റിയാദ്: സാമ്പത്തികമായി പ്രയാസമനുഭവിക്കുന്ന റിയാദിലെ പ്രവാസികള്‍ക്കായി സൗജന്യ ഉംറ പദ്ധതി പ്രഖ്യാപിച്ച് ഇന്ത്യന്‍ കള്‍ച്ചറല്‍ ഫൗണ്ടേഷന്‍ (ഐ.സി.എഫ്) റിയാദ്. സംഘടനയുടെ ഉംറ വിങ് ആയ 'അല്‍ ഖുദ്‌സ് ഉംറ സര്‍വീസ്' വഴിയാണ് അര്‍ഹരായ 50 പേര്‍ക്ക് ഈ സൗകര്യം നല്‍കുന്നത്. മദീനാ സിയാറത്തും വിശുദ്ധ ഉംറയും ആഗ്രഹിക്കുകയും എന്നാല്‍ സാമ്പത്തിക പരിമിതികള്‍ കാരണം സാധ്യമാകാതിരിക്കുകയും ചെയ്യുന്ന പ്രവാസികള്‍ക്കാണ് ഈ സേവനം ലഭ്യമാക്കുന്നത്. ഓഗസ്റ്റ് 15 മുതല്‍ സെപ്റ്റംബര്‍ 15 വരെയുള്ള കാലയളവില്‍ യാത്ര, താമസം എന്നിവയുള്‍പ്പെടെയുള്ള സൗകര്യങ്ങള്‍ പൂര്‍ണമായും സൗജന്യമായിരിക്കും.

മുന്‍ വര്‍ഷങ്ങളിലും അല്‍ ഖുദ്‌സ് ഉംറ സര്‍വീസിന്റെ നേതൃത്വത്തില്‍ സമാനമായ ജീവകാരുണ്യ പ്രവര്‍ത്തനങ്ങള്‍ സംഘടിപ്പിച്ചിരുന്നു. പ്രവാസി സമൂഹത്തിലും നാട്ടിലുമായി വിവിധ സാന്ത്വന മേഖലകളില്‍ മാതൃകാപരമായ പ്രവര്‍ത്തനങ്ങള്‍ നടത്തിവരുന്ന ഐ.സി.എഫ്, ആത്മീയ ആഗ്രഹങ്ങളുള്ള മനുഷ്യരെ ചേര്‍ത്തുപിടിക്കുന്നതിന്റെ ഭാഗമായാണ് ഇത്തരം പദ്ധതികള്‍ തുടരുന്നതെന്ന് ഭാരവാഹികള്‍ അറിയിച്ചു.

വിശദവിവരങ്ങള്‍ക്ക് താഴെപ്പറയുന്ന നമ്പറുകളില്‍ ബന്ധപ്പെടാവുന്നതാണ്: 055 992 1889, 056 754 1900.