കുരുക്ഷേത്ര: ഹരിയാനയിലെ കരുക്ഷേത്ര പെഹോവ റോഡിലെ രാജ് പാലസിന് സമീപം 40-കാരനെ ഭാര്യ കുത്തിക്കൊലപ്പെടുത്തി. കൃത്യത്തിനു ശേഷം വീടിന്റെ ടെറസില്‍ നിന്ന് താഴേക്ക് ചാടിയ ഭാര്യയെ പരിക്കുകളോടെ പോലീസ് കസ്റ്റഡിയിലെടുത്തു.

ഉത്തര്‍പ്രദേശിലെ സിതാപൂര്‍ സ്വദേശിയായ രാജേഷ് ആണ് കൊല്ലപ്പെട്ടത്. കഴിഞ്ഞ ഒരു വര്‍ഷമായി ഭാര്യ വിമല ദേവിക്കൊപ്പം കുരുക്ഷേത്രയില്‍ താമസിച്ചു വരികയായിരുന്ന രാജേഷ്, പെഹോവ റോഡിലെ വാട്ടര്‍ സപ്ലൈ കമ്പനിയില്‍ ജീവനക്കാരനായിരുന്നു. ശനിയാഴ്ച വൈകുന്നേരം അഞ്ചു മണിയോടെ ദമ്പതികള്‍ തമ്മില്‍ വഴക്കുണ്ടാകുന്നത് കേട്ട് മുകളിലെ നിലയിലെത്തിയ വീട്ടുടമ റിങ്കുവാണ് രക്തത്തില്‍ കുളിച്ചുകിടക്കുന്ന രാജേഷിനെ കണ്ടത്. വയറ്റില്‍ ഗുരുതരമായി പരിക്കേറ്റ രാജേഷിന്റെ പുറത്തുവന്ന കുടലുകള്‍ കവറിലാക്കാന്‍ ശ്രമിക്കുകയായിരുന്ന വിമല, ആളെ കണ്ടതോടെ കെട്ടിടത്തിന് മുകളില്‍ നിന്ന് ചാടുകയായിരുന്നുവെന്ന് പോലീസ് പറഞ്ഞു.

സംഭവസ്ഥലത്തുനിന്നും വിവിധ വലുപ്പത്തിലുള്ള മൂന്ന് കത്തികള്‍ പോലീസ് കണ്ടെടുത്തു. തുടര്‍ന്ന് നടത്തിയ പോസ്റ്റ്മോര്‍ട്ടത്തിലാണ് ദാരുണമായ കൊലപാതകത്തിന്റെ വിവരങ്ങള്‍ പുറത്തുവന്നത്. രാജേഷിന്റെ വയര്‍ 35 സെന്റീമീറ്ററോളം ആഴത്തില്‍ മുറിച്ച നിലയിലായിരുന്നു. ആന്തരിക അവയവങ്ങള്‍ക്ക് ഗുരുതരമായ പരിക്കേല്‍ക്കുകയും കരളിന്റെ വലിയൊരു ഭാഗവും വലത് വൃക്കയും കാണാതായതായും പോസ്റ്റ്മോര്‍ട്ടം റിപ്പോര്‍ട്ടില്‍ പറയുന്നു.

വീഴ്ചയില്‍ പരിക്കേറ്റ വിമല നിലവില്‍ പോലീസ് കസ്റ്റഡിയില്‍ ചികിത്സയിലാണ്. കൊലപാതകത്തിലേക്ക് നയിച്ച കാരണത്തെക്കുറിച്ചും പശ്ചാത്തലത്തെക്കുറിച്ചും പോലീസ് അന്വേഷണം തുടരുകയാണ്.