കരിപ്പൂര്‍: നിശ്ചിത സമയത്തിലും നാലര മണിക്കൂര്‍ മുന്‍പെ വിമാനം പറന്നതില്‍ യാത്രക്കാരുടെ പ്രതിഷേധം. കരിപ്പൂരില്‍നിന്ന് ബെംഗളൂരുവിലേക്കുള്ള എയര്‍ ഇന്ത്യ വിമാനം ആണ് നേരത്തെ സ്ഥലം വിട്ടത്. എന്നാല്‍ യാത്രക്കാരെ മുന്‍കൂട്ടി അറിയിച്ച് സമയക്രമത്തില്‍ മാറ്റം വരുത്തിയാണ് വിമാനം പറന്നതെന്ന് എയര്‍ ഇന്ത്യയും.

സമയം മാറ്റിയത് അറിയിച്ചില്ലെന്നു പറഞ്ഞ് ഏതാനും യാത്രക്കാര്‍ വിമാനത്താവളത്തില്‍ ബഹളം വച്ചു. ബെംഗളൂരുവിലേക്ക് ഇന്നലെ രാത്രി 8.30നുള്ള എയര്‍ഇന്ത്യ എക്‌സ്പ്രസ് വിമാനമാണ് വൈകിട്ട് നാലിനു പുറപ്പെട്ടത്. ഇതറിയാതെ എത്തിയ യാത്രക്കാരാണ് പ്രതിഷേധിച്ചത്. സമയമാറ്റം അറിയിച്ചിരുന്നില്ലെന്ന് ഇവര്‍ പറഞ്ഞു. എന്നാല്‍ യാത്രക്കാരെ വിവരമറിയിച്ചിരുന്നുവെന്നാണ് വിമാനക്കമ്പനി അധികൃതര്‍ പറയുന്നത്. ടിക്കറ്റ് തുക തിരിച്ചുനല്‍കാമെന്നാണ് പിന്നീട് വിമാനക്കമ്പനി അധികൃതര്‍ അറിയിച്ചതെന്നു പ്രതിഷേധിച്ച യാത്രക്കാര്‍ പറഞ്ഞു.