ന്യൂഡല്‍ഹി: ഏതു വിഷയവും ഹിന്ദു-മുസ്ലിം പ്രശ്നമാക്കി മാറ്റി വര്‍ഗീയവല്‍ക്കരിക്കുന്ന ബി.ജെ.പി നയത്തെ രൂക്ഷമായി വിമര്‍ശിച്ച് കോക്ക്റോച്ച് ജനതാ പാര്‍ട്ടി. പുരുഷാധിപത്യത്തെ തകര്‍ക്കുക (സ്മാഷ് ദ പാട്രിയാര്‍ക്കി) എന്ന കോണ്‍ഗ്രസ് നേതാവ് രാഹുല്‍ ഗാന്ധിയുടെ പ്രചാരണത്തെ വര്‍ഗീയവല്‍ക്കരിക്കാനുള്ള കേന്ദ്ര പാര്‍ലമെന്ററി കാര്യ മന്ത്രി കിരണ്‍ റിജിജുവിന് മറുപടി പറയുകയാണ് കോക്രോച്ച് ജനത പാര്‍ട്ടി മുഖ്യ വക്താവ് സൗരവ് ദാസ്. പുരുഷാധിപത്യത്തെ എതിര്‍ക്കുന്ന സന്ദേശത്തെ ഹിന്ദു-മുസ്ലിം വിഷയമാക്കി മാറ്റാന്‍ ശ്രമിക്കുന്നത് എന്തിനാണെന്ന് അദ്ദേഹം ചോദിച്ചു.
'പുരുഷാധിപത്യത്തെ തകര്‍ക്കണമെന്ന ആശയത്തെ എങ്ങനെ എതിര്‍ക്കാന്‍ കഴിയും? എന്തിനാണ് ഇത് ഹിന്ദു-മുസ്ലിം വിഷയമാക്കാന്‍ ശ്രമിക്കുന്നത്?' എക്സില്‍ അദ്ദേഹം കുറിച്ചു.
റിജിജു മുമ്പ് വിദ്യാര്‍ഥി പ്രതിഷേധങ്ങളുമായി ബന്ധപ്പെട്ട് നടത്തിയതായി റിപ്പോര്‍ട്ട് ചെയ്യപ്പെട്ട ചില പരാമര്‍ശങ്ങളെയും ദാസ് വിമര്‍ശിച്ചു. പ്രതിഷേധത്തിനിടെ വിദ്യാര്‍ഥികള്‍ മരിച്ചിട്ടില്ലെന്നും വെടിയൊച്ച ഉണ്ടായിട്ടില്ലെന്നും മന്ത്രി പറഞ്ഞതായി ചൂണ്ടിക്കാട്ടിയാണ് അദ്ദേഹത്തിന്റെ പ്രതികരണം. ന്യൂനപക്ഷ വിരുദ്ധ രാഷ്ട്രീയം അവസാനിപ്പിച്ച് വിദ്യാഭ്യാസം, ആരോഗ്യം, റോഡുകള്‍, കുടിവെള്ളം, വായു മലിനീകരണം, ഭക്ഷ്യസുരക്ഷ തുടങ്ങിയ ജനജീവിതവുമായി ബന്ധപ്പെട്ട വിഷയങ്ങളില്‍ ശ്രദ്ധ കേന്ദ്രീകരിക്കണമെന്നും ദാസ് ആവശ്യപ്പെട്ടു.
സ്ത്രീകളുടെ അവകാശങ്ങളെക്കുറിച്ച് സംസാരിക്കുമ്പോള്‍ ഹിന്ദു സമൂഹത്തെ മാത്രം രാഹുല്‍ ഗാന്ധി ലക്ഷ്യമിടുന്നുവെന്നായിരുന്നു റിജിജു ആരോപിച്ചത്. മുത്തലാഖ് പോലുള്ള മുസ്ലിം വിഷയങ്ങള്‍ രാഹുല്‍ ഗാന്ധി ഉയര്‍ത്തുന്നില്ലെന്നായിരുന്നു കുറ്റപ്പെടുത്തല്‍.
പൂനെയില്‍ നടന്ന ഛാത്രോന്‍ കി ഗൂഞ്ച്'പരിപാടിയിലാണ് രാഹുല്‍ ഗാന്ധി സ്ത്രീകള്‍ സ്വന്തം വ്യക്തിത്വത്തിന്റെയും അവകാശങ്ങളുടെയും ഉടമകളാണെന്നും പുരുഷാധിപത്യ മനോഭാവം സ്ത്രീകളെ നിയന്ത്രിക്കുകയും ഭയപ്പെടുത്തുകയും ചെയ്യുന്നുവെന്നും പറഞ്ഞത്. 'നമ്മള്‍ ഒരുമിച്ച് ഈ പുരുഷാധിപത്യ വ്യവസ്ഥയെ തകര്‍ക്കണം' എന്നായിരുന്നു അദ്ദേഹത്തിന്റെ ആഹ്വാനം. സ്ത്രീകളെ പുരുഷന്മാരുടെ നിയന്ത്രണത്തിലാക്കുന്ന മനുസ്മൃതിയിലെ ആശയങ്ങളെയും അദ്ദേഹം ശക്തമായി വിമര്‍ശിച്ചിരുന്നു.