മലപ്പുറം: അടുത്ത് വര്‍ഷത്തെ ഹജ്ജ് മുതല്‍ ആരംഭിക്കുന്ന കുറഞ്ഞ ദിവസത്തെ ഹജ്ജിന് ഇന്ത്യയില്‍നിന്ന് 7352 തീര്‍ഥാടകര്‍ക്ക് അവസരം ലഭിച്ചു. ഇതില്‍ 398 പേര്‍ കേരളത്തില്‍നിന്നുള്ളവരാണ്. ഹജ്ജ് കര്‍മം 20 മുതല്‍ 22 ദിവസത്തിനുള്ളില്‍ പൂര്‍ത്തിയാക്കി മടങ്ങുന്നതാണ് ഷോര്‍ട്ട് ടേം ഹജ്ജ്. 2026ലെ ഹജ്ജ് മുതലാണ് ഇത് ആരംഭിക്കുന്നത്.
ഇത്തവണ അപേക്ഷാ സമര്‍പ്പണത്തില്‍ തന്നെ വെബ്സൈറ്റില്‍ ഷോര്‍ട്ട് ഹജ്ജ് പാക്കേജ് ഒപ്ഷന്‍ തിരഞ്ഞെടുക്കാന്‍ അവസരം നല്‍കിയിരുന്നു. എന്നാല്‍ ഇവര്‍ക്കായി പ്രത്യേക നറുക്കെടുപ്പില്ല. മുഴുവന്‍ അപേക്ഷകരേയും ഉള്‍പ്പെടുത്തിയാണ് നറുക്കെടുപ്പ്.

ഇവരോടും ആദ്യഗഡു പണം സാധാരണ പോലെ അടക്കാനാണ് ആവശ്യപ്പെട്ടത്. അവസാന ഗഡുക്കളില്‍ വ്യത്യാസമുണ്ടായേക്കും. ഹജ്ജ് കര്‍മങ്ങളും മദീന സന്ദര്‍ശനവും 20 ദിവസത്തിനുള്ളില്‍ പൂര്‍ത്തിയാക്കി നാട്ടിലേക്ക് മടങ്ങുന്ന രീതിയിലാണ് യാത്ര ക്രമീകരിക്കുക.

കേന്ദ്ര ഹജ്ജ് കമ്മിറ്റി 10,000 സീറ്റുകളാണ് ഷോര്‍ട്ട് ടേം ഹജ്ജ് വിഭാഗത്തില്‍ നല്‍കുമെന്ന് അറിയിച്ചിരുന്നത്. കൂടിയാല്‍ നറുക്കെടുപ്പ് നടത്തും. എന്നാല്‍ അവസരം ലഭിച്ചവര്‍ പതിനായിരത്തില്‍ താഴെയാണ്. കൂടുതല്‍ പേര്‍ക്ക് അവസരം ലഭിച്ചത് ഡല്‍ഹിയില്‍ നിന്നാണ്. 2200 തീര്‍ഥാടകരാണ് ഡല്‍ഹിയില്‍നിന്ന് യാത്ര തിരിക്കുക. മുംബൈയില്‍ നിന്ന് 1985 പേരും, ഹൈദരാബാദില്‍ നിന്ന് 1104 പേരും യാത്ര തിരിക്കും. കേരളത്തില്‍ നിന്നുള്ള 398 തീര്‍ഥാടകര്‍ കൊച്ചി വഴിയാണ് യാത്ര പുറപ്പെടുക.

ആദ്യമായാണ് ഹജ്ജ് കമ്മിറ്റി ഈ വര്‍ഷം 20 മുതല്‍ 22 ദിവസത്തെ ഹജ്ജ് പാക്കേജ് നടപ്പാക്കുന്നത്. സാധാരണ 40 മുതല്‍ 44 ദിവസം വരെയാണ് ഹജ്ജ് കര്‍മങ്ങള്‍ക്ക് സൗദി അറേബ്യയില്‍ തങ്ങാനുള്ള സമയപരിധി. വിദേശത്ത് ജോലി ചെയ്യുന്നവര്‍, പ്രൊഫഷണലുകള്‍, പ്രായമായവര്‍, ദീര്‍ഘ ദിവസ യാത്രക്ക് ബുദ്ധിമുട്ടുള്ളവര്‍ തുടങ്ങിയവര്‍ക്ക് ഈ പാക്കേജ് ആശ്വാസമാകും.