ഡാലസ്: ഭാര്യയുടേയും മകന്റെയും കണ്‍മുന്‍പില്‍ വച്ച് മോട്ടല്‍ മാനേജറായ ഇന്ത്യക്കാരന്റെ തലയറുത്തത് സഹപ്രവര്‍ത്തകന്‍. ചന്ദ്ര നാഗമല്ലയ്യ എന്ന അന്‍പതുകാരനെയാണ് മോട്ടലിലെ മറ്റൊരു ജീവനക്കാരനായ യോര്‍ദാനിസ് കോബോസ് മാര്‍ട്ടിനെസ് (37) കൊലപ്പെടുത്തിയത്. ഡാലസ് ഡൗണ്‍ ടൗണ്‍ സ്യൂട്ട്‌സ് മോട്ടലിലാണ് സംഭവം.

മാര്‍ട്ടിനെസും ജീവനക്കാരികളിലൊരാളും മുറി വൃത്തിയാക്കുന്നതിനിടെ മോട്ടല്‍ മാനേജര്‍ ആയ ചന്ദ്ര നാഗമല്ലയ്യ എത്തുകയും ജീവനക്കാരിയോട് വാഷിങ് മെഷീന്‍ കേടാണെന്നും അത് ഉപയോഗിക്കരുതെന്ന് മാര്‍ട്ടിനെസിനോട് പറയാനും നിര്‍ദേശിച്ചു. എന്നാല്‍ ജീവനക്കാരിയോട് അല്ല തന്നോട് നേരിട്ടാണ് പറയേണ്ടതെന്നുപറഞ്ഞ് മാര്‍ട്ടിനെസ് ചന്ദ്ര നാഗമല്ലയ്യയെ കത്തിയെടുത്ത് കടന്നാക്രമിക്കുകയായിരുന്നു.

മാര്‍ട്ടിനെസ് കുത്താന്‍ വന്നതോടെ ചന്ദ്ര നാഗമല്ലയ്യ പുറത്തേക്ക് ഓടിരക്ഷപ്പെടാന്‍ ശ്രമിച്ചെങ്കിലും പിന്തുടര്‍ന്ന് പല തവണ കുത്തുകയായിരുന്നു. പ്രതിയെ പിന്തിരിപ്പിക്കാന്‍ ചന്ദ്ര നാഗമല്ലയ്യയുടെ ഭാര്യയും മകനും ശ്രമിച്ചെങ്കിലും ഇരുവരെയും തള്ളിയിട്ട ശേഷം നാഗമല്ലയ്യയുടെ തല അറുക്കുകയായിരുന്നു. മോട്ടലിലെ പാര്‍ക്കിങ് ഏരിയയിലെ മാലിന്യകൂമ്പാരത്തിലേക്ക് അറുത്തെടുത്ത തല വലിച്ചെറിഞ്ഞ ശേഷം രക്ഷപ്പെടാന്‍ ശ്രമിച്ച പ്രതിയെ ഡാലസ് ഫയര്‍ ആന്‍ഡ് റസ്‌ക്യൂ ടീം പിടികൂടി പൊലീസിനെ ഏല്‍പ്പിക്കുകയായിരുന്നു. സംഭവത്തില്‍ ഹൂസ്റ്റണിലെ ഇന്ത്യന്‍ കോണ്‍സുലേറ്റ് ജനറല്‍ അനുശോചനം അറിയിച്ചു. കുടുംബത്തിന് ആവശ്യമായ എല്ലാ പിന്തുണയും നല്‍കുമെന്നും അധികൃതര്‍ വ്യക്തമാക്കി.

ഫോട്ടോ: ചന്ദ്ര നാഗമല്ലയ്യ