റിയാദ്: ഈജിപ്ഷ്യൻ സംസ്കാരത്തിന്റെയും രുചിയുടെയും വിരുന്നൊരുക്കി സൗദി അറേബ്യയിലെ മുഴുവൻ ലുലു ഹൈപ്പർമാർക്കറ്റുകളിലും "ടേസ്റ്റ് ഓഫ് ഈജിപ്ത്" ഫെസ്റ്റിന് തുടക്കമായി.

റിയാദിലെ മുറബ്ബ ലുലു ഹൈപ്പർമാർക്കറ്റിൽ നടന്ന ചടങ്ങിൽ സൗദിയിലെ ഈജിപ്ത് അംബാസഡർ എച്ച്.ഇ. ഇഹാബ് അബു സ്രെയ് ഫെസ്റ്റിൻ്റെ ഒദ്യോഗിക ഉദ്ഘാനം നിർവ്വഹിച്ചു. ലുലു ഹൈപ്പർമാർക്കറ്റ് കെ.എസ്.എ ഡയറക്ടർ മുഹമ്മദ് ഹാരിസ് മറ്റ് ലുലു മാനേജ്മെന്റ് പ്രതിനിധികളും സന്നിഹിതരായിരുന്നു.

ഈജിപ്ഷ്യൻ ഭക്ഷ്യ ഉൽപ്പന്നങ്ങൾ, ഇറക്കുമതി ചെയ്ത ഫ്രെഷ് പഴം-പച്ചക്കറികൾ, ഈജിപ്റ്റിൻ്റെ തനത് രുചികൾ ആസ്വദിക്കാനുള്ള സ്റ്റാളുകൾ എന്നിവ അംബാസഡർ സന്ദർശിച്ചു. എട്രിയത്തിൽ നടന്ന വിപുലമായ ആഘോഷ പരിപാടികളുടെ ഭാഗമായി ഈജിപ്റ്റിൻ്റെ പരമ്പരാഗത തനൂറ നൃത്തമടക്കം അവതരിപ്പിച്ചു. ആഘോഷങ്ങൾക്ക് ഇരട്ടിമധുരം പകർന്ന് പിരമിഡ് മാതൃകയിൽ തയ്യാറാക്കിയ ഭീമൻ കേക്ക് അംബാസഡർ മുറിച്ചു.

ഈജിപ്തും സൗദി അറേബ്യയും തമ്മിലുള്ള വാണിജ്യ-സാംസ്കാരിക ബന്ധങ്ങൾ ഇത്തരം ഫെസ്റ്റുകളിലൂടെ ശക്തിപ്പെടുത്തുന്നതിന് അംബാസഡർ, ലുലു ഗ്രൂപ്പിനെ അഭിനന്ദിച്ചു. ഈജിപ്ഷ്യൻ ഉൽപ്പന്നങ്ങൾ സൗദിയിലെ ഉപഭോക്താക്കൾക്ക് കൂടുതൽ ലഭ്യമാകുന്നതിൽ സന്തോഷമുണ്ടെന്നും അദ്ദേഹം വ്യക്തമാക്കി.

"ഏറ്റവും മികച്ച അന്താരാഷ്ട്ര ഉൽപ്പന്നങ്ങളും തനത് രുചിക്കൂട്ടുകളും ലുലുവിൻ്റെ പ്രിയപ്പെട്ട ഉപഭോക്താക്കളിലേക്ക് എത്തിക്കാനുള്ള നിരന്തരമായ പ്രതിബദ്ധതയുടെ ഭാഗമാണ് ടേസ്റ്റ് ഓഫ് ഈജിപ്ത് ഫെസ്റ്റിവലെന്ന്" ലുലു ഹൈപ്പർമാർക്കറ്റ് സൗദി ഡയറക്ടർ മുഹമ്മദ് ഹാരിസ് വ്യക്തമാക്കി.

ഓരോ ഇടവേളകളിലും ലോക സംസ്കാരങ്ങളെ സൗദിയിലെ ഉപഭോക്താക്കൾക്ക് പരിചയപ്പെടുത്താൻ ലുലു ഒരുക്കുന്ന വിവിധ രാജ്യങ്ങളുടെ ഉത്പന്നങ്ങൾ അണിനിരത്തിയുള്ള വ്യത്യസ്ത ഫെസ്റ്റുകൾ നേരത്തെയും ഏറെ പ്രശംസ നേടിയിട്ടുണ്ട്.