റിയാദ്- സെന്‍ട്രല്‍ യെമനിലെ അല്‍-ഹുദൈദ ഗവര്‍ണറേറ്റില്‍ ഹൂതി മിലിഷ്യകളുടെ സൈനിക കേന്ദ്രങ്ങള്‍ തകര്‍ത്തുകൊണ്ട് സഖ്യസേനയുടെ നാവികസേന ശക്തമായ തിരിച്ചടി നല്‍കിയതായി ഔദ്യോഗിക വക്താവ് മേജര്‍ ജനറല്‍ തുര്‍ക്കി അല്‍-മാലികി അറിയിച്ചു. ബാബ് അല്‍-മന്ദബ് കടലിടുക്കിലെ വ്യോമസുരക്ഷ സഖ്യസേന പൂര്‍ണ്ണമായും ഏറ്റെടുത്തിരിക്കുകയാണ്.
തെക്കന്‍ ചെങ്കടലിലെ ജലപാതകള്‍ ലക്ഷ്യമിട്ട് ഹൂതികള്‍ നടത്താനിരുന്ന അടിയന്തര ആക്രമണ പദ്ധതികള്‍ സഖ്യസേന വിജയകരമായി തകര്‍ത്തു. ഈ നീക്കത്തിന്റെ ഭാഗമായി ഹൂതികളുടെ ആയുധശേഖരങ്ങള്‍, സ്‌ഫോടകവസ്തുക്കള്‍ നിറച്ച ബോട്ട് ഗോഡൗണുകള്‍, സമുദ്ര മൈനുകള്‍ എന്നിവ തകര്‍ത്തതായി മേജര്‍ ജനറല്‍ അല്‍-മാലികി വ്യക്തമാക്കി. ബാബ് അല്‍-മന്ദബ് കടലിടുക്കിലൂടെയുള്ള അന്താരാഷ്ട്ര സമുദ്ര ഗതാഗതത്തിന്റെ സുരക്ഷ ഉറപ്പാക്കുന്നതിന്റെ ഭാഗമായാണ് ഈ സൈനിക നടപടി.
തിങ്കളാഴ്ച പുലര്‍ച്ചെ ആരംഭിച്ച 'ഡോണ്‍ ഓഫ് യെമന്‍' ദൗത്യത്തില്‍ നൂറോളം യുദ്ധവിമാനങ്ങളാണ് പങ്കെടുത്തതെന്ന് അദ്ദേഹം വെളിപ്പെടുത്തി. ഈ വന്‍കിട സൈനിക നീക്കത്തിലൂടെ ഹൂതികളുടെ തന്ത്രപ്രധാനമായ 324 ഉയര്‍ന്ന മൂല്യമുള്ള ലക്ഷ്യസ്ഥാനങ്ങള്‍ പൂര്‍ണ്ണമായി നശിപ്പിക്കാന്‍ സാധിച്ചു. യെമന്‍ സായുധ സേനയ്ക്ക് കരയില്‍ ആവശ്യമായ വ്യോമസഹായം ഇരുപത്തിനാല് മണിക്കൂറും നല്‍കിവരുന്നുണ്ടെന്നും നീങ്ങിക്കൊണ്ടിരിക്കുന്ന ഭീകര ലക്ഷ്യങ്ങളെ തകര്‍ത്തുകൊണ്ടിരിക്കുകയാണെന്നും അദ്ദേഹം കൂട്ടിച്ചേര്‍ത്തു.
.jpg)
Related News
