ജിസാന്‍ - ജിസാന്‍ മേഖലയിലെ ഏറ്റവും സവിശേഷമായ ടൂറിസ്റ്റ് പാതകളിലൊന്നായി പ്രശസ്തി നേടുകയാണ് 'അല്‍-ഹിജ' പാത. അല്‍-ആര്‍ദ, ഫൈഫ എന്നീ രണ്ട് പ്രധാന ഗവര്‍ണറേറ്റുകളെ തമ്മില്‍ ബന്ധിപ്പിക്കുന്ന ഈ റോഡ്, താഴ്വരകളില്‍ നിന്നും ഗ്രാമങ്ങളില്‍ നിന്നും ആരംഭിച്ച് കുന്നിന്‍നിരകളുടെ മുകളിലേക്ക് നീളുന്ന വേറിട്ടൊരു യാത്രാനുഭവമാണ് സഞ്ചാരികള്‍ക്ക് സമ്മാനിക്കുന്നത്.
അല്‍-ആര്‍ദ ഗവര്‍ണറേറ്റിലെ അല്‍-സയ്യാബ, അല്‍-ദഖീഖ എന്നീ ഗ്രാമങ്ങളിലൂടെ കടന്നുപോകുന്ന ഈ പാതയ്ക്ക് ഏകദേശം 20 കിലോമീറ്റര്‍ നീളമുണ്ട്. തുടര്‍ന്ന് ഇത് ഫൈഫ ഗവര്‍ണറേറ്റിലെ അല്‍-ഹൈജ മേഖലയില്‍ ചെന്നെത്തുന്നു.
മലനിരകള്‍, താഴ്വരകള്‍, കൃഷിയിടങ്ങള്‍ എന്നിവ ഉള്‍പ്പെടുന്നതാണ് ഈ പാതയിലെ ഭൂപ്രകൃതി.
റോഡിനിരുവശവുമുള്ള തോട്ടങ്ങളും മരങ്ങളും ഈ വഴിക്കൊരു പ്രകൃതിദത്തമായ ഗ്രാമീണ ഭംഗി നല്‍കുന്നു. മഴക്കാലത്ത് സസ്യജാലങ്ങള്‍ കൂടുതല്‍ പച്ചപ്പോടെ ഇടതൂര്‍ന്നു വളരുമ്പോള്‍, ലക്ഷ്യസ്ഥാനത്ത് എത്തുന്നതിന് മുമ്പുതന്നെയുള്ള ഈ യാത്ര സന്ദര്‍ശകരുടെ വിനോദസഞ്ചാര അനുഭവത്തിന്റെ അവിഭാജ്യ ഘടകമായി മാറുന്നു. ജിസാനിലെ രണ്ട് പ്രശസ്തമായ ഗവര്‍ണറേറ്റുകളെ തമ്മില്‍ ബന്ധിപ്പിക്കുന്നു എന്നതിനേക്കാളുപരി, മികച്ച വിനോദസഞ്ചാര മൂല്യമാണ് ഈ റോഡിനുള്ളത്.
ഓഗസ്റ്റ് മാസത്തില്‍ ജിസാന്‍ മേഖലയില്‍ ലഭിക്കുന്ന വേനല്‍മഴ ഈ പാതയുടെ ഭംഗി ഇരട്ടിയാക്കുന്നു. മഴയോടെ മലഞ്ചെരുവുകള്‍ പച്ചപ്പണിയുകയും പുതിയ സസ്യജാലങ്ങള്‍ തളിര്‍ക്കുകയും ചെയ്യുന്നത് ട്രെക്കിംഗ് പ്രേമികളെയും ഫോട്ടോഗ്രാഫര്‍മാരെയും ഇവിടേക്ക് ആകര്‍ഷിക്കുന്നു. വേനലവധിക്കാലത്ത് താഴ്വരകളില്‍ ചൂടുള്ളപ്പോള്‍ കുന്നിന്‍പ്രദേശങ്ങളില്‍ അനുഭവപ്പെടുന്ന സുഖകരമായ തണുത്ത കാലാവസ്ഥ ഈ യാത്രയെ കൂടുതല്‍ ആനന്ദദായകമാക്കുന്നു.
.jpg)
