ജിദ്ദ: വിതരണ ശൃംഖല ശക്തിപ്പെടുത്തുന്നതിനും വ്യാപാരാഭിവൃദ്ധി ലക്ഷ്യമിട്ടും ജിദ്ദ ഇസ്ലാമിക് പോര്‍ട്ടില്‍ 641 മില്യണ്‍ സൗദി റിയാലിന്റെ (ഏകദേശം 171 മില്യണ്‍ ഡോളര്‍) പുതിയ നിക്ഷേപം പ്രഖ്യാപിച്ചു. സൗദി പോര്‍ട്ട്‌സ് അതോറിറ്റിയായ 'മാവാനി' (Mawani), റെഡ് സീ ഗേറ്റ്വേ ടെര്‍മിനല്‍, ഡി.പി വേള്‍ഡ് എന്നിവയുടെ പങ്കാളിത്തത്തോടെയാണ് ഈ പദ്ധതി നടപ്പിലാക്കുന്നത്.

തുറമുഖത്തിന്റെ ചരക്കുനീക്ക ശേഷി ഗണ്യമായി വര്‍ദ്ധിപ്പിക്കുകയാണ് ലക്ഷ്യം. താപനില വ്യതിയാനങ്ങളെ പ്രതിരോധിക്കുന്ന ചരക്കുകള്‍ കൈകാര്യം ചെയ്യുന്നതിനുള്ള സൗകര്യങ്ങള്‍ വിപുലീകരിക്കും. ദേശീയ ഗതാഗത-ലോജിസ്റ്റിക്‌സ് തന്ത്രത്തിന്റെയും വിഷന്‍ 2030-ന്റെയും ഭാഗമായാണ് ഈ വികസന പ്രവര്‍ത്തനങ്ങള്‍.

മൂന്ന് ഷിപ്പ്-ടു-ഷോര്‍ ക്രെയിനുകള്‍, 27 റബ്ബര്‍-ടയേര്‍ഡ് ഗാസ്ട്രി ക്രെയിനുകള്‍, 91 ടെര്‍മിനല്‍ ട്രക്കുകള്‍ എന്നിവ വികസന ഭാഗമായി കൂടുതലായി ഉള്‍പ്പെടുത്തും. കണ്ടെയ്‌നര്‍ ടെര്‍മിനല്‍ യാര്‍ഡുകള്‍ 2,00,000 ചതുരശ്ര മീറ്റര്‍ വിസ്തൃതിയില്‍ വിപുലീകരിക്കും. ശീതീകരിച്ച ചരക്കുകള്‍ സൂക്ഷിക്കുന്നതിനുള്ള റീഫര്‍ പ്ലഗ് പോയിന്റുകള്‍ 4,800-ല്‍ നിന്ന് 9,000 ആയി ഉയും കോള്‍ഡ് സ്റ്റോറേജ് മുറികളുടെ എണ്ണം 8-ല്‍ നിന്ന് 75 ആയും വര്‍ദ്ധിപ്പിക്കും.

ഇറക്കുമതിക്കാര്‍ക്കും കയറ്റുമതിക്കാര്‍ക്കും കൂടുതല്‍ വേഗതയേറിയതും വിശ്വസനീയവുമായ സേവനങ്ങള്‍ നല്‍കാന്‍ ഈ നിക്ഷേപം സഹായിക്കുമെന്ന് മാവാനിയുടെ കൊമേഴ്സ്യല്‍ ബിസിനസ്സ് സീനിയര്‍ വൈസ് പ്രസിഡന്റ് അബ്ദുല്ല അല്‍-മുനിഫ് വ്യക്തമാക്കി. ഏഷ്യ, യൂറോപ്പ്, ആഫ്രിക്ക എന്നീ വിപണികളെ ബന്ധിപ്പിക്കുന്ന ചെങ്കടലിലെ സൗദിയുടെ പ്രധാന പ്രവേശന കവാടമാണ് ജിദ്ദ ഇസ്ലാമിക് പോര്‍ട്ട്.