ഷാര്‍ജ: ആലപ്പുഴ ജില്ലാ പ്രവാസി സമാജം (AJPS) സംഘടിപ്പിക്കുന്ന 'ആലപ്പുഴോത്സവം സീസണ്‍ 6' നവംബര്‍ 29-ന് ഷാര്‍ജ സഫാരി മാളില്‍ വിപുലമായ പരിപാടികളോടെ നടക്കും. രാവിലെ 10 മണി മുതല്‍ രാത്രി 10 മണി വരെ നീളുന്ന ഈ ആഘോഷത്തില്‍ ആലപ്പുഴയുടെ തനിമയും കേരളത്തിന്റെ സാംസ്‌കാരിക പൈതൃകവും പ്രവാസി കൂട്ടായ്മയുടെ സൗഹൃദവും ഒത്തുചേരും.

രാവിലെ മുതല്‍ വിവിധ കലാ-സാംസ്‌കാരിക പരിപാടികള്‍, നൃത്ത-സംഗീത പരിപാടികള്‍, കുട്ടികളുടെ ഫാഷന്‍ ഷോ എന്നിവ അരങ്ങേറും. ആലപ്പുഴയുടെ പാരമ്പര്യവും കേരളത്തിന്റെ ആഘോഷ സംസ്‌കാരവും വിളിച്ചോതുന്ന പൂക്കളം, വടംവലി തുടങ്ങിയ മത്സരങ്ങളും ആഘോഷത്തിന്റെ ഭാഗമായി സംഘടിപ്പിക്കും.

ഉച്ചയ്ക്ക് പ്രവാസി മലയാളികള്‍ക്കായി കേരളത്തിന്റെ തനത് രുചിക്കൂട്ടുകള്‍ സമ്മാനിക്കുന്ന വിഭവസമൃദ്ധമായ ഓണസദ്യയും ഒരുക്കിയിട്ടുണ്ട്. കുടുംബസമേതം എത്തുന്നവര്‍ക്ക് ഒരുമിച്ചിരുന്ന് ഓണസദ്യ ആസ്വദിക്കാനുള്ള അവസരവും ഈ ആലപ്പുഴോത്സവത്തിന്റെ പ്രത്യേകതയായിരിക്കും.

വൈകിട്ട് 4:30 മുതല്‍ ഔദ്യോഗിക സാംസ്‌കാരിക സമ്മേളനം നടക്കും. സാമൂഹിക, സാംസ്‌കാരിക, ജീവകാരുണ്യ രംഗങ്ങളിലെ പ്രമുഖ വ്യക്തിത്വങ്ങള്‍, ജനപ്രതിനിധികള്‍, വിവിധ മേഖലകളിലെ വിശിഷ്ടാതിഥികള്‍ തുടങ്ങിയവര്‍ സമ്മേളനത്തില്‍ പങ്കെടുക്കും.

തുടര്‍ന്ന് വൈകിട്ട് 6 മണി മുതല്‍ മെഗാ മ്യൂസിക്കല്‍ ഷോ അരങ്ങേറും. പ്രശസ്ത ഗായിക പ്രസീത ചാലക്കുടി, സുമേഷ് കൂട്ടിക്കല്‍ തുടങ്ങിയ പ്രമുഖ കലാകാരന്മാര്‍ അണിനിരക്കുന്ന കലാവിരുന്ന് ആലപ്പുഴോത്സവത്തിന്റെ പ്രധാന ആകര്‍ഷണങ്ങളിലൊന്നായിരിക്കും.

ഇതിനൊപ്പം തിരുവാതിര, മോഹിനിയാട്ടം, സിനിമാറ്റിക് ഡാന്‍സ്, നാടന്‍പാട്ട്, മിമിക്രി, ഫ്യൂഷന്‍ മ്യൂസിക് തുടങ്ങി വൈവിധ്യമാര്‍ന്ന കലാപരിപാടികളും വേദിയിലെത്തും. കുട്ടികള്‍ക്കും മുതിര്‍ന്നവര്‍ക്കും ഒരുപോലെ ആസ്വദിക്കാവുന്ന രീതിയിലാണ് സംഘാടകര്‍ പരിപാടികള്‍ ഒരുക്കിയിരിക്കുന്നത്.

ആലപ്പുഴയുടെ കലാ-സാംസ്‌കാരിക പൈതൃകം യു.ഇ.എയിലെ പുതുതലമുറയ്ക്ക് പരിചയപ്പെടുത്തുന്നതിനൊപ്പം പ്രവാസി മലയാളികള്‍ക്കിടയിലെ സൗഹൃദവും കൂട്ടായ്മയും കൂടുതല്‍ ശക്തിപ്പെടുത്തുക എന്ന ലക്ഷ്യത്തോടെയാണ് ഈ ഉത്സവം സംഘടിപ്പിക്കുന്നത്.

യു.ഇ.എയിലെ വിവിധ എമിറേറ്റുകളില്‍ നിന്നുള്ള പ്രവാസി മലയാളികള്‍ പങ്കെടുക്കുന്ന 'ആലപ്പുഴോത്സവം സീസണ്‍ 6', കുടുംബസമേതം ആഘോഷിക്കാവുന്ന വലിയൊരു ജനകീയ സംഗമമായി മാറുമെന്ന് സംഘാടകര്‍ അറിയിച്ചു. കൂടുതല്‍ വിവരങ്ങള്‍ക്കും പ്രോഗ്രാമുകളില്‍ പങ്കെടുക്കാനും ബന്ധപ്പെടേണ്ട നമ്പറുകള്‍:
050 2014993, 058 2027957, 055 7588231, 052 5155941, 050 5037226.