ന്യൂഡല്ഹി: ഇന്ത്യയുമായുള്ള റഷ്യയുടെ ബന്ധത്തെ പാകിസ്ഥാന് ബഹുമാനിക്കുന്നുവെന്ന് പാക് പ്രധാനമന്ത്രി ഷെഹ്ബാസ് ഷെരീഫ്. ചൈനയില് നടക്കുന്ന ഷാങ്ഹായ് കോഓപ്പറേഷന് ഓര്ഗനൈസേഷന് (എസ്.സി.ഒ) ഉച്ചകോടിയില് റഷ്യന് പ്രസിഡന്റ് വ്ളാഡിമിര് പുടിനുമായി നടത്തിയ കൂടിക്കാഴ്ചയിലാണ് ഷെരീഫ് ഇക്കാര്യം വ്യക്തമാക്കിയത്. റഷ്യയുമായി ശക്തമായ ഉഭയകക്ഷി ബന്ധം സ്ഥാപിക്കാന് പാകിസ്ഥാന് ആഗ്രഹിക്കുന്നുവെന്നും അദ്ദേഹം കൂട്ടിച്ചേര്ത്തു.
ഷാങ്ഹായിയിലെ ടിയാന്ജിനില് നടന്ന എസ്.സി.ഒ ഉച്ചകോടിയിലും തുടര്ന്ന് ചൈനീസ് സൈന്യത്തിന്റെ 80-ാം വാര്ഷിക പരേഡിലും പങ്കെടുക്കാനാണ് ഇരു നേതാക്കളും ചൈനയിലെത്തിയത്. ഉച്ചകോടിക്കിടെ നടന്ന ചര്ച്ചയില്, കഴിഞ്ഞ കുറച്ച് വര്ഷങ്ങളായി പാകിസ്ഥാന്-റഷ്യ ബന്ധം മെച്ചപ്പെട്ടിട്ടുണ്ടെന്നും, ഈ ബന്ധം കൂടുതല് ശക്തിപ്പെടുത്താന് താന് ആഗ്രഹിക്കുന്നുവെന്നും ഷെരീഫ് പുടിനോട് പറഞ്ഞു.
'ഇന്ത്യയുമായുള്ള നിങ്ങളുടെ ബന്ധത്തെ ഞങ്ങള് ബഹുമാനിക്കുന്നു. അത് പൂര്ണ്ണമായും ശരിയാണ്. എന്നാല് ഞങ്ങള്ക്കും റഷ്യയുമായി വളരെ ശക്തമായ ബന്ധം കെട്ടിപ്പടുക്കാന് ആഗ്രഹമുണ്ട്. ഈ ബന്ധങ്ങള് മേഖലയുടെ പുരോഗതിക്കും സമൃദ്ധിക്കും പൂരകമായിരിക്കും,' ഷെരീഫ് പറഞ്ഞു. പുടിന് വളരെ ഊര്ജ്ജസ്വലനായ നേതാവാണെന്നും, ഇരു രാജ്യങ്ങളും ശരിയായ ദിശയിലാണ് നീങ്ങുന്നതെന്നും അദ്ദേഹം കൂട്ടിച്ചേര്ത്തു.
വ്യാപാരം, ഊര്ജ്ജം, കൃഷി, നിക്ഷേപം, പ്രതിരോധം, നിര്മ്മിതബുദ്ധി, വിദ്യാഭ്യാസം, സാംസ്കാരിക വിനിമയം തുടങ്ങി വിവിധ മേഖലകളില് റഷ്യയുമായുള്ള സഹകരണം വിപുലമാക്കാന് പാകിസ്ഥാന് ആഗ്രഹിക്കുന്നതായും ഷെരീഫ് അറിയിച്ചു. പാകിസ്ഥാനെ മേഖലയിലെ ഒരു 'സന്തുലിത ശക്തി'യായി കാണുന്ന പുടിന്റെ നിലപാടിനോട് ഷെരീഫ് നന്ദിയും അറിയിച്ചു.
അതേസമയം, എസ്.സി.ഒ ഉച്ചകോടിയില് ഇന്ത്യന് പ്രധാനമന്ത്രി നരേന്ദ്ര മോദി ഭീകരവാദത്തിനെതിരെ ശക്തമായ നിലപാട് എടുത്തിരുന്നു. ജമ്മു കശ്മീരിലെ പഹല്ഗാമിലുണ്ടായ ഭീകരാക്രമണത്തെ പരാമര്ശിച്ച്, ഭീകരവാദത്തെ ചെറുക്കുന്നതില് ഇന്ത്യയെ പിന്തുണച്ച രാജ്യങ്ങള്ക്ക് മോദി നന്ദി അറിയിച്ചു. ഭീകരതയ്ക്കെതിരായ സംയുക്ത പ്രഖ്യാപനത്തില് പാകിസ്ഥാന്റെ പേര് നേരിട്ട് പരാമര്ശിച്ചില്ലെങ്കിലും, അത് പാകിസ്ഥാനെ ലക്ഷ്യമിട്ടാണെന്ന് നയതന്ത്ര വിദഗ്ദ്ധര് വിലയിരുത്തുന്നു.
Related News
