റിയാദ്: സൗദി അറേബ്യയില്‍ വിദേശികള്‍ക്ക് വസ്തുവകകള്‍ സ്വന്തമാക്കുന്നതിനുള്ള പുതിയ നിയമപരമായ ചട്ടക്കൂട് നിലവില്‍ വന്നു. വിദേശികള്‍, വിദേശ കമ്പനികള്‍, ലാഭരഹിത സംഘടനകള്‍ എന്നിവര്‍ക്ക് വസ്തു ഉടമസ്ഥാവകാശം നേടുന്നതിനായി വിശദമായ വ്യവസ്ഥകളും ഏകീകൃത ഡിജിറ്റല്‍ സംവിധാനവും സര്‍ക്കാര്‍ പുറത്തിറക്കി. പുതിയ ചട്ടങ്ങള്‍ പ്രകാരം വസ്തു ഇടപാടുകള്‍ കൂടുതല്‍ സുതാര്യമാക്കുന്നതിനും നിക്ഷേപങ്ങള്‍ പ്രോത്സാഹിപ്പിക്കുന്നതിനുമാണ് സര്‍ക്കാര്‍ ലക്ഷ്യമിടുന്നത്. നിയമങ്ങള്‍ ലംഘിക്കുന്നവര്‍ക്ക് 10 ദശലക്ഷം റിയാല്‍ വരെ പിഴ ചുമത്താനും വ്യവസ്ഥയുണ്ട്.

സൗദിയില്‍ വസ്തു വാങ്ങാന്‍ ആഗ്രഹിക്കുന്ന വിദേശികള്‍ ഈ നിബന്ധനകള്‍ പാലിച്ചിരിക്കണം:
1. സൗദി ആഭ്യന്തര മന്ത്രാലയം അംഗീകരിച്ച ഡിജിറ്റല്‍ ഐഡന്റിറ്റി (നഫാത്ത്).
2. സ്വന്തം പേരിലുള്ള സൗദി ബാങ്ക് അക്കൗണ്ട്.
3. ഡിജിറ്റല്‍ ഐഡന്റിറ്റിയുമായി ബന്ധിപ്പിച്ച സൗദി മൊബൈല്‍ നമ്പര്‍.

കമ്പനികള്‍ക്കും സംഘടനകള്‍ക്കും ബാധകമായ കാര്യങ്ങള്‍:
വിദേശ കമ്പനികള്‍: നിക്ഷേപ മന്ത്രാലയത്തില്‍ രജിസ്റ്റര്‍ ചെയ്യുകയും, യഥാര്‍ത്ഥ ഉടമകളെ വെളിപ്പെടുത്തുകയും വേണം. ഒരു നിയമപ്രതിനിധിയെ നിയമിക്കുകയും സൗദിയില്‍ ബാങ്ക് അക്കൗണ്ട് തുറക്കുകയും വേണം. ഉടമസ്ഥാവകാശത്തിലോ ഭരണഘടനയിലോ 5% വരെ മാറ്റങ്ങള്‍ വന്നാല്‍ 15 ദിവസത്തിനുള്ളില്‍ മന്ത്രാലയത്തെ അറിയിക്കണം.

ലാഭരഹിത സംഘടനകള്‍: നാഷണല്‍ സെന്റര്‍ ഫോര്‍ നോണ്‍-പ്രോഫിറ്റ് സെക്ടര്‍ ഡെവലപ്മെന്റില്‍ രജിസ്റ്റര്‍ ചെയ്യണം. ഭരണപരമായ മാറ്റങ്ങള്‍ 15 ദിവസത്തിനുള്ളില്‍ റിപ്പോര്‍ട്ട് ചെയ്യണം.

ഏകീകൃത ഡിജിറ്റല്‍ പോര്‍ട്ടല്‍
റിയല്‍ എസ്റ്റേറ്റ് ജനറല്‍ അതോറിറ്റി (REGA) തയ്യാറാക്കിയ പുതിയ ഇലക്ട്രോണിക് പോര്‍ട്ടലിലൂടെയായിരിക്കും ഇനി എല്ലാ ഇടപാടുകളും നടക്കുക. ദേശീയ റിയല്‍ എസ്റ്റേറ്റ് രജിസ്ട്രിയുമായി ഈ പോര്‍ട്ടല്‍ നേരിട്ട് ബന്ധിപ്പിച്ചിരിക്കുന്നു. സൗദി സെന്‍ട്രല്‍ ബാങ്ക് അംഗീകരിച്ച ഇലക്ട്രോണിക് പേയ്മെന്റ് സംവിധാനങ്ങള്‍ വഴി മാത്രമേ പണമിടപാടുകള്‍ നടത്താവൂ.

കുടുംബ ഉടമസ്ഥതയിലെ നിയന്ത്രണം
ഒരു വിദേശ കുടുംബത്തിന് ഒന്നിലധികം താമസസ്ഥലങ്ങള്‍ വാങ്ങുന്നതിന് നിയന്ത്രണമുണ്ട്. വിദേശികളായ ജീവിതപങ്കാളിയെയും കുട്ടികളെയും ഒരൊറ്റ യൂണിറ്റായിട്ടാണ് പരിഗണിക്കുക. വിവാഹമോചനം നടക്കുകയോ, മക്കള്‍ക്ക് 25 വയസ്സ് തികയുകയോ ചെയ്യാതെ ഇവര്‍ക്ക് പ്രത്യേകമായി മറ്റൊരു വീട് വാങ്ങാന്‍ കഴിയില്ല.

ഫീസും ഇളവുകളും
റിയാദ്, ജിദ്ദ, മക്ക, മദീന എന്നീ നഗരങ്ങളില്‍ വിദേശികള്‍ വാങ്ങുന്ന വസ്തുവകകള്‍ക്ക് 2% ഫീസുണ്ട്. എന്നാല്‍ അനന്തരാവകാശ വിഹിതം, കോടതി ഉത്തരവുകള്‍, സര്‍ക്കാര്‍ ഏറ്റെടുക്കലുകള്‍ തുടങ്ങിയ പത്തോളം പ്രത്യേക വിഭാഗങ്ങളെ ഈ ഫീസില്‍ നിന്ന് ഒഴിവാക്കിയിട്ടുണ്ട്.

പിഴകള്‍
തെറ്റായ വിവരങ്ങള്‍ നല്‍കി വസ്തു ഉടമസ്ഥാവകാശം നേടുന്നവര്‍ക്ക് വസ്തുവിന്റെ മൂല്യത്തിന്റെ 5% അല്ലെങ്കില്‍ പരമാവധി 10 ദശലക്ഷം റിയാല്‍ വരെ പിഴ ലഭിക്കാം. മറ്റ് നിയമലംഘനങ്ങള്‍ക്ക് 0.1% മുതല്‍ 3% വരെ പിഴയും ചുമത്തും. നിയമലംഘനം തിരുത്താന്‍ 10 മുതല്‍ 180 ദിവസം വരെ സമയം അധികൃതര്‍ അനുവദിക്കും. റിയല്‍ എസ്റ്റേറ്റ് മേഖലയില്‍ സുതാര്യതയും കൃത്യതയും ഉറപ്പാക്കാന്‍ ഈ പുതിയ സംവിധാനങ്ങള്‍ സഹായിക്കുമെന്ന് അധികൃതര്‍ വ്യക്തമാക്കി.