റിയാദ്: മാസങ്ങളായി തുടരുന്ന പ്രതിസന്ധികള്‍ക്ക് ശേഷം മധ്യപൂര്‍വ്വേഷ്യന്‍ വ്യോമയാന മേഖലയില്‍ സ്ഥിരത കൈവരുന്നതിന്റെ ലക്ഷണങ്ങള്‍ കണ്ടുതുടങ്ങി. ജൂണ്‍ മാസത്തില്‍ മേഖലയിലെ ചരക്ക് ആവശ്യകതയില്‍ വലിയ മുന്നേറ്റമുണ്ടാവുകയും യാത്രാ രംഗത്തെ ഇടിവ് കുറയുകയും ചെയ്തതായി ഇന്റര്‍നാഷണല്‍ എയര്‍ ട്രാന്‍സ്‌പോര്‍ട്ട് അസോസിയേഷന്റെ (ഐ.എ.ടി.എ) പുതിയ കണക്കുകള്‍ വ്യക്തമാക്കുന്നു.

മേഖലയിലെ ഹബ് വിമാനത്താവളങ്ങള്‍ വഴിയുള്ള ഗതാഗതം ക്രമേണ പുനഃസ്ഥാപിക്കപ്പെട്ടതിനെ തുടര്‍ന്ന്, മധ്യപൂര്‍വ്വേഷ്യന്‍ എയര്‍ലൈനുകളിലെ അന്താരാഷ്ട്ര ചരക്ക് നീക്കം മുന്‍വര്‍ഷത്തെ അപേക്ഷിച്ച് ജൂണില്‍ 5.6 ശതമാനം വര്‍ധിച്ചു. മെയ് മാസത്തെ അപേക്ഷിച്ച് 14.5 ശതമാനത്തിന്റെ വന്‍ കുതിപ്പാണ് ഇതുവഴി ഉണ്ടായത്. പ്രദേശത്തെ സുരക്ഷാ സാഹചര്യങ്ങള്‍ പൂര്‍ണ്ണമായി സാധാരണ നിലയിലായിട്ടില്ലെങ്കിലും പ്രവര്‍ത്തനങ്ങള്‍ പുനരാരംഭിക്കാന്‍ കഴിഞ്ഞത് ചരക്ക് നീക്കത്തിന്റെ തിരിച്ചുവരവിന് കാരണമായതായി ഐ.എ.ടി.എ റിപ്പോര്‍ട്ടില്‍ വ്യക്തമാക്കുന്നു.

യാത്രാ രംഗത്തും കാര്യമായ പുരോഗതിയുണ്ടായി. മധ്യപൂര്‍വ്വേഷ്യന്‍ എയര്‍ലൈനുകളിലെ യാത്രാ ഗതാഗതം മുന്‍വര്‍ഷത്തെ അപേക്ഷിച്ച് 13.9 ശതമാനം കുറഞ്ഞെങ്കിലും, തൊട്ടുമുമ്പത്തെ മാസത്തെ 28.8 ശതമാനമെന്ന ഇടിവുമായി താരതമ്യം ചെയ്യുമ്പോള്‍ ഇത് വലിയൊരു മുന്നേറ്റമാണ്. 2025-ല്‍ 7.2 ബില്യണ്‍ ഡോളര്‍ ലാഭത്തിലായിരുന്ന മധ്യപൂര്‍വ്വേഷ്യന്‍ എയര്‍ലൈനുകള്‍, 2026-ല്‍ 4.3 ബില്യണ്‍ ഡോളര്‍ നഷ്ടത്തിലേക്ക് കൂപ്പുകുത്തുമെന്നാണ് ജൂണില്‍ ഐ.എ.ടി.എ കണക്കാക്കിയത്. ഉയര്‍ന്ന ഇന്ധനവിലയും പ്രാദേശിക തടസ്സങ്ങളുമാണ് വ്യോമയാന മേഖലയെ ബാധിക്കുന്നത്. ഹബ് വിമാനത്താവളങ്ങളിലൂടെയുള്ള കണക്ഷന്‍ ഫ്‌ലൈറ്റുകള്‍ നഷ്ടപ്പെടുന്നത് മേഖലയെ കൂടുതല്‍ പ്രതികൂലമായി ബാധിക്കുമെന്നും മുന്നറിയിപ്പുണ്ട്.

ആഗോളതലത്തില്‍ വ്യോമയാന ചരക്ക് ആവശ്യകതം ജൂണില്‍ ശക്തമായി തുടര്‍ന്നു. വ്യോമയാന മേഖലയിലെ മൊത്തത്തിലുള്ള ചരക്ക് ഗതാഗതം 8.5 ശതമാനം വര്‍ധിച്ചു. വടക്കേ അമേരിക്കയിലെ ശക്തമായ വളര്‍ച്ചയോടൊപ്പം മധ്യപൂര്‍വ്വേഷ്യന്‍ മേഖലയും തിരിച്ചുവരവിന്റെ പാതയിലായതാണ് ഇതിന് കാരണമെന്ന് ഐ.എ.ടി.എ അറിയിച്ചു. അന്താരാഷ്ട്ര ചരക്ക് ഗതാഗതം മൊത്തത്തില്‍ 9.6 ശതമാനം വളര്‍ച്ച രേഖപ്പെടുത്തി.

മിഡില്‍ ഈസ്റ്റ് - ഏഷ്യ ചരക്ക് ഗതാഗതത്തിലെ ഇടിവ് 4.1 ശതമാനമായി കുറഞ്ഞു (മെയ് മാസത്തേക്കാള്‍ 11.8 ശതമാനം മെച്ചപ്പെട്ടു). അതേസമയം, യൂറോപ്പ് - മിഡില്‍ ഈസ്റ്റ് റൂട്ട് ഏറ്റവും ദുര്‍ബലമായ വ്യാപാര പാതയായി തുടര്‍ന്നു; ഇവിടെ 41.1 ശതമാനത്തിന്റെ ഇടിവാണ് രേഖപ്പെടുത്തിയത്.

യാത്രക്കാരുടെ എണ്ണത്തിലുള്ള തിരിച്ചുവരവ് സാവധാനമാണെങ്കിലും അത് വ്യക്തമായി നടന്നുതുടങ്ങിയിട്ടുണ്ട്. മിഡില്‍ ഈസ്റ്റ് - വടക്കേ അമേരിക്ക റൂട്ട് ഏതാണ്ട് പഴയ നിലയിലേക്ക് തിരിച്ചെത്തിയിട്ടുണ്ട് (കഴിഞ്ഞ മാസം 28.3 ശതമാനം ഇടിവുണ്ടായിരുന്ന സ്ഥാനത്ത് ഇപ്പോള്‍ 1.9 ശതമാനമായി കുറഞ്ഞു).

വരും മാസങ്ങളില്‍ മധ്യപൂര്‍വ്വേഷ്യന്‍ മേഖലയിലെ വിമാന സീറ്റ് ലഭ്യത കുറയുന്നതിന്റെ തോത് കൂടുതല്‍ കുറയുമെന്നാണ് വിലയിരുത്തപ്പെടുന്നത്. ജൂലൈയില്‍ ഇത് 6.4 ശതമാനമായും ആഗസ്റ്റില്‍ 4.6 ശതമാനമായും കുറയുമെന്നും ഐ.എ.ടി.എ പ്രതീക്ഷിക്കുന്നു.