ദമ്മാം: സുരക്ഷിതമായ ജലവിതരണ രീതികള്‍ ഉറപ്പാക്കുന്നതിനും ചട്ടങ്ങള്‍ പാലിക്കുന്നുണ്ടെന്ന് ഉറപ്പു വരുത്തുന്നതിനുമായി സൗദി വാട്ടര്‍ അതോറിറ്റി ദമ്മാമില്‍ വാട്ടര്‍ ടാങ്കറുകള്‍ ലക്ഷ്യമിട്ട് പരിശോധനാ ബോധവല്‍ക്കരണ ക്യാമ്പെയിന്‍ നടത്തി. ആവശ്യമായ ലൈസന്‍സില്ലാതെ പ്രവര്‍ത്തനം നടത്തിയ 13 നിയമലംഘനങ്ങള്‍ കണ്ടെത്തി. പങ്കെടുത്ത മൂന്ന് സര്‍ക്കാര്‍ വകുപ്പുകള്‍ അതത് അധികാരപരിധിയില്‍ നടത്തിയ പരിശോധനകളില്‍ ആകെ 55 നിയമലംഘനങ്ങളാണ് കണ്ടെത്തിയത്. ഇവര്‍ക്കെതിരെ നടപടികള്‍ ആരംഭിച്ചു.
കുടിവെള്ള ടാങ്കറുകളെയും അല്ലാത്തവയെയും ക്യാമ്പെയിന്‍ ലക്ഷ്യമിട്ടു. സുരക്ഷിതമായ ജലവിതരണം, പൊതുജനാോഗ്യം, പരിസ്ഥിതി സംരക്ഷണം എന്നിവയുമായി ബന്ധപ്പെട്ട മാനദണ്ഡങ്ങള്‍ ഓപ്പറേറ്റര്‍മാര്‍ പാലിക്കുന്നുണ്ടോ എന്നും അതോറിറ്റി പരിശോധിച്ചു. ഉപയോക്താക്കള്‍ക്ക് സുരക്ഷിതവും വിശ്വസനീയവുമായ സേവനങ്ങള്‍ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.
ജലവിതരണ സേവനങ്ങളുടെ വിശ്വാസ്യത വര്‍ദ്ധിപ്പിക്കാനും റോഡ് സുരക്ഷ മെച്ചപ്പെടുത്താനും റഗുലേറ്ററി ആവശ്യകതകളെക്കുറിച്ച് ഓപ്പറേറ്റര്‍മാരില്‍ അവബോധം വളര്‍ത്താനുമുള്ള സംയുക്ത സര്‍ക്കാര്‍ ശ്രമങ്ങളുടെ ഭാഗമായാണ് ഈ കാമ്പെയിന്‍ സംഘടിപ്പിച്ചത്.
പരിശോധനാ കാമ്പെയിനുകള്‍ തുടരുമെന്ന് അതോറിറ്റി വ്യക്തമാക്കി. ഉപയോക്താക്കളുടെ അവകാശങ്ങള്‍ സംരക്ഷിക്കുന്നതിനും ജലത്തിന്റെ സുരക്ഷിതവും ഉയര്‍ന്ന ഗുണനിലവാരമുള്ളതുമായ ഗതാഗതം ഉറപ്പാക്കുന്നതിനും ആരോഗ്യ-പാരിസ്ഥിതിക അപകടസാധ്യതകള്‍ കുറയ്ക്കുന്നതിനുമായി വാട്ടര്‍ ട്രാന്‍സ്‌പോര്‍ട്ട് ഓപ്പറേറ്റര്‍മാര്‍ ആവശ്യമായ ലൈസന്‍സുകള്‍ നേടണമെന്നും അംഗീകൃത വ്യവസ്ഥകള്‍ പാലിക്കണമെന്നും അധികൃതര്‍ അഭ്യര്‍ത്ഥിച്ചു.
Related News
