ലണ്ടന്‍: ബ്രിട്ടീഷ് രാഷ്ട്രീയത്തില്‍ പുതിയ ചരിത്രം കുറിച്ച് പാകിസ്ഥാന്‍ വംശജയായ ഷബാന മഹ്‌മൂദ് യു.കെ.യുടെ പുതിയ ഹോം സെക്രട്ടറിയായി നിയമിതയായി. പ്രധാനമന്ത്രി കീര്‍ സ്റ്റാര്‍മര്‍ മന്ത്രിസഭയില്‍ നടത്തിയ അഴിച്ചുപണിയിലാണ് ഈ സുപ്രധാന തീരുമാനം. ബ്രിട്ടന്റെ ചരിത്രത്തില്‍ ആദ്യമായാണ് ഒരു മുസ്ലിം വനിത ഈ ഉന്നത പദവിയില്‍ എത്തുന്നത്.

ഉപപ്രധാനമന്ത്രിയായിരുന്ന ആഞ്ചല റെയ്‌നര്‍ രാജി വെച്ചതിനെ തുടര്‍ന്നാണ് മന്ത്രിസഭയില്‍ അഴിച്ചുപണി വേണ്ടിവന്നത്. പുതിയ വീട് വാങ്ങിയപ്പോള്‍ നികുതി അടയ്ക്കുന്നതില്‍ വീഴ്ച വരുത്തിയെന്ന് സമ്മതിച്ചതിനെ തുടര്‍ന്നാണ് റെയ്‌നര്‍ രാജി പ്രഖ്യാപിച്ചത്. തുടര്‍ന്നാണ് കീര്‍ സ്റ്റാര്‍മര്‍ മന്ത്രിസഭയില്‍ മാറ്റങ്ങള്‍ വരുത്തിയത്. നിലവില്‍ വിദേശകാര്യ സെക്രട്ടറിയായിരുന്ന ഡേവിഡ് ലാമിയെ ഉപപ്രധാനമന്ത്രിയായി ഉയര്‍ത്തി. ഹോം സെക്രട്ടറിയായിരുന്ന യെവെറ്റ് കൂപ്പറിന് വിദേശകാര്യ വകുപ്പിന്റെ ചുമതല നല്‍കുകയും, ഷബാന മഹ്‌മൂദിന് ഹോം സെക്രട്ടറി പദവി നല്‍കുകയും ചെയ്തു.

നേരത്തെ നീതിന്യായ ഉപദേഷ്ടാവായും നീതിന്യായ മന്ത്രിയായും പ്രവര്‍ത്തിച്ച ഷബാന, ബ്രിട്ടീഷ് ചരിത്രത്തില്‍ മന്ത്രിപദവിയിലെത്തുന്ന ആദ്യ മുസ്ലിം വനിത കൂടിയാണ്.

ഷബാനയുടെ ജീവിതവഴികള്‍

1980 സെപ്റ്റംബര്‍ 17-ന് ബ്രിട്ടനിലെ ബര്‍മിങ്ഹാമിലാണ് ഷബാന മഹ്‌മൂദിന്റെ ജനനം. പാകിസ്ഥാനിലെ അധിനിവേശ ശ്മീരിലെ മിര്‍പൂര്‍ സ്വദേശികളാണ് അവരുടെ കുടുംബം. പിതാവ് സൗദി അറേബ്യയിലെ തായിഫില്‍ ജോലി ചെയ്തിരുന്നതിനാല്‍ കുട്ടിക്കാലത്തിന്റെ ഒരു ഭാഗം അവിടെയാണ് ചെലവഴിച്ചത്. ഓക്‌സ്ഫഡ് യൂണിവേഴ്‌സിറ്റിയിലെ ലിങ്കണ്‍ ലോ സ്‌കൂളില്‍ നിന്ന് ബിരുദം നേടിയ ഷബാന, വിദ്യാര്‍ഥി കമ്മിറ്റിയുടെ പ്രസിഡന്റായും പ്രവര്‍ത്തിച്ചിട്ടുണ്ട്. പ്രൊഫഷണല്‍ നഷ്ടപരിഹാര വിഷയങ്ങളില്‍ വിദഗ്ധയായ ഒരു യോഗ്യതയുള്ള അഭിഭാഷക കൂടിയാണ് അവര്‍.

