ജിദ്ദ: മലപ്പുറം ജില്ലയെയും ജില്ലയിലെ ജനങ്ങളെയും അവഹേളിക്കുന്ന തരത്തില്‍ പ്രസ്താവന നടത്തിയ മുന്‍ എം.എല്‍.എയും സി.പി.എം നേതാവുമായ നന്ദകുമാറിന്റെ നിലപാട് അത്യന്തം പ്രതിഷേധാര്‍ഹമാണെന്ന് ജിദ്ദ മലപ്പുറം ജില്ലാ കെ.എം.സി.സി പ്രസ്താവനയില്‍ പറഞ്ഞു.

കേരളത്തിന്റെ സാമൂഹിക-സാംസ്‌കാരിക-വിദ്യാഭ്യാസ മേഖലകളില്‍ മാതൃകാപരമായ സംഭാവനകള്‍ നല്‍കിയ ജില്ലയാണ് മലപ്പുറം. മതസൗഹാര്‍ദ്ദത്തിലും ജീവകാരുണ്യ പ്രവര്‍ത്തനങ്ങളിലും മുന്‍പന്തിയില്‍ നില്‍ക്കുന്ന മലപ്പുറത്തുകാരെ അപമാനിക്കുന്നത് കേരളത്തിന്റെ മതേതര മനസ്സിനെ വെല്ലുവിളിക്കുന്നതിന് തുല്യമാണ്.

രാഷ്ട്രീയ ലാഭത്തിനുവേണ്ടി ഒരു ജില്ലയെ മുഴുവന്‍ താറടിച്ചു കാണിക്കുന്നത് ഒരു മുന്‍ ജനപ്രതിനിധിക്ക് ഭൂഷണമല്ല. പ്രസ്താവന ഉടന്‍ പിന്‍വലിച്ച് മലപ്പുറം ജനതയോട് പരസ്യമായി മാപ്പു പറയാന്‍ അദ്ദേഹം തയാറാകണമെന്ന് ജിദ്ദ മലപ്പുറം ജില്ലാ കെ.എം.സി.സി ആവശ്യപ്പെടുന്നു.

മലപ്പുറത്തിന്റെ അഭിമാനം കാത്തുസൂക്ഷിക്കാന്‍ പ്രവാസ ലോകത്തും ശക്തമായ പ്രതിഷേധ പരിപാടികളുമായി മുന്നോട്ടുപോകുമെന്ന് ഭാരവാഹികളായ പ്രസിഡന്റ് സി.എം. ഇസ്മായില്‍ മുണ്ടുപറമ്പും ജനറല്‍ സെക്രട്ടറി നാണി ഇസ്ഹാഖ് മാസ്റ്റര്‍ കോട്ടക്കലും അറിയിച്ചു.