റിയാദ്: സൗദിയിലെ അഴിമതി വിരുദ്ധ വിഭാഗമായ ഓവര്‍സൈറ്റ് ആന്റ് ആന്റി കറപ്ഷന്‍ അതോറിറ്റി (നസാഹ) ജൂലൈയില്‍ വിവിധ കേസുകളിലായി 131 പേരെ കസ്റ്റഡിയിലെടുത്തു. ജൂലൈയില്‍ നടത്തിയ 2,338 പരിശോധനകളില്‍ 430 വ്യക്തികള്‍ക്കെതിരെ അന്വേഷണം തുടങ്ങി.

ആഭ്യന്തരം, പ്രതിരോധം, വിദേശകാര്യം, ആരോഗ്യം, മുനിസിപ്പാലിറ്റികള്‍, ഭവനനിര്‍മ്മാണം തുടങ്ങിയ വിവിധ മന്ത്രാലയങ്ങളിലെ ഉദ്യോഗസ്ഥരും അന്വേഷണം നേരിടുന്നവരില്‍ ഉള്‍പ്പെടുന്നു.

അഴിമതി, ഔദ്യോഗിക പദവി ദുരുപയോഗം എന്നീ ആരോപണങ്ങളെ തുടര്‍ന്നാണ് ക്രിമിനല്‍ നടപടി നിയമപ്രകാരം സ്വദേശികളും വിദേശികളുമായ 131 പേരെ കസ്റ്റഡിയിലെടുത്തത്. ഇവരില്‍ ചിലരെ പിന്നീട് ജാമ്യത്തില്‍ വിട്ടയച്ചിട്ടുണ്ട്. പിടിക്കപ്പെട്ടവരെ കോടതിക്ക് കൈമാറുന്നതിന് മുന്നോടിയായുള്ള നിയമനടപടികള്‍ പൂര്‍ത്തിയായി വരികയാണ്.