ന്യൂഡല്‍ഹി: പ്രധാനമന്ത്രി നരേന്ദ്ര മോദി ഇന്ന് വൈകുന്നേരം അഞ്ച് മണിക്ക് രാജ്യത്തെ അഭിസംബോധന ചെയ്യുമെന്ന് ഉന്നത സര്‍ക്കാര്‍ വൃത്തങ്ങള്‍ അറിയിച്ചു. പ്രസംഗത്തിന്റെ വിഷയം എന്താണെന്ന് ഔദ്യോഗികമായി സ്ഥിരീകരിച്ചിട്ടില്ലെങ്കിലും, വിവിധ വിഷയങ്ങളില്‍ ഊഹാപോഹങ്ങള്‍ സജീവമാണ്.

പുതിയ ജി.എസ്.ടി 2.0 പരിഷ്‌കരണങ്ങള്‍ നിലവില്‍ വരുന്നതിന് തൊട്ടുമുമ്പാണ് പ്രധാനമന്ത്രിയുടെ പ്രസംഗം എന്നതിനാല്‍ ഇതായിരിക്കാം പ്രധാനപ്പെട്ട വിഷയമെന്ന് കരുതുന്നു. കൂടാതെ, യു.എസ്. സര്‍ക്കാര്‍ എച്ച്1ബി വിസക്കാര്‍ക്കെതിരെ സ്വീകരിക്കുന്ന കര്‍ശന നടപടികളും ഇന്ത്യ-യു.എസ്. താരിഫ് തര്‍ക്കങ്ങളും പ്രധാനമന്ത്രി പരാമര്‍ശിക്കാന്‍ സാധ്യതയുണ്ട്. യു.എസിലുള്ള നിരവധി ഇന്ത്യന്‍ ടെക്കികളെ ബാധിക്കുന്ന വിഷയമാണിത്.

2014-ല്‍ പ്രധാനമന്ത്രിയായി ചുമതലയേറ്റ ശേഷം, പ്രധാനപ്പെട്ട സര്‍ക്കാര്‍ തീരുമാനങ്ങള്‍ പ്രഖ്യാപിക്കാന്‍ മോദി രാഷ്ട്രത്തെ അഭിസംബോധന ചെയ്യുക പതിവാണ്. 2016 നവംബര്‍ 8-ന് അദ്ദേഹം 500, 1000 രൂപ നോട്ടുകള്‍ അസാധുവാക്കിക്കൊണ്ട് പ്രസംഗിച്ചു. 2019 മാര്‍ച്ച് 12-ന് പുല്‍വാമ ഭീകരാക്രമണത്തിന് മറുപടിയായി നടത്തിയ ബാലാകോട്ട് വ്യോമാക്രമണങ്ങള്‍ പ്രഖ്യാപിച്ചു.

കോവിഡ്-19 മഹാമാരിയെത്തുടര്‍ന്ന് 2020 മാര്‍ച്ച് 24-ന് മൂന്നാഴ്ചത്തെ രാജ്യവ്യാപക ലോക്ഡൗണ്‍ പ്രഖ്യാപിച്ചതും രാജ്യത്തെ അഭിസംബോധന ചെയ്തുകൊണ്ടാണ്. 2020 ഏപ്രില്‍ 14-ന് ലോക്ഡൗണ്‍ നീട്ടുന്നതായും പിന്നീട് മെയില്‍ ലോക്ഡൗണ്‍ ഇളവുകള്‍ നല്‍കുന്നതായും അദ്ദേഹം അറിയിച്ചു.

അവസാനമായി, 2025 മെയ് 12-ന് പഹല്‍ഗാമില്‍ നടന്ന ഭീകരാക്രമണത്തിന് ശേഷം ഇന്ത്യ നടത്തിയ തിരിച്ചടിയായ 'ഓപ്പറേഷന്‍ സിന്ദൂര്‍' സംബന്ധിച്ച് പ്രധാനമന്ത്രി രാജ്യത്തെ അഭിസംബോധന ചെയ്തിരുന്നു.

ഇന്നത്തെ പ്രസംഗം ജിഎസ്ടി 2.0 പരിഷ്‌കരണങ്ങള്‍ക്ക് തൊട്ടുമുമ്പായതിനാല്‍, ഇതാണ് പ്രധാന വിഷയം എന്ന നിഗമനത്തിലാണ് സാമ്പത്തിക വിദഗ്ധര്‍. നവരാത്രിയുടെ ആദ്യ ദിവസം മുതല്‍ പ്രാബല്യത്തില്‍ വരുന്ന പുതിയ ജി.എസ്.ടി നിരക്കുകള്‍, വിവിധ സാധനങ്ങളുടെ വില കുറയ്ക്കാന്‍ സഹായിക്കുമെന്നാണ് പ്രതീക്ഷിക്കുന്നത്. ഇത് ഉത്സവ സീസണിലെ ഉപഭോഗം വര്‍ദ്ധിപ്പിക്കാന്‍ സാധ്യതയുണ്ട്.

നെയ്യ്, കെച്ചപ്പ്, കാപ്പി, പനീര്‍, ഇലക്ട്രോണിക് ഉപകരണങ്ങള്‍, മരുന്നുകള്‍ തുടങ്ങിയവയ്ക്ക് പുതിയ ജി.എസ്.ടി നിരക്കുകള്‍ വഴി വില കുറയും. കാര്‍ വാങ്ങാന്‍ പദ്ധതിയിടുന്നവര്‍ക്കാണ് ഏറ്റവും വലിയ നേട്ടം. കാറുകള്‍ക്കുള്ള നികുതി നിരക്കുകള്‍ വെട്ടിക്കുറച്ചതിനാല്‍, പല കാര്‍ നിര്‍മ്മാതാക്കളും ഇതിനകം തന്നെ വില കുറച്ചതായി പ്രഖ്യാപിച്ചിട്ടുണ്ട്.

നിലവില്‍ 5, 12, 18, 28 ശതമാനം എന്നിങ്ങനെ നാല് സ്ലാബുകളിലാണ് ജി.എസ്.ടി ഈടാക്കുന്നത്. എന്നാല്‍ പുതിയ പരിഷ്‌കരണങ്ങള്‍ വഴി 5, 18 ശതമാനം എന്നിങ്ങനെ രണ്ട് സ്ലാബുകളായാണ് മിക്ക ഉല്‍പ്പന്നങ്ങള്‍ക്കും നികുതി ഈടാക്കുക. ആഡംബര വസ്തുക്കള്‍ക്ക് 40 ശതമാനം ജി.എസ്.ടി ഈടാക്കും.