ജിദ്ദ: 'ബി ഇന്‍ ബി മോര്‍' (Be in B More) എന്ന പ്രമേയത്തില്‍ നടന്നുകൊണ്ടിരിക്കുന്ന രിസാല സ്റ്റഡി സര്‍ക്കിള്‍ മെമ്പര്‍ഷിപ്പ് കാമ്പയിന്റെ ഭാഗമായി ജിദ്ദയില്‍ മുന്‍കാല നേതൃസംഗമം 'ലെഗസി മീറ്റ്' നടന്നു.
മുപ്പത് രാജ്യങ്ങളില്‍ പ്രവര്‍ത്തിക്കുന്ന ആര്‍.എസ്.സി, ജിദ്ദയില്‍ രൂപം കൊണ്ടതും വിവിധ കാലഘട്ടങ്ങളിലൂടെ വിപുലമായ വളര്‍ച്ച കൈവരിച്ചതുമായ ചരിത്രവഴികള്‍ സംഗമം പങ്കുവെച്ചു. സാമൂഹിക, സാംസ്‌കാരിക, വൈജ്ഞാനിക, വിദ്യാഭ്യാസ രംഗങ്ങളില്‍ യുവാക്കളെയും വിദ്യാര്‍ത്ഥികളെയും ഉന്നതിയിലേക്ക് നയിക്കാന്‍ സംഘടന നടത്തിയ മാതൃകാപരമായ ഇടപെടലുകള്‍ യോഗം അനുസ്മരിച്ചു. ഹജ്ജ് വളണ്ടിയര്‍ സേവനങ്ങള്‍, സാഹിത്യോത്സവ്, നോട്ടെക്, തര്‍തീല്‍, സ്റ്റുഡന്റ്‌സ് ഫോക്കസ് പ്രോഗ്രാമുകള്‍ തുടങ്ങിയ ശ്രദ്ധേയമായ പദ്ധതികളും ചടങ്ങില്‍ ചര്‍ച്ചാവിഷയമായി.
പുതിയ തലമുറയുടെ താല്പര്യങ്ങളും കാലഘട്ടത്തിന്റെ മാറ്റങ്ങളും ഉള്‍ക്കൊണ്ട് കൂടുതല്‍ മികവോടെ സംഘടനാ പ്രവര്‍ത്തനങ്ങള്‍ സജീവമാക്കണമെന്ന് സംഗമം അഭിപ്രായപ്പെട്ടു.
നൗഫല്‍ മുസ്ലിയാര്‍ അധ്യക്ഷത വഹിച്ച ചടങ്ങില്‍ ഉമൈര്‍ മുണ്ടോളി സ്വാഗതം പറഞ്ഞു. ആര്‍.എസ്.സി ഗ്ലോബല്‍ ചെയര്‍മാന്‍ ഫൈസല്‍ ബുഖാരി (യു.എ.ഇ.) മുഖ്യാതിഥിയായിരുന്നു. അബ്ദുല്‍ നാസര്‍ അന്‍വരി, മുഹ്‌സിന്‍ സഖാഫി, സുജീര്‍ പുത്തന്‍പള്ളി, ഖലീല്‍ കൊളപ്പുറം, മന്‍സൂര്‍ മാസ്റ്റര്‍ മണ്ണാര്‍ക്കാട്, സാദിഖ് ചാലിയാര്‍, ഉസ്മാന്‍ മറ്റത്തൂര്‍, നൗഫല്‍ എറണാകുളം, താജുദ്ദീന്‍ നിസാമി തുടങ്ങിയ പ്രമുഖര്‍ ചടങ്ങില്‍ സംബന്ധിച്ചു.
