ജിസാന്‍: സൗദി അറേബ്യയില്‍ ജിസാനു സമീപം ഫുര്‍സാന്‍ ദ്വീപില്‍ ഉണ്ടായ വാഹനാപകടത്തില്‍ മൂന്ന് ഇന്ത്യക്കാര്‍ മരിച്ചു. രണ്ടു പേര്‍ക്ക് ഗുരുതരമായി പരിക്കേറ്റു. തമിഴ്നാട് കന്യാകുമാരി സ്വദേശികളായ ജോര്‍ജ് പനിയടിമൈ (43), അന്തോണി ദശം (49), കടലൂര്‍ സ്വദേശി രമേശന്‍ എരുശപ്പന്‍ (40) എന്നിവരാണ് മരിച്ചത്. മരിച്ച ജോര്‍ജും അന്തോണിയും സഹോദരങ്ങളാണ്. അപകടത്തില്‍ പരിക്കേറ്റ കടലൂര്‍ സ്വദേശി സത്യപ്രവീണ്‍ ശക്തിവേലിനെ അബൂഅരീഷ് കിങ് ഫഹദ് ആശുപത്രിയിലും, നാഗപട്ടണം സ്വദേശി മണി വെള്ളിദിശനെ ഫുര്‍സാന്‍ ജനറല്‍ ആശുപത്രിയിലും പ്രവേശിപ്പിച്ചു.
ഫുര്‍സാന്‍ ദ്വീപിലെ മത്സ്യത്തൊഴിലാളികളായ ഇവര്‍ സഞ്ചരിച്ചിരുന്ന പിക്അപ്പ് വാഹനത്തിന്റെ ടയര്‍ പഞ്ചറായതിനെത്തുടര്‍ന്ന് നിയന്ത്രണംവിട്ട് റോഡിന്റെ ഒരു വശത്തേക്ക് മറിഞ്ഞാണ് അപകടം. ഇന്ന് രാവിലെ എട്ട് മണിയോടെയാണ് അപകടമുണ്ടായത്. അല്‍സഗീര്‍ ദ്വീപില്‍ നിന്ന് മത്സ്യബന്ധനം കഴിഞ്ഞ് താമസസ്ഥലത്തേക്ക് മടങ്ങുന്നതിനിടെയാണ് സംഭവം.
ആറ് മാസം മുന്‍പാണ് ജോര്‍ജും അന്തോണിയും പുതിയ വിസയില്‍ നാട്ടില്‍ നിന്ന് വന്നത്. രമേശന്‍ എത്തിയിട്ട് രണ്ട് മാസമേ ആയിട്ടുള്ളൂ. മരിച്ചവരുടെ മൃതദേഹങ്ങള്‍ ഫുര്‍സാന്‍ ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. ആവശ്യമായ സഹായങ്ങള്‍ നല്‍കുന്നതിനായി ജലയുടെ രക്ഷാധികാരിയും ഫുര്‍സാന്‍ ദ്വീപിലെ ബോട്ട് സര്‍വീസ് ജീവനക്കാരനുമായ എം.കെ. ഓമനക്കുട്ടനും മറ്റ് സാമൂഹിക പ്രവര്‍ത്തകരും രംഗത്തുണ്ട്.
Related News