ബ്രിട്ടീഷ് ലേബര്‍ പാര്‍ട്ടിയുടെ എഡ് മിലിബാന്‍ഡിന്റെ നേതൃത്വത്തില്‍ ഷബാന നിരവധി മന്ത്രിപദവികള്‍ വഹിച്ചിട്ടുണ്ട്.
2015ലെ തിരഞ്ഞെടുപ്പിന് ശേഷം ഷാഡോ ട്രഷറി സെക്രട്ടറിയായി നിയമിതയായി. എന്നാല്‍, സാമ്പത്തിക വിഷയങ്ങളിലെ അഭിപ്രായവ്യത്യാസങ്ങളെ തുടര്‍ന്ന് 2015 സെപ്റ്റംബറില്‍ ലേബര്‍ പാര്‍ട്ടി നേതാവായി ജെറമി കോര്‍ബിന്‍ തിരഞ്ഞെടുക്കപ്പെട്ടപ്പോള്‍ അവര്‍ രാജിവെച്ചു.
2016 ജനുവരിയില്‍ ലേബര്‍ പാര്‍ട്ടിയുടെ നാഷണല്‍ എക്‌സിക്യൂട്ടീവ് കമ്മിറ്റിയിലേക്ക് തിരഞ്ഞെടുക്കപ്പെട്ട ഷബാന, അതേ വര്‍ഷം ജൂലൈയില്‍ വീണ്ടും തിരഞ്ഞെടുക്കപ്പെട്ടു. 2016-ലെ ലേബര്‍ നേതൃ തിരഞ്ഞെടുപ്പില്‍ ജെറമി കോര്‍ബിന് പകരക്കാരനാകാന്‍ ശ്രമിച്ച ഓവന്‍ സ്മിത്തിന് അവര്‍ പിന്തുണ നല്‍കിയിരുന്നു.

2016 നവംബറില്‍, യെമനില്‍ സൗദി സഖ്യസേനയ്ക്കുള്ള ബ്രിട്ടീഷ് പിന്തുണ പിന്‍വലിക്കാനുള്ള പ്രമേയത്തിനെതിരെ പാര്‍ലമെന്റില്‍ അവര്‍ നിലപാടെടുത്തു.

2017-ലെ തിരഞ്ഞെടുപ്പില്‍ 80%-ലധികം വോട്ടുകള്‍ നേടി ഷബാന വീണ്ടും തിരഞ്ഞെടുക്കപ്പെട്ടു, ഇത് രാജ്യത്തെ ഏറ്റവും ഉയര്‍ന്ന വോട്ട് വിഹിതങ്ങളില്‍ ഒന്നായിരുന്നു. 2019-ലെ പൊതു തിരഞ്ഞെടുപ്പിലും അവര്‍ വിജയം നിലനിര്‍ത്തി.

2019-ലെ തിരഞ്ഞെടുപ്പില്‍ ലേബര്‍ പാര്‍ട്ടി മോശം പ്രകടനം കാഴ്ചവെച്ചതിനെ തുടര്‍ന്ന്, പാര്‍ട്ടിയുടെ തിരഞ്ഞെടുപ്പ് പ്രകടനം വിലയിരുത്തുന്നതിനായി ലൂസി പവല്‍, എഡ് മിലിബാന്‍ഡ്, ജോ പ്ലാറ്റ് എന്നിവരുള്‍പ്പെടെയുള്ള ഒരു സംഘത്തെ ഷബാന നയിച്ചു. 2017 മുതല്‍ ബ്രിട്ടീഷ് ലേബര്‍ പാര്‍ട്ടിയുടെ പബ്ലിക് അക്കൗണ്ട്‌സ് കമ്മിറ്റിയില്‍ ഷബാന സേവനമനുഷ്ഠിച്ചിട്ടുണ്ട്.