റിയാദ്: പരമ്പരാഗത കൃഷിരീതികള്‍ക്കൊപ്പം ആധുനിക സാങ്കേതികവിദ്യകളും കൂടിച്ചേര്‍ത്ത് സൗദി അറേബ്യയുടെ അസീര്‍ പ്രവിശ്യയിലെ മുന്തിരി വ്യവസായം വന്‍ വളര്‍ച്ചയിലേക്ക്. പ്രവിശ്യയിലെ അഞ്ഞൂറിലധികം ഫാമുകളില്‍ നിന്നായി പ്രതിവര്‍ഷം 1,000 ടണ്ണിലധികം മുന്തിരിയാണ് ഉത്പാദിപ്പിക്കുന്നത്. ഇത് പ്രാദേശിക വിപണിയുടെ ആവശ്യകത നിറവേറ്റുന്നതിനും ഭക്ഷ്യസുരക്ഷ ഉറപ്പാക്കുന്നതിനും വലിയ പിന്തുണയാകുന്നുണ്ട്. ഉത്പാദന രീതികളിലും ഗുണനിലവാരത്തിലും വന്ന പുരോഗതിയോടെ അസീര്‍ മുന്തിരിക്ക് വിപണിയില്‍ സ്വീകാര്യതയും വര്‍ധിച്ചിട്ടുണ്ട്.

സൗദി അറേബ്യയിലെ പ്രധാന മുന്തിരി ഉത്പാദന മേഖലകളിലൊന്നാണ് അസീര്‍. അബഹ നഗരത്തിന് ഏകദേശം 95 കിലോമീറ്റര്‍ വടക്കായി സ്ഥിതി ചെയ്യുന്ന അല്‍-മാവിന്‍ ആണ് ഇവിടുത്തെ പ്രധാന കൃഷി കേന്ദ്രം. റസ്ഖി , ഇറ്റാലിയന്‍, ഫ്രഞ്ച് തുടങ്ങി വിവിധ പ്രാദേശിക, വിദേശ ഇനങ്ങളിലുള്ള മുന്തിരികളാണ് ഇവിടെ കൃഷി ചെയ്യുന്നത്.

കഴിഞ്ഞ 25 വര്‍ഷത്തിലേറെയായി മുന്തിരി കൃഷി ചെയ്തുവരുന്ന അബ്ദുല്ല അല്‍-ഷഫ്‌ലോട്ട് എന്ന കര്‍ഷകന്‍, 1998-ല്‍ സര്‍ക്കാര്‍ പിന്തുണയോടെയാണ് കൃഷി ആരംഭിച്ചതെന്നും, പിന്നീട് 2014-ല്‍ ഇതൊരു സംയോജിത ഉത്പാദന പദ്ധതിയഅയി വികസിപ്പിച്ചതായും പറഞ്ഞു. അദ്ദേഹത്തിന്റെ ഫാമില്‍ നിലവില്‍ 1,125 മുന്തിരിവള്ളികളും മാതളം, അത്തിപ്പഴം, മള്‍ബറി, ചെറി, നാരകം, അറേബ്യന്‍ കാപ്പി എന്നിവയുള്‍പ്പെടെ ഏകദേശം 150 മരങ്ങളുമുണ്ട്.

അല്‍-മാവിന്‍ പ്രദേശത്തിന്റെ തനതു സവിശേഷതയാണ് മുന്തിരി കൃഷിയെന്നും, ഇവിടുത്തെ ചരിത്രപ്രസിദ്ധമായ കിണറുകള്‍ ഈ കാര്‍ഷിക പൈതൃകത്തെ വിളിച്ചോതുന്നുണ്ടെന്നും അല്‍-ഷഫ്‌ലോട്ട് വ്യക്തമാക്കി. ആധുനിക ഓട്ടോമേറ്റഡ് സംവിധാനങ്ങള്‍ വഴിയാണ് ജലസേചനവും വളപ്രയോഗവും നടത്തുന്നതെന്നും, വിളകളുടെ ഗുണനിലവാരം ഉറപ്പാക്കാന്‍ ദിവസേനയുള്ള നിരീക്ഷണവും സംയോജിത കീടനാശിനി പ്രയോഗവുമാണ് നടത്തുന്നതെന്നും അദ്ദേഹം കൂട്ടിച്ചേര്‍ത്തു.

ശീതകാലത്ത് പാടങ്ങള്‍ വൃത്തിയാക്കി കഴിഞ്ഞ വര്‍ഷത്തെ അവശിഷ്ടങ്ങള്‍ നീക്കം ചെയ്തുകൊണ്ടാണ് ഉത്പാദന ചക്രം ആരംഭിക്കുന്നത്. മാസങ്ങളോളം കമ്പോസ്റ്റ് ചെയ്ത ജൈവവളങ്ങളും, വളര്‍ച്ചാ ഘട്ടങ്ങളില്‍ ആവശ്യമായ സൂക്ഷ്മപോഷകങ്ങളും കാല്‍സ്യവും നല്‍കുന്നു. ആവശ്യമായ സൂര്യപ്രകാശവും വായുസഞ്ചാരവും ലഭിക്കുന്നതിനായി മെയ് മാസത്തില്‍ ഇലകള്‍ വെട്ടി ഒതുക്കുന്നു. തുടര്‍ന്ന് ജൂലൈയില്‍ ആരംഭിക്കുന്ന വിളവെടുപ്പ് രണ്ട് മാസത്തോളം നീണ്ടുനില്‍ക്കും.

ഈ ഫാമില്‍ മാത്രം പ്രതിവര്‍ഷം ഏകദേശം 5,000 തൈകള്‍ ഉത്പാദിപ്പിക്കുന്നുണ്ട്. കൃഷി ചെയ്യുന്ന ഇനങ്ങള്‍ പരിസ്ഥിതി, ജല, കൃഷി മന്ത്രാലയത്തില്‍ രജിസ്റ്റര്‍ ചെയ്തിട്ടുണ്ടെന്നും, പഴങ്ങളുടെ ഗുണനിലവാരവും സുരക്ഷയും മുന്‍നിര്‍ത്തിയാണ് ആധുനിക വിളവെടുപ്പ് രീതികള്‍ പിന്തുടരുന്നതെന്നും കര്‍ഷകര്‍ വ്യക്തമാക്കി.