ജിദ്ദ: മക്ക പ്രവിശ്യയിലുണ്ടായ വാഹനാപകടത്തില്‍ നഴ്‌സുമാരായ രണ്ട് മലയാളികള്‍ ഉള്‍പ്പെടെ അഞ്ച് പേര്‍ മരിച്ചു. കോട്ടയം സ്വദേശികളായ രണ്ട് നഴ്സുമാരും തമിഴ്നാട് സ്വദേശികളായ രണ്ട് നഴ്സുമാരും ഒരു സൗദി പൗരനുമാണ് അപകടത്തില്‍ മരണപ്പെട്ടത്.
കോട്ടയം, പാല സ്വദേശിനി ജെയ്സിമോള്‍ മാത്യു (46), കോട്ടയം, കുരുമുള്ളൂര്‍ ആനച്ചേരി അഞ്ചക്കുന്നേല്‍ ജോബിന ജോണ്‍ (26), തമിഴ്നാട്, തിരുച്ചിറപ്പിള്ളി സ്വദേശിനി ദേവമ്മ ഹെപ്സിബ (33), തമിഴ്നാട്, ചെന്നൈ സ്വദേശി വിജയലക്ഷ്മി എന്നിവരാണ് മരിച്ചത്. ഒപ്പം വാഹനമോടിച്ചിരുന്ന സൗദി പൗരനും അപകടത്തില്‍ ജീവന്‍ നഷ്ടമായി.
മക്കയിലെ അല്‍ഗഫയിലുള്ള സൗദി സര്‍ക്കാര്‍ ഡിസ്പന്‍സറികളില്‍ നഴ്സുമാരായി ജോലി ചെയ്യുന്നവരാണ് അപതടത്തില്‍പ്പെട്ട നഴ്‌സുമാര്‍. അവധി ദിനമായതിനാല്‍ ആവശ്യ സാധനങ്ങള്‍ വാങ്ങുന്നതിനായി റാനിയയിലേക്ക് പോയതായിരുന്നു സംഘം. ഇതിനിടയില്‍ ഇവര്‍ സഞ്ചരിച്ച വാഹനം മറ്റ് വാഹനങ്ങളുമായി കൂട്ടിയിടിച്ചാണ് അപകം.
നിലവില്‍ സൗദിയിലുള്ള ബന്ധുക്കള്‍ സംഭവസ്ഥലത്തേക്ക് എത്തിക്കൊണ്ടിരിക്കുകയാണ്. മരിച്ച ഇന്ത്യന്‍ പൗരന്മാരുടെ ഭൗതികശ്രരീരങ്ങള്‍ എത്രയും പെട്ടെന്ന് നാട്ടിലെത്തിക്കാനുള്ള ഔദ്യോഗിക നടപടികളും ശ്രമങ്ങളും ഇതിനോടകം ആരംഭിച്ചിട്ടുണ്ട്.
വ്യാഴാഴ്ച തായിഫ് - റിയാദ് ഹൈവേയില്‍ ഉണ്ടായ റോഡപകടത്തില്‍ അഞ്ച് സ്‌കൂള്‍ അധ്യാപികമാരും അവര്‍ സഞ്ചരിച്ച വാഹനത്തിന്റെ ഡ്രൈവറും മരിച്ചിരുന്നു. മക്ക മേഖലയിലെ അല്‍ മുവൈഹ് ഗവര്‍ണറേറ്റിന് വടക്കുപടിഞ്ഞാറുള്ള ഹൈലാന്‍ എലിമെന്ററി ആന്‍ഡ് ഇന്റര്‍മീഡിയറ്റ് സ്‌കൂളിലേക്ക് യാത്ര ചെയ്യുക യായിരുന്ന അധ്യാപികമാരുടെ വാഹനമാണ് റദ്വാന്‍ എന്ന സ്ഥലത്ത് വെച്ച് നിയന്ത്രണം വിട്ട് മറ്റൊരു കാറുമായി കൂട്ടിയിടിച്ച് അപകടത്തില്‍പെട്ടത്. ഡ്രൈവര്‍ സംഭവ സ്ഥലത്തു വെച്ചും മറ്റുള്ളവര്‍ ആശുപത്രിയില്‍ വെച്ചുമാണ് മരിച്ചത്. മരിച്ചവരില്‍ ഒരു അധ്യാപിക ഗര്‍ഭിണിയായിരുന്നുവെന്ന് ബന്ധുക്കള്‍ അറിയിച്ചു. അപകടത്തില്‍ പ്പെട്ട രണ്ടാമത്തെ വാഹനത്തിലെ ഡ്രൈവര്‍ പരിക്കുകളോടെ രക്ഷപ്പെട്ടു.
.jpg)
Related News
