റിയാദ്: മാരക രോഗങ്ങള്‍ കാരണം ദുരിതമനുഭവിക്കുന്ന എത്യോപ്യയിലെ കുട്ടികള്‍ക്ക് സഹായഹസ്തവുമായി വേള്‍ഡ് അസംബ്ലി ഓഫ് മുസ്ലിം യൂത്ത് (WAMY). മനുഷ്യത്വപരമായ ഈ സംരംഭത്തിന്റെ ഭാഗമായി എത്യോപ്യയില്‍ ആദ്യത്തെ മെഡിക്കല്‍ സംഘത്തെ അയച്ചു. ജന്മനാ മൂത്രാശയ സംബന്ധമായ വൈകല്യങ്ങളുള്ള കുട്ടികള്‍ക്ക് ശസ്ത്രക്രിയ നല്‍കിയാണ് ഈ സംഘം പ്രതീക്ഷയുടെ ഒരു വാതില്‍ തുറന്നത്.
ഏകദേശം 250 ജനനങ്ങളില്‍ ഒരാള്‍ക്ക് ഈ അവസ്ഥ കാണപ്പെടാറുണ്ട്. ഈ രോഗാവസ്ഥ മൂലം സാധാരണ നിലയില്‍ മൂത്രമൊഴിക്കുന്നതിന് ബുദ്ധിമുട്ടുണ്ടാകും. ഭാവിയില്‍ പ്രത്യുത്പാദനശേഷിയെ ബാധിക്കാനുള്ള സാധ്യതയുമുണ്ട്. ഈ രോഗാവസ്ഥ കുട്ടികളില്‍ കഠിനമായ ശാരീരികവും മാനസികവുമായ പ്രയാസങ്ങള്‍ സൃഷ്ടിക്കുന്നു. എത്യോപ്യയില്‍ പീഡിയാട്രിക് സര്‍ജിക്കല്‍ സ്‌പെഷ്യലിസ്റ്റുകള്‍ വളരെ കുറവായതുകൊണ്ട് തന്നെ ഇത്തരം സഹായങ്ങള്‍ അവിടെ അടിയന്തിരമായി ആവശ്യമായിരുന്നു.
പീഡിയാട്രിക് യൂറോളജി കണ്‍സള്‍ട്ടന്റായ ഡോ. ഉസാമ ബിന്‍ സാലിഹ് അല്‍-സുവൈആന്റെ നേതൃത്വത്തിലുള്ള സൗദി മെഡിക്കല്‍ സംഘം എത്യോപ്യയില്‍ എത്തി, നിരവധി കുട്ടികളില്‍ സങ്കീര്‍ണ്ണമായ ശസ്ത്രക്രിയകള്‍ വിജയകരമായി പൂര്‍ത്തിയാക്കി. ഇത് കുട്ടികള്‍ക്ക് സാധാരണ ജീവിതം നയിക്കാന്‍ ഒരു പുതിയ അവസരം നല്‍കി.
ഈ ശസ്ത്രക്രിയകള്‍ വെറും ചികിത്സകള്‍ക്കപ്പുറം, ജീവിത കഥകള്‍ മാറ്റിയെഴുതുകയും കുട്ടികളുടെയും അവരുടെ കുടുംബങ്ങളുടെയും മുഖങ്ങളില്‍ പുതിയ പ്രതീക്ഷ നല്‍കുകയും ചെയ്തു. മനുഷ്യത്വവും വൈദഗ്ധ്യവും ഒരുമിച്ച് ചേരുമ്പോള്‍ അത്ഭുതങ്ങള്‍ സൃഷ്ടിക്കാനും വിധി മാറ്റിയെഴുതാനും കഴിയുമെന്ന് ഈ സംരംഭം തെളിയിക്കുന്നു. ഈ മാനുഷിക നീക്കം വലിയ പ്രശംസ നേടുകയാണ്.
.jpg)
Related News
