ദുബായ്: വിദേശത്ത് തൊഴില്‍ തേടി പോകുന്നവര്‍ക്ക് നിര്‍ബന്ധമായ ജി.എ.എം.സി.എ (വാഫിദ്) മെഡിക്കല്‍ പരിശോധനയുമായി ബന്ധപ്പെട്ട് തിരുവനന്തപുരം സെന്ററുകളില്‍ വ്യാപക ക്രമക്കേ:ടുകള്‍ നടക്കുന്നതായി ഇന്‍കാസ് യു.എ.ഇ നാഷനല്‍ കമ്മിറ്റി ആരോപിച്ചു. തിരുവനന്തപുരം സെന്ററുകളെ പ്രധാനമായും ആശ്രയിക്കുന്നത് തിരുവനന്തപുരം, കൊല്ലം, പത്തനംതിട്ട, നഗര്‍കോവില്‍, തിരുനെല്‍വേലി എന്നിവിടങ്ങളില്‍ നിന്നുള്ളവരാണ്. എന്നാല്‍, ചുരുക്കം ചില സെന്ററുകള്‍ ഒഴിച്ച് മറ്റ് കേന്ദ്രങ്ങള്‍ അപേക്ഷകരില്‍ ഭൂരിഭാഗത്തേയും ആരോഗ്യക്ഷമതയില്ലെന്ന് പ്രഖ്യാപിക്കുകയാണ്. എറണാകുളം സെന്ററുകളില്‍ വീണ്ടും പരിശോധന നടത്തിയപ്പോള്‍ അണ്‍ഫിറ്റ് ആയവര്‍ ഫിറ്റ് ആയി പ്രഖ്യാപിക്കപ്പെടുന്ന സംഭവങ്ങളും റിപ്പോര്‍ട്ട് ചെയ്തതായി ഇന്‍കാസ് യു.എ.ഇ നാഷണല്‍ കമ്മിറ്റി വൈസ് പ്രസിഡന്റ് ഷാജി ഷംസുദ്ദീന്‍ പറഞ്ഞു. കൂടാതെ വ്യക്തയില്ലാത്ത റിപോര്‍ട്ടുകളാണ് പല സെന്ററുകളും നല്‍കുന്നതെന്നും അദ്ദേഹം കൂട്ടിച്ചേര്‍ത്തു.

ഇത് പ്രവാസികളുടെ സ്വപ്നവും ഭാവിയും തകര്‍ക്കുന്ന അനീതിയും ക്രമക്കേടുമാണ്. തൊഴിലവസരം നഷ്ടപ്പെടുന്നതിനൊപ്പം വിദേശത്തേക്ക് പോകാനായി വായ്പ എടുത്തവര്‍ക്ക് വിലങ്ങുതടിയാണ് ഇത്തരം സെന്ററുകളുടെ നടപടികള്‍. വിഷയത്തില്‍ അന്വേഷണം വേണമെന്നും ഇവിടങ്ങളില്‍ പുനര്‍പരിശോധനക്ക് സംവിധാനം നടപ്പിലാക്കുകയും വേണമെന്ന് ഷാജി ഷംസുദ്ദീന്‍ ആവശ്യപ്പെട്ടു. വിഷയത്തില്‍ പരാതികളും ആവശ്യങ്ങളും ഉള്‍ക്കൊള്ളുന്ന കത്ത് വിദേശകാര്യ മന്ത്രിക്കും അടൂര്‍ പ്രകാശ് എം.പിയ്ക്കും നല്‍കിയതായും അദ്ദേഹം പറഞ്ഞു.