ചമോലി, ഉത്തരാഖണ്ഡ്- കഴിഞ്ഞ ദിവസങ്ങളില്‍ തുടര്‍ച്ചയായി പെയ്ത കനത്ത മഴ ഉത്തരാഖണ്ഡിലെ ചമോലി ജില്ലയില്‍ വീണ്ടും ദുരന്തം വിതച്ചു. ഇന്ന് പുലര്‍ച്ചെയുണ്ടായ കനത്ത മണ്ണിടിച്ചിലില്‍ നന്ദനഗറിലെ കുന്‍ട്രി വാര്‍ഡില്‍ നിരവധി വീടുകള്‍ തകരുകയും അഞ്ച് പേരെ കാണാതാവുകയും ചെയ്തു.

ജില്ലാ ദുരന്തനിവാരണ കേന്ദ്രത്തില്‍നിന്നുള്ള വിവരങ്ങള്‍ അനുസരിച്ച്, ആറ് വീടുകളാണ് മണ്ണിനടിയിലായത്. മണ്ണിടിച്ചിലുണ്ടാകുമ്പോള്‍ വീടിനുള്ളിലുണ്ടായിരുന്ന ഏഴ് പേരില്‍ രണ്ട് പേര്‍ രക്ഷപ്പെട്ടു. ബാക്കി അഞ്ച് പേരെ കണ്ടെത്താനായിട്ടില്ല.

സംഭവമറിഞ്ഞയുടന്‍ സംസ്ഥാന ദുരന്ത പ്രതികരണ സേനയും (SDRF) ദേശീയ ദുരന്ത പ്രതികരണ സേനയും (NDRF) രക്ഷാപ്രവര്‍ത്തനത്തിനായി സ്ഥലത്തെത്തി. കാണാതായവര്‍ക്കായുള്ള തിരച്ചില്‍ ദൗത്യം പുരോഗമിക്കുകയാണ്. ഇതിനായി ഒരു മെഡിക്കല്‍ സംഘത്തെയും മൂന്ന് ആംബുലന്‍സുകളും ദുരന്ത സ്ഥലത്തേക്ക് അയച്ചിട്ടുണ്ട്. എന്നാല്‍ കനത്ത മഴയും ദുര്‍ബലമായ മണ്ണും രക്ഷാപ്രവര്‍ത്തനത്തിന് തടസ്സമുണ്ടാക്കുന്നുണ്ട്.

മണ്ണിടിച്ചിലിന് പുറമെ, സമീപത്തുള്ള ധുര്‍മ ഗ്രാമത്തില്‍ മോഖ നദി കരകവിഞ്ഞൊഴുകി ആറ് വീടുകള്‍ ഒലിച്ചുപോയി. കഴിഞ്ഞ പ്രകൃതിദുരന്തങ്ങളില്‍നിന്ന് ജീവിതം തിരികെ പിടിച്ചുകൊണ്ടിരുന്ന കുടുംബങ്ങള്‍ക്ക് ഈ വെള്ളപ്പൊക്കം വീണ്ടും ദുരിതമായി. ഇവര്‍ക്ക് വീണ്ടും വീടൊഴിയേണ്ടി വന്നു.

കഴിഞ്ഞ ഓഗസ്റ്റില്‍ ഉണ്ടായ ദുരന്തത്തിന്റെ അലയൊലികള്‍ അവസാനിക്കും മുന്‍പാണ് ചമോലിയില്‍ വീണ്ടും പ്രകൃതിദുരന്തം ഉണ്ടായിരിക്കുന്നത്. കഴിഞ്ഞ മാസം, ഭൂമി ഇടിഞ്ഞുതാഴ്ന്നതിനെ തുടര്‍ന്ന് നന്ദനഗറിലെ നിരവധി വീടുകള്‍ക്ക് വിള്ളലുകള്‍ വീണിരുന്നു. അന്ന് താമസക്കാരെ സുരക്ഷിത സ്ഥാനങ്ങളിലേക്ക് മാറ്റിപ്പാര്‍പ്പിക്കേണ്ടി വന്നു.