മലപ്പുറം: മേലെ അരിപ്രയിലെ വിദ്യാഭ്യാസ, സാമൂഹിക, സാംസ്‌കാരിക, ആരോഗ്യ മേഖലകളില്‍ മികച്ച പ്രവര്‍ത്തനങ്ങള്‍ കാഴ്ചവെക്കുന്ന 'ബ്രദേഴ്‌സ് അരിപ്ര' കൂട്ടായ്മ പ്രവാസി സംഗമം സംഘടിപ്പിച്ചു. നാടിന്റെ വികസന ശില്‍പികളായ പ്രവാസികള്‍ക്ക് വേണ്ടി സംഘടിപ്പിച്ച പ്രവാസി സംഗമം ജനശ്രദ്ധ ആകര്‍ഷിച്ച മികച്ച പരിപാടിയായി മാറി. മങ്കട മണ്ഡലം എം.എല്‍.എ. മഞ്ഞളാംകുഴി അലി സംഗമം ഉദ്ഘാടനം ചെയ്തു. പ്രവാസികള്‍ നാട്ടിന്‍പുറങ്ങളുടെ സാമ്പത്തിക-സാമൂഹിക പുരോഗതിയില്‍ വഹിക്കുന്ന പങ്കിനെകുറിച്ചും ഗ്രാമങ്ങളുടെ വികസനത്തിന് കരുത്തേകുന്ന തരത്തില്‍ വിദേശത്തുള്ള മലയാളികളുടെ സംഭാവനകളെ കുറിച്ചും ഉദ്ഘാടകന്‍ വിശദീകരിച്ചു.
പഴയ കാല പ്രവാസികളടക്കം പങ്കെടുത്ത സംഗമത്തില്‍ പ്രദേശത്തെ പ്രമുഖര്‍, സംഘടനാ പ്രതിനിധികള്‍, പ്രവാസി കുടുംബാംഗങ്ങള്‍ എന്നിവര്‍ പങ്കെടുത്തു. സംഗമത്തോടനുബന്ധിച്ച് പ്രവാസി ജീവിതാനുഭവങ്ങള്‍ പങ്കുവെക്കുന്ന വിവിധ സെഷനുകളും സാംസ്‌കാരിക പരിപാടികളും അരങ്ങേറി. പ്രാവാസി ക്ഷേമനിധിയെക്കുറിച്ചും പ്രവാസികള്‍ക്ക് ലഭിക്കേണ്ട സര്‍ക്കാര്‍ ആനുകൂല്യങ്ങളെ കുറിച്ചും മൊയ്തീന്‍ കുട്ടി വള്ളിക്കാപറ്റ ക്ലാസെടുത്തു. മുപ്പത്തിയെട്ട് വര്‍ഷം പൂര്‍ത്തിയാക്കിയ എട്ട് പ്രവാസികളെ ചടങ്ങില്‍ ആദരിച്ചു. വാര്‍ഡ് മെംബര്‍ സ്വാലിഹ നൗഷാദ് ആശംസകള്‍ നേര്‍ന്നു സംസാരിച്ചു.
അബ്ദുല്‍ അസീസ് തങ്കയത്തില്‍ അധ്യക്ഷത വഹിച്ചു. നൗഷാദലി തോടേങ്ങല്‍, അന്‍വര്‍ ഷാജ വേങ്ങശ്ശേരി, ഇബ്രാഹിം മാസ്റ്റര്‍ എന്നിവര്‍ വിവിധ സെഷനുകള്‍ക്ക് നേതൃത്വം നല്‍കി. മുഹമ്മദ് മാമ്പ്ര, ഹംസ മാസ്റ്റര്‍ തോടേങ്ങല്‍, മന്‍സൂറലി, സക്കീര്‍ മാമ്പ്ര തുടങ്ങി ബ്രദേഴ്‌സ് അരിപ്രയുടെ പ്രവര്‍ത്തകരും ഭാരവാഹികളും നേതൃത്വം നല്‍കി. മുആദ് തോടേങ്ങല്‍ നന്ദി പറഞ്ഞു.
.jpg)
