പൂനൂര്‍: കേരളത്തിന്റെ വിവിധ ജില്ലകളിലുള്ള ഗായകരെയും ചാരിറ്റി പ്രവര്‍ത്തകരെയും ഉള്‍പ്പെടുത്തി രൂപീകരിച്ച 'സ്‌നേഹസമര്‍പ്പണം' ചാരിറ്റി വാട്‌സാപ്പ് കൂട്ടായ്മയുടെ ഉദ്ഘാടനം കട്ടിപ്പാറ-കോളിക്കല്‍ കാരുണ്യതീരം ക്യാമ്പസ് ഓഡിറ്റോറിയത്തില്‍ കൊടുവള്ളി എം.എല്‍.എ പി.കെ. ഫിറോസ് നിര്‍വഹിച്ചു.
കൊടുവള്ളി ബ്ലോക്ക് പഞ്ചായത്ത് മെമ്പര്‍ നുഷ്ഹത്ത് ടീച്ചറുടെ അധ്യക്ഷതയില്‍ നടന്ന ചടങ്ങില്‍, നിര്‍ധന രോഗികള്‍ക്കുള്ള ധനസഹായം എം.എല്‍.എയില്‍ നിന്നും ഗ്രൂപ്പ് ട്രഷറര്‍ ഷിഹാബ് മുറിയനാല്‍ ഏറ്റുവാങ്ങി. മാതൃകാ ചാരിറ്റി പ്രവര്‍ത്തകരും ഗ്രൂപ്പിന്റെ വളര്‍ച്ചയ്ക്ക് മികച്ച സംഭാവനകള്‍ നല്‍കിയവരുമായ നസീര്‍ മുറിയനാല്‍, എന്‍. അഹമ്മദ് കുട്ടി, എം.എ. ഖാദര്‍ മാസ്റ്റര്‍ എന്നിവരെ ചടങ്ങില്‍ ആദരിച്ചു.
പ്രതീക്ഷാഭവന്‍ ചെയര്‍മാന്‍ ഹക്കീം മാസ്റ്റര്‍, സൂപ്രണ്ടിംഗ് മാനേജര്‍ പാര്‍വതീഭായ്, പാലിയേറ്റീവ് പ്രവര്‍ത്തകന്‍ എന്‍. അഹമ്മദ് കുട്ടി മലോറം, ഗ്രൂപ്പ് ജോയിന്റ് സെക്രട്ടറി സാഹിറ തുടങ്ങിയവര്‍ ആശംസകള്‍ നേര്‍ന്നു. പ്രതീക്ഷാഭവനിലെ താമസക്കാരെ ചേര്‍ത്തുപിടിച്ചുകൊണ്ട്, സ്‌നേഹസമര്‍പ്പണത്തിലെ ഗായകരായ ഹസീബ് പൂനൂര്‍, അന്‍ഷാദ് മുക്കം, തന്‍ഹ തജ്മല്‍ എലത്തൂര്‍, സലീന എടപ്പാള്‍ എന്നിവരുടെ നേതൃത്വത്തില്‍ ചടങ്ങില്‍ ഗാനവിരുന്നൊരുക്കി. പരിപാടികളില്‍ പങ്കെടുത്ത എല്ലാവര്‍ക്കും ചായയും പലഹാരവും വിഭവസമൃദ്ധമായ ഉച്ചഭക്ഷണവും നല്‍കി. ഗ്രൂപ്പ് ചെയര്‍മാന്‍ എം.എ. ഖാദര്‍ മാസ്റ്റര്‍ പെരുമ്പള്ളി സ്വാഗതവും ജനറല്‍ സെക്രട്ടറി മുഹമ്മദ് ബഷീര്‍ കരിപ്പൂര്‍ നന്ദിയും രേഖപ്പെടുത്തി.
.jpg)
Related News
