറസ്റ്റ് ചെയ്യാനുള്ള ശ്രമങ്ങള് പോലീസ് ഊര്ജിതമാക്കിയിട്ടുണ്ട്. പോലീസിന് മുന്നില് ഹാജരായ 32 വിദ്യാര്ഥിനികളില് 17 പേരും ഇയാള്ക്കെതിരെ ലൈംഗിക അതിക്രമം, മോശം സംഭാഷണങ്ങള്, അശ്ലീല സന്ദേശങ്ങള് അയയ്ക്കല്, ശാരീരിക ബന്ധത്തിന് നിര്ബന്ധിക്കല് എന്നിവ ആരോപിച്ച് പരാതി നല്കിയിട്ടുണ്ട്.
സാമ്പത്തികമായി പിന്നോക്കം നില്ക്കുന്ന വിഭാഗത്തില്പ്പെട്ട ഈ വിദ്യാര്ഥിനികള് സ്കോളര്ഷിപ്പോടെയാണ് മാനേജ്മെന്റ് ഡിപ്ലോമ കോഴ്സുകള് ചെയ്യുന്നത്. പാര്ഥസാരഥി തങ്ങളെ ലൈംഗികമായും മാനസികമായും പീഡിപ്പിച്ചതായി വിദ്യാര്ഥിനികള് പരാതിയില് പറയുന്നു. വാട്സ്ആപ്പ്, എസ്.എം.എസ് എന്നിവ വഴി ഇയാള് അശ്ലീല സന്ദേശങ്ങള് അയച്ചതായും അവര് ആരോപിച്ചു.
വിദ്യാര്ഥിനികളുടെ പരാതികളെല്ലാം അവഗണിക്കപ്പെടുകയും, അസോസിയേറ്റ് ഡീന് ശ്വേത ഉള്പ്പെടെയുള്ള അധ്യാപകരും ജീവനക്കാരും പ്രതിയുടെ ആവശ്യങ്ങള് അംഗീകരിക്കാന് നിര്ബന്ധിക്കുകയും ചെയ്തതായും അവര് വെളിപ്പെടുത്തി. ഇയാളുടെ ആവശ്യങ്ങള്ക്കെതിരെ പ്രതിഷേധിച്ചവരെ സസ്പെന്ഷന്, പുറത്താക്കല്, ഡിഗ്രികള് തടഞ്ഞുവയ്ക്കല് തുടങ്ങിയ ഭീഷണികള് മുഴക്കി വരുതിയിലാക്കി. കൂടാതെ, വിദ്യാര്ഥികളുടെ മാതാപിതാക്കളെ വിഷയത്തില് ഇടപെടാന് അനുവദിച്ചില്ലെന്നും അവര് പറഞ്ഞു.
അന്വേഷണത്തിനിടെ, ഇന്സ്റ്റിറ്റ്യൂട്ടിന്റെ ബേസ്മെന്റില്നിന്ന് പാര്ത്ഥസാരഥി ഉപയോഗിച്ചിരുന്ന ഒരു വോള്വോ കാര് പോലീസ് കണ്ടെടുത്തു. വ്യാജ നയതന്ത്ര നമ്പര് പ്ലേറ്റ് ഉപയോഗിച്ച ഈ കാര് പോലീസ് പിടിച്ചെടുത്തു. സി.സി.ടി.വി ദൃശ്യങ്ങള് പരിശോധിച്ച പോലീസ്, പ്രതിയെ കണ്ടെത്താന് ആഗ്രക്ക് സമീപം വരെ അന്വേഷണം വ്യാപിപ്പിച്ചു. പ്രതിയെ പിടികൂടാനായി പ്രത്യേക സംഘങ്ങള് രൂപീകരിച്ചിട്ടുണ്ട്.
പ്രതിയുടെ പ്രവര്ത്തനങ്ങള് നിയമവിരുദ്ധവും അനുചിതവുമാണെന്ന് ദക്ഷിണാംനായ ശ്രീ ശാരദാ പീഠം പ്രസ്താവനയില് അറിയിച്ചു. അതിനാല് ഇയാളുമായുള്ള എല്ലാ ബന്ധങ്ങളും അവസാനിപ്പിച്ചതായും അവര് വ്യക്തമാക്കി.
Related News
