ന്യൂഡല്‍ഹി: ജന്തര്‍മന്തറില്‍ 'കോക്ക്‌റോച്ച് ജനതാ പാര്‍ട്ടി'യുടെ (CJP) പ്രതിഷേധത്തിനിടയില്‍ പ്രധാനമന്ത്രി നരേന്ദ്ര മോദിയെ ലക്ഷ്യമിട്ട് പങ്കുവെച്ച അധിക്ഷേപകരമായ വീഡിയോകളും പോസ്റ്റുകളും നീക്കം ചെയ്യാന്‍ സോഷ്യല്‍ മീഡിയ പ്ലാറ്റ്ഫോമുകളോട് ആവശ്യപ്പെട്ട് ഡല്‍ഹി പൊലീസ്.

സോഷ്യല്‍ മീഡിയയില്‍ നിന്ന് അത്തരം ഉള്ളടക്കങ്ങള്‍ നീക്കം ചെയ്യുന്നതിനുള്ള നടപടികള്‍ തുടരുകയാണെന്ന് മുതിര്‍ന്ന പൊലീസ് ഉദ്യോഗസ്ഥന്‍ വ്യക്തമാക്കി. വിവിധ പ്ലാറ്റ്ഫോമുകളില്‍ അപ്ലോഡ് ചെയ്ത നിരവധി പോസ്റ്റുകള്‍ ഇതിനോടകം നീക്കം ചെയ്തിട്ടുണ്ട്. പ്രധാനമന്ത്രിക്കെതിരെ അധിക്ഷേപകരമായ ഭാഷയും അവഹേളനപരമായ പരാമര്‍ശങ്ങളും അടങ്ങിയ ഉള്ളടക്കങ്ങള്‍ നീക്കം ചെയ്യാന്‍ ആവശ്യപ്പെട്ട് മൂന്ന് സോഷ്യല്‍ മീഡിയ പ്ലാറ്റ്ഫോമുകള്‍ക്ക് നോട്ടീസ് നല്‍കിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

വ്യാജ ദൃശ്യങ്ങള്‍ പങ്കുവെച്ച അക്കൗണ്ടുകള്‍ക്കെതിരെ നടപടി

പ്രതിഷേധവുമായി ബന്ധപ്പെട്ട് ഡീപ്ഫേക്കുകളും കൃത്രിമ ബുദ്ധി (AI) ഉപയോഗിച്ച് നിര്‍മ്മിച്ചതുമായ ഉള്ളടക്കങ്ങള്‍ പങ്കുവെച്ച ഏകദേശം 450 സോഷ്യല്‍ മീഡിയ അക്കൗണ്ടുകള്‍ ഡല്‍ഹി പൊലീസ് കണ്ടെത്തിയിട്ടുണ്ട്. ഈ അക്കൗണ്ടുകള്‍ ബ്ലോക്ക് ചെയ്യാന്‍ അതത് സോഷ്യല്‍ മീഡിയ പ്ലാറ്റ്ഫോമുകള്‍ക്ക് ശുപാര്‍ശ ചെയ്തിട്ടുണ്ടെന്ന് ഉദ്യോഗസ്ഥന്‍ അറിയിച്ചു.

കേന്ദ്ര വിദ്യാഭ്യാസ മന്ത്രി ധര്‍മ്മേന്ദ്ര പ്രധാന്റെ രാജി ഉള്‍പ്പെടെയുള്ള ആവശ്യങ്ങള്‍ സര്‍ക്കാര്‍ അംഗീകരിച്ചതിനെ തുടര്‍ന്ന്, ശനിയാഴ്ച കോക്ക്‌റോച്ച് ജനതാ പാര്‍ട്ടി തങ്ങളുടെ 36 ദിവസത്തെ പ്രതിഷേധം അവസാനിപ്പിച്ചിരുന്നു. ജൂലൈ 20-ന് നടന്ന 'സന്‍സദ് ചലോ മാര്‍ച്ചിനിടെ' ഡല്‍ഹി പൊലീസ് ഉദ്യോഗസ്ഥരും വിദ്യാര്‍ത്ഥികളും തമ്മില്‍ ഏറ്റുമുട്ടല്‍ നടന്നിരുന്നു. സംഭവവുമായി ബന്ധപ്പെട്ട് ഡല്‍ഹി പൊലീസ് 15 എഫ്.ഐ.ആറുകള്‍ രജിസ്റ്റര്‍ ചെയ്തിരുന്നുവെങ്കിലും പിന്നീട് അവ പിന്‍വലിക്കാന്‍ തീരുമാനിക്കുകയായിരുന്നു. പാര്‍ലമെന്റിലേക്കുള്ള സമാധാനപരമായ പ്രതിഷേധ മാര്‍ച്ചില്‍ വല്ല ഗൂഢാലോചനയും നടന്നിട്ടുണ്ടോ എന്ന് ഡല്‍ഹി പൊലീസ് അന്വേഷിച്ചുവരികയാണ്.