തിരുവനന്തപുരം: കനത്ത മഴയിലും വെള്ളപ്പൊക്കത്തിലും വലയുന്ന നാട്ടില്‍ അധികൃതരുടെ ജാഗ്രതാ നിര്‍ദേശങ്ങള്‍ ജനങ്ങള്‍ പാലിക്കാത്തത് ആശങ്ക ഉയര്‍ത്തുന്നു. കഴുത്തോളം വെള്ളം കയറിയിട്ടും പലരും വീടുകളില്‍നിന്ന് മാറാന്‍ തയാറാകുന്നില്ല. രണ്ടു നില വീടുകളുടെ മുകള്‍നിലയില്‍ സുരക്ഷിതരാണെന്ന വിശ്വാസത്തിലാണ് പലരും.

പത്തനംതിട്ട ജില്ലയിലാണ് ഏറ്റവും രൂക്ഷമായ സാഹചര്യം. ആറന്മുള മേഖലയില്‍ വെള്ളപ്പൊക്കം അതീവ രൂക്ഷമായി തുടരുകയാണ്. തിരുവനന്തപുരത്തുനിന്നും കൊല്ലത്തുനിന്നും എത്തിയ മത്സ്യത്തൊഴിലാളികളും ഫയര്‍ഫോഴ്സും ചേര്‍ന്നാണ് ഇവിടെ രക്ഷാപ്രവര്‍ത്തനം നടത്തുന്നത്. വൈദ്യുതിയില്ലാത്തത് ആശയവിനിമയത്തിന് തടസ്സമാകുന്നു. റാന്നി മേഖലയില്‍നിന്നുള്ള വെള്ളംകൂടി എത്തിയതോടെ ആറന്മുളയിലെ താഴ്ന്ന പ്രദേശങ്ങള്‍ പൂര്‍ണ്ണമായും ഒറ്റപ്പെട്ടു. ചെങ്ങന്നൂര്‍, ആറന്മുള, റാന്നി തുടങ്ങിയ പ്രദേശങ്ങളില്‍ പമ്പയിലെയും മണിമലയാറ്റിലെയും ജലനിരപ്പ് ഉയര്‍ന്നതോടെ താഴ്ന്ന പ്രദേശങ്ങളെല്ലാം വെള്ളപ്പൊക്കത്തിന്റെ കെടുതികള്‍ നേരിടുകയാണ്.

മലപ്പുറം പാണക്കാട് എടായിപ്പാലത്ത് നാടുകാണി സംസ്ഥാന പാതയില്‍ കുന്നിടിഞ്ഞു വീണു. ഇത് റിപ്പോര്‍ട്ട് ചെയ്യുകയായിരുന്ന മാധ്യമ സംഘത്തിലെ ടിവി ക്യാമറാമാന്‍ ജയേഷിന് പരിക്കേറ്റു. പ്രദേശത്തെ ഗതാഗതം നേരത്തെ നിയന്ത്രിച്ചിരുന്നതിനാല്‍ ദുരന്തം ഒഴിവായി. കുന്നിന്റെ താഴെ ഭാഗത്ത് മണ്ണെടുത്തതാണ് മണ്ണിടിച്ചിലിന് കാരണമായതെന്ന് ആരോപണമുണ്ട്.

കോഴിക്കോട് കണ്ണാടിക്കലില്‍ ഇരുനൂറിലധികം വീടുകളില്‍ വെള്ളം കയറി. ഫയര്‍ഫോഴ്സിന്റെയും കെ. ജയന്ത് എം.എല്‍.എയുടെയും നേതൃത്വത്തില്‍ ബോട്ടുകളുപയോഗിച്ച് ആളുകളെ ദുരിതാശ്വാസ ക്യാമ്പുകളിലേക്ക് മാറ്റുകയാണ്. മലയോര മേഖലകളില്‍ പെയ്ത മഴയാണ് നഗരപ്രദേശങ്ങളില്‍ വെള്ളപ്പൊക്കത്തിന് കാരണമായത്. കിടപ്പുരോഗികളെയും പ്രായമായവരെയും സുരക്ഷിത സ്ഥാനങ്ങളിലേക്ക് മാറ്റിയിട്ടുണ്ട്.

മൂവാറ്റുപുഴയിലും പാലായിലും വെള്ളക്കെട്ട് തുടരുകയാണ്. മൂവാറ്റുപുഴയിലെ ഇലാഹിയ നഗറില്‍ വെള്ളം ഇറങ്ങിയതിനെത്തുടര്‍ന്ന് വീട് വൃത്തിയാക്കി മടങ്ങിയവര്‍, വെള്ളം വീണ്ടും കയറിയതോടെ ക്യാമ്പുകളിലേക്ക് തന്നെ തിരിച്ചുപോയി. ഇവിടെ അഞ്ച് ക്യാമ്പുകളിലായി ഒട്ടേറെ കുടുംബങ്ങളെ താമസിപ്പിച്ചിട്ടുണ്ട്. പാലാ നഗരത്തിലും ജലനിരപ്പ് ഉയരുകയാണ്. പാലാ-കോട്ടയം റൂട്ടില്‍ ഗതാഗതം പൂര്‍ണ്ണമായും തടസ്സപ്പെട്ടു. വലിയ വാഹനങ്ങള്‍ മാത്രമാണ് ഇപ്പോള്‍ ഈ പാതയിലൂടെ കടന്നുപോകുന്നത്. മലയോര മേഖലകളില്‍ മഴ തുടരുന്നതിനാല്‍ ജലനിരപ്പ് ഇനിയും ഉയരാന്‍ സാധ്യതയുണ്ടെന്ന് നാട്ടുകാര്‍ ആശങ്കപ്പെടുന്നു.

10 ജില്ലകളില്‍ കേന്ദ്ര കാലാവസ്ഥ വകുപ്പ് ഓറഞ്ച് അലര്‍ട്ട് പ്രഖ്യാപിച്ചതോടെ ആശങ്ക വര്‍ധിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് ഓറഞ്ച് അലര്‍ട്ട്. അതിശക്തമായ മഴക്കുള്ള സാധ്യതയാണ് പ്രവചിച്ചിരിക്കുന്നത്.