റിയാദ്: സൗദിയില്‍ റോഡുകളുടെ വിവര ശേഖരണം, നിര്‍മാണം, അറ്റകുറ്റപണികള്‍ എന്നിവയെ ഏകോപിപ്പിക്കുന്നതിന് ഏകീകൃത ഡിജിറ്റല്‍ സംവിധാനം വരുന്നു. റോഡ് നെറ്റ്വര്‍ക്ക് മാനേജ്‌മെന്റിന്റെ കാര്യക്ഷമത വര്‍ധനവും ദേശീയ പദ്ധതികളുടെ ലക്ഷ്യ പൂര്‍ത്തീകരണവുമാണ് ഈ ഏകജാലക സംവിധാനം കൊണ്ട് ഉദ്ദേശിക്കുന്നതെന്ന് മുനിസിപ്പല്‍ ഭവനകാര്യ മന്ത്രാലയം അറിയിച്ചു.

റോഡുകളുടെ വിവര ശേഖരണം, അറ്റകുറ്റപണികളുടെ കൃത്യതയാര്‍ന്ന പൂര്‍ത്തീകരണം, നിര്‍മാണം എന്നിവ ഏകീകരിക്കുന്നതിനും പരിപാലിക്കുന്നതിനും പുതിയ സംവിധാനം സഹായിക്കും. ഏറ്റവും പുതിയ ഡിജിറ്റല്‍ വിശകലന സാങ്കേതികവിദ്യകളെയും ജിയോസ്പെഷ്യല്‍ മാപ്പിംഗിനെയും ആശ്രയിച്ചാണ് സംവിധാനം പ്രവര്‍ത്തിക്കുക. റോഡ് ആസ്തി മാനേജ്‌മെന്റിന്റെ കാര്യക്ഷമത മെച്ചപ്പെടുത്തുക എന്നതും പദ്ധതിയുടെ ലക്ഷ്യമാണ്. ചെലവ് കാര്യക്ഷമത മെച്ചപ്പെടുത്തുന്നതിനും വിഭവ വിനിയോഗം യുക്തിസഹമാക്കുന്നതിനും ദീര്‍ഘകാല ആസൂത്രണത്തിനുള്ള നൂതന ഉപകരണങ്ങള്‍ ഉപയോഗിച്ചുള്ള തീരുമാനങ്ങള്‍ക്കും ഇത് കാരണാകും. അത് വഴി മുനിസിപ്പാലിറ്റികള്‍ക്കുള്ള ബജറ്റ് വിഹിതം മെച്ചപ്പെടുത്തുന്നതിനും, ഗതാഗത സുരക്ഷാ നിലവാരം വര്‍ദ്ധിപ്പിക്കുന്നതിനും ഇതുപകരിക്കും.