ജിദ്ദ: സൗദി അറേബ്യയിലെ ഏറ്റവും വലിയ ഡ്യൂട്ടി ഫ്രീ ഷോപ്പ് ജിദ്ദ കിങ് അബ്ദുല്‍ അസീസ് അന്താരാഷ്ട്ര വിമാനത്താവളത്തില്‍ പ്രവര്‍ത്തനം ആരംഭിച്ചു. 8,000 ചതുരശ്ര മീറ്റര്‍ വിസ്തൃതിയുള്ള വിപുലീകരണ പദ്ധതിയുടെ ഉദ്ഘാടനം ഇന്ന് നടന്നു.

ജിദ്ദ എയര്‍പോര്‍ട്ട്‌സും GAH ഡ്യൂട്ടി ഫ്രീയും ചേര്‍ന്നാണ് ഈ സംരംഭം ആരംഭിച്ചത്. ടെര്‍മിനല്‍ 1-നും നോര്‍ത്ത് ടെര്‍മിനലിനും ഇടയിലായി സ്ഥിതി ചെയ്യുന്ന ഈ ഡ്യൂട്ടി ഫ്രീ ഷോപ്പില്‍ 35 സ്റ്റോറുകളിലായി 500-ല്‍ അധികം അന്താരാഷ്ട്ര, പ്രാദേശിക ബ്രാന്‍ഡുകള്‍ ലഭ്യമാണ്.

വിമാനത്താവളങ്ങളുടെ വരുമാനത്തിന്റെ പ്രധാന സ്രോതസ്സുകളിലൊന്നാണ് ഡ്യൂട്ടി ഫ്രീ ഷോപ്പുകള്‍. ഇത് സൗദിയിലെ വിമാനത്താവളങ്ങളുടെ അടിസ്ഥാന സൗകര്യ വികസനത്തിന് സഹായിക്കുന്നു. കൂടാതെ, രാജ്യത്തെ ടൂറിസം, ഹോസ്പിറ്റാലിറ്റി മേഖലകള്‍ക്ക് ഉണര്‍വ് നല്‍കുകയും സൗദി വിഷന്‍ 2030 ലക്ഷ്യങ്ങള്‍ കൈവരിക്കാന്‍ സഹായിക്കുകയും ചെയ്യുന്നു.

2022 സെപ്റ്റംബറില്‍ സൗദി സര്‍ക്കാര്‍ രാജ്യത്തെ അതിര്‍ത്തികളിലും ഡ്യൂട്ടി ഫ്രീ ഷോപ്പുകള്‍ സ്ഥാപിക്കാന്‍ അനുമതി നല്‍കിയിരുന്നു, സൗദിയിലെ പൊതു നിക്ഷേപ നിധി കഴിഞ്ഞ മാര്‍ച്ചില്‍ അല്‍ വാഹ ഡ്യൂട്ടി ഫ്രീ എന്നൊരു യാത്രാ റീട്ടെയില്‍ കമ്പനി ആരംഭിച്ചു. സൗദിയുടെ ഉടമസ്ഥതയിലുള്ള ആദ്യത്തെ ഡ്യൂട്ടി ഫ്രീ ഓപ്പറേറ്റര്‍ എന്ന നിലയില്‍, യാത്രാ ചെലവുകളുടെ ഒരു വലിയ ഭാഗം സൗദി സമ്പദ്വ്യവസ്ഥയിലേക്ക് തിരികെ എത്തിക്കാന്‍ ഈ കമ്പനി ലക്ഷ്യമിടുന്നു.

ഇവര്‍ സൗദി വിമാനത്താവളങ്ങളിലും കര അതിര്‍ത്തികളിലും തുറമുഖങ്ങളിലും വിമാനയാത്രക്കിടയിലുമുള്ള റീട്ടെയില്‍ സാധ്യതകള്‍ ഉപയോഗപ്പെടുത്തും. അന്താരാഷ്ട്ര കമ്പനികള്‍ സൗദിയിലെ ഡ്യൂട്ടി ഫ്രീ ഷോപ്പുകള്‍ വികസിപ്പിക്കുന്നതില്‍ വലിയ താല്പര്യം കാണിക്കുന്നുണ്ടെന്ന് അല്‍-ഇഖ്തിസാദിയ ദിനപത്രം റിപ്പോര്‍ട്ട് ചെയ്തിരുന്നു.