പട്‌ന: ശ്രാവണ മാസത്തിലെ (സാവന്‍) തിരക്കിനിടയില്‍ ബിഹാറിലെ ലഖിസരായിയിലുള്ള പ്രശസ്തമായ അശോക്ധാം ക്ഷേത്രത്തിലുണ്ടായ തിക്കിലും തിരക്കിലും പെട്ട് 7 പേര്‍ ദാരുണമായി കൊല്ലപ്പെട്ടു. നിരവധി പേര്‍ക്ക് പരിക്കേറ്റിട്ടുണ്ട്. തിങ്കളാഴ്ച രാവിലെയാണ് നാടിനെ ഞെട്ടിച്ച ഈ ദുരന്തം ഉണ്ടായത്. പവിത്രമായ ശ്രാവണ മാസത്തിലെ മൂന്നാമത്തെ തിങ്കളാഴ്ചയായ (സോംവാരി) ഇന്ന്, മഹാശിവന് ജലാഭിഷേകം നടത്താനും പ്രാര്‍ത്ഥനകള്‍ അര്‍പ്പിക്കാനുമായി ആയിക്കണക്കിന് ഭക്തരാണ് ക്ഷേത്രത്തില്‍ തടിച്ചുകൂടിയിരുന്നത്.

രാവിലെ 6:45 ഓടെ അപ്രതീക്ഷിതമായി വന്‍ ജനക്കൂട്ടം ക്ഷേത്രത്തിലേക്ക് ഇരച്ചെത്തുകയായിരുന്നുവെന്ന് ലഖിസരായി ജില്ലാ മജിസ്‌ട്രേറ്റ് ശൈലേന്ദ്ര കുമാര്‍ വ്യക്തമാക്കി. 'വലിയ രീതിയിലുള്ള ജനക്കൂട്ടത്തെ ഞങ്ങള്‍ പ്രതീക്ഷിച്ചിരുന്നു, അതനുസരിച്ചുള്ള ക്രമീകരണങ്ങളും ചെയ്തിരുന്നു. എന്നാല്‍ രാവിലെ 6:30-ഓടെ രണ്ട് തീവണ്ടികള്‍ കൂടി എത്തിയതോടെ ജനത്തിരക്ക് ക്രമാതീതമായി വര്‍ദ്ധിച്ചു. തിരക്ക് കാരണം ബാരിക്കേഡുകള്‍ തകരുകയും ആളുകള്‍ പരസ്പരം വീഴുകയുമായിരുന്നു,' അദ്ദേഹം മാധ്യമങ്ങളോട് പറഞ്ഞു.

ഈ അപകടം ക്ഷേത്രപരിസരത്ത് വലിയ പരിഭ്രാന്തിയും അടിയന്തര സാഹചര്യവും സൃഷ്ടിച്ചു. പരിക്കേറ്റവരെല്ലാം സ്ത്രീകളാണെന്നാണ് റിപ്പോര്‍ട്ട്. ഇതില്‍ പലരുടെയും നില ഗുരുതരമാണ്. പരിക്കേറ്റ എല്ലാവരെയും അടിയന്തരമായി ലഖിസരായി സദര്‍ ആശുപത്രിയില്‍ പ്രവേശിപ്പിച്ചു. സംഭവമറിഞ്ഞ ഉടന്‍ തന്നെ ജില്ലാ ഭരണാധികാരികളും ആരോഗ്യ വകുപ്പ് ഉദ്യോഗസ്ഥരും സ്ഥലത്തെത്തി രക്ഷാപ്രവര്‍ത്തനങ്ങള്‍ക്കും വൈദ്യസഹായത്തിനും നേതൃത്വം നല്‍കി.

നിലവിലെ സാഹചര്യം അധികൃതര്‍ കര്‍ശനമായി നിരീക്ഷിച്ചു വരികയാണ്. ക്ഷേത്രപരിസരത്ത് ക്രമസമാധാനനില നിലനിര്‍ത്താനും ജനക്കൂട്ടത്തെ നിയന്ത്രിക്കാനുമുള്ള മുന്‍കരുതല്‍ നടപടികള്‍ സ്വീകരിച്ചിട്ടുണ്ട്.