റിയാദ് : 95 ാമത് ദേശീയ ദിനാഘോഷ വേളയില്‍ സൗദി അറേബ്യയെ അഭിമാനക്കൊടുമുടിയിലെത്തിക്കാനൊരുങ്ങി ലുലു ഹൈപ്പര്‍മാര്‍ക്കറ്റ്. രാജ്യത്തിന്റെ അഭിമാനവും പാരമ്പര്യവും ഐക്യവും അടയാളപ്പെടുത്തുന്ന ഏറ്റവും വലിയ ഷാറ്റേര്‍ഡ് ഗ്ലാസ് ആര്‍ട്ട് തീര്‍ക്കും. ഗിന്നസ് റെക്കോര്‍ഡ് നേട്ടം കൂടി ലക്ഷ്യമിട്ടുള്ള ഈ കലാസൃഷ്ടിയുടെ നിര്‍മ്മാണം സെപ്റ്റംബര്‍ 20ന് വൈകിട്ട് 4.30ന് അല്‍ ഖോബര്‍ ന്യൂ കോര്‍ണീഷിലാണ് നടക്കുക. മൂന്ന് മീറ്റര്‍ നീളവും വീതിയും വലുപ്പമുള്ള ഗ്ലാസ് ആര്‍ട്ടില്‍ ജനറല്‍ എന്റര്‍ടെയ്ന്‍മെന്റ് അതോറിറ്റി പുറത്തിറക്കിയ ഔദ്യോഗിക ചിഹ്നം ആലേഖനം ചെയ്തിരിക്കും. ഖോബര്‍ മുനിസിപ്പാലിറ്റിയുടെയും യൂണിലിവറിന്റെയും (കംഫര്‍ട്ട് ) സഹകരണത്തോടെ തയ്യാറാക്കുന്ന ഗ്ലാസ് ആര്‍ട്ട് പിന്നീട് മുനിസിപ്പാലിറ്റിക്ക് സമ്മാനിക്കും. ഇത് കിഴക്കന്‍ പ്രവിശ്യയെ അടയാളപ്പെടുത്തുന്ന അഭിമാന ചിഹ്നമായി മാറും.

നൂതനവും വേറിട്ടതുമായ ഷാറ്റേര്‍ഡ് ഗ്ലാസ് പെയിന്റിംഗ് സൃഷ്ടികളിലൂടെ പ്രശസ്തനായ സൗദി ദൃശ്യ കലാകാരന്‍ അസീല്‍ അല്‍-മുഗ്‌ളൗത്താണ് ഈ അതുല്യ കലാസൃഷ്ടിക്കും രൂപം നല്‍കുന്നത്. എഞ്ചിനീയറിംഗ് വൈദഗ്ധ്യവും കലയും സംയോജിപ്പിച്ച് ഗ്ലാസ് ആര്‍ട്ടിലൂടെ മനോഹര കലാസൃഷ്ടികളൊരുക്കുന്നതില്‍ സൗദിയിലും അറബ് ലോകത്തുടനീളവും അംഗീകരിക്കപ്പെട്ട കലാകാരന്‍ കൂടിയാണ് അസീല്‍.

ലുലു ഹൈപ്പര്‍മാര്‍ക്കറ്റുകളില്‍ എക്‌സ്‌ക്ലൂസീവ് ഓഫറുകള്‍ ; സൗദി ഉത്പന്നങ്ങള്‍ക്കായി പ്രത്യേക പവലിയനും മിഡ്‌നൈറ്റ് ഷോപ്പിങ്ങും

ദേശീയ ദിനാഘോഷങ്ങളുടെ ഭാഗമായി സെപ്റ്റംബര്‍ 23 വരെ ലുലു സ്റ്റോറുകളില്‍ എക്‌സ്‌ക്ലൂസീവ് ഓഫറുകളും, കലാ-സാംസ്‌കാരിക പരിപാടികളും സംഘടിപ്പിച്ചിട്ടുണ്ട്. ഉപഭോക്താക്കള്‍ക്ക് വന്‍ വിലക്കിഴിവുകള്‍ ആസ്വദിക്കുന്നതിനൊപ്പം സൗദി ഉത്പന്നങ്ങളുടെ പ്രത്യേക പവലിയനിലും ഷോപ്പിംഗ് നടത്താം. സെപ്റ്റംബര്‍ 22 ന് നടക്കുന്ന പ്രത്യേക മിഡ്‌നൈറ്റ് ഷോപ്പിംങ്ങിലും വന്‍ ഓഫറുകളാണ് എല്ലാ കാറ്റഗറികളിലും ഒരുക്കിയിരിക്കുന്നത്. വൈകുന്നേരം ആറ് മണിക്കാരംഭിച്ച് പുലര്‍ച്ചെ ഒരു മണിവരെ മിഡ്‌നൈറ്റ് ഷോപ്പിംങ് നീളും.

സൗദി റീട്ടെയ്ല്‍ മേഖലയില്‍ മാറ്റത്തിന് തുടക്കമിട്ട് ഗൂഗിള്‍ പേ സൗകര്യവും

ഇനി മുതല്‍ ഉപഭോക്താക്കള്‍ക്ക് സൗകര്യപ്രദവും അനായാസവുമായി ഷോപ്പിംങ് പൂര്‍ത്തിയാക്കാന്‍ ലുലു ഹൈപ്പര്‍മാര്‍ക്കറ്റുകളില്‍ ഗൂഗിള്‍ പേ സേവനവും സജ്ജമാണ്. സൗദി റീട്ടെയ്ല്‍ മേഖലയില്‍ ആദ്യമായാണ് ലുലുവിലൂടെ ഗൂഗിള്‍ പേ സേവനം ഉപഭോക്താക്കള്‍ക്കരികിലേക്കെത്തുന്നത്.