ജിദ്ദ: ആലുവയുടെ തനിമയും കേരളീയ പാരമ്പര്യവും നിലനിര്‍ത്തിക്കൊണ്ട് ജിദ്ദ ആലുവ കൂട്ടായ്മ (JAK) സംഘടിപ്പിച്ച 'ഓണവിരുന്ന് 2026' ആഘോഷം ശ്രദ്ധേയമായി. ഹറാസാത്തിലെ വില്ലയില്‍ നടന്ന ചടങ്ങില്‍ സമൃദ്ധമായ ഓണസദ്യയും വിപുലമായ കലാ-കായിക പരിപാടികളും അരങ്ങേറി. അംഗങ്ങളുടെയും കുടുംബങ്ങളുടെയും സജീവ പങ്കാളിത്തത്തിന് പുറമെ ജിദ്ദയിലെ വിവിധ കലാ-സാംസ്‌കാരിക സംഘടനകളുടെ പ്രതിനിധികളും പരിപാടിയില്‍ പങ്കെടുത്തു.
ഒന്നര പതിറ്റാണ്ടിലേറെയായി ജീവകാരുണ്യ പ്രവര്‍ത്തനങ്ങളിലൂടെയും കലാ-സാഹിത്യ-സാമൂഹിക ഇടപെടലുകളിലൂടെയും ജിദ്ദയിലെ പ്രവാസി സമൂഹത്തില്‍ ജാക്ക് സജീവ സാന്നിധ്യമാണ്. പരിപാടിയുടെ ഭാഗമായി നടന്ന ഓണാഘോഷ യാത്രയില്‍ ഒരു പാകിസ്ഥാനി പൗരന്‍ മാവേലിയായി എത്തിയത് ഏവര്‍ക്കും വേറിട്ടൊരു അനുഭവമായി മാറി. മാവേലിക്കൊപ്പമുള്ള കേരളീയ വേഷവിധാനങ്ങളും ആഘോഷാന്തരീക്ഷവും പരിപാടിക്ക് ഓണപ്പകിട്ടേകി.
കലാപരിപാടികളില്‍ അംഗങ്ങളും കുട്ടികളും ആവേശത്തോടെ പങ്കെടുത്തു. നൃത്താധ്യാപിക ശ്രീത അനില്‍കുമാറിന്റെ നേതൃത്വത്തില്‍ അംഗനമാര്‍ അവതരിപ്പിച്ച തിരുവാതിരയും കൊച്ചുകലാകാരികളുടെ നൃത്താവതരണങ്ങളും കാണികളുടെ കൈയടി നേടി. റാഫി ആലുവ, കലാം എടയാര്‍, അമാന്‍ ഫൈസല്‍, സഹീര്‍ മാഞ്ഞാലി, സിമി അബ്ദുല്‍ ഖാദര്‍, ഹാരിസ് ഹുസൈന്‍, അന്‍സാര്‍ ആലുവ, അന്‍വര്‍ തോട്ടുമുഖം, അഫ്ര സബീന്‍ റാഫി, അന്‍ഫല്‍ ബഷീര്‍, ഫൈസല്‍ അലിയാര്‍, സബീനാ റാഫി എന്നിവരുടെ ഗാനങ്ങളും ജെന്‍-സി നൃത്തങ്ങളും പരിപാടിക്ക് മാറ്റുകൂട്ടി. അദീം ഫൈസല്‍, നദ സഹീര്‍, അഫ്ര റാഫി എന്നിവര്‍ അവതരിപ്പിച്ച കോമഡി സ്‌കിറ്റ് സദസ്സില്‍ ചിരിയുണര്‍ത്തി.
കൂട്ടായ്മയുടെ വളര്‍ച്ചയ്ക്കും പ്രവര്‍ത്തനങ്ങള്‍ക്കും ആത്മാര്‍ത്ഥമായി നേതൃത്വം നല്‍കിയവരെയും വിവിധ പ്രതിഭകളെയും ചടങ്ങില്‍ മെമന്റോകള്‍ നല്‍കി ആദരിച്ചു. പരീക്ഷകളില്‍ ഉന്നത വിജയം നേടിയ കൂട്ടായ്മയിലെ വിദ്യാര്‍ഥികള്‍ക്കും പുരസ്‌കാരങ്ങള്‍ വിതരണം ചെയ്തു.
ജിദ്ദയിലെ പ്രമുഖ നാടക-സിനിമ കലാകാരനും ജാക്കിന്റെ സ്ഥാപകരില്‍ പ്രമുഖനുമായ സുബൈര്‍ മുട്ടം, കലാകാരനും മുന്‍ എക്‌സിക്യൂട്ടീവ് അംഗവുമായ അബ്ദു സമദ് (നാട്ടില്‍ സ്ഥിരതാമസമാക്കിയയാള്‍), ലേഡീസ് വിംഗ് കണ്‍വീനര്‍ സിമി മോള്‍, രക്ഷാധികാരിയും സീനിയര്‍ അംഗവുമായ അബ്ദുല്‍ റഷീദ്, നൃത്താധ്യാപിക ശ്രീത അനില്‍കുമാര്‍ എന്നിവരെ ചടങ്ങില്‍ ആദരിച്ചു. കലാപരിപാടികള്‍ക്ക് ശേഷം അംഗങ്ങള്‍ പങ്കെടുത്ത വിവിധ വിനോദ മത്സരങ്ങളും അരങ്ങേറി.
പ്രോഗ്രാം കണ്‍വീനര്‍ സുബൈര്‍ പാനായിക്കുളത്തിന്റെ നേതൃത്വത്തില്‍ നടന്ന ചടങ്ങില്‍ സിമി അബ്ദുല്‍ ഖാദര്‍ അവതാരകയായി. സെക്രട്ടറി അന്‍ഫല്‍ ബഷീര്‍ സ്വാഗതവും പ്രസിഡന്റ് അബ്ദുല്‍ ഖാദര്‍, രക്ഷാധികാരി ഡോ. സിയാവുദ്ദീന്‍ എന്നിവര്‍ ഓണാശംസകളും നേര്‍ന്നു. ട്രഷറര്‍ കലാം എടയാര്‍ നന്ദി പറഞ്ഞു.
എക്‌സിക്യൂട്ടീവ് അംഗങ്ങളായ അബ്ദുല്‍ റഷീദ്, അബ്ദുല്‍ ജലീല്‍, ജമാല്‍ വയല്‍ക്കര, നൗഷാദ് അടുവാശ്ശേരി, ഷജീര്‍ പുറയാര്‍, വിനു, ഫാസില്‍, അജാസ് സ്വാലിഹ്, തൗഫീര്‍, ഷനൂബ് അബ്ദുല്‍ അസീസ്, ജാന്‍ കൊച്ചി എന്നിവര്‍ പരിപാടിയുടെ ഏകോപനത്തിന് നേതൃത്വം നല്‍കി.
.jpg)
