മക്ക: മക്കയിലെ പ്രശസ്തമായ 'മസാര്‍ ഡെസ്റ്റിനേഷന്‍' പദ്ധതിയിലെ മൂന്ന് പ്രധാന പ്ലോട്ടുകള്‍ വില്‍ക്കുന്നതിനുള്ള കരാറുകളില്‍ ഒപ്പുവെച്ചതായി ഉമ്മുല്‍ ഖുറ ഡെവലപ്മെന്റ് ആന്‍ഡ് കണ്‍സ്ട്രക്ഷന്‍ കമ്പനി (മസാര്‍) അറിയിച്ചു. ഏകദേശം 239.85 മില്യണ്‍ സൗദി റിയാല്‍ (23.98 കോടി റിയാല്‍) മൊത്തം മൂല്യം വരുന്നതാണ് ഈ വന്‍കിട ഇടപാട്. മേഖലയിലെ റിയല്‍ എസ്റ്റേറ്റ്, റെസിഡന്‍ഷ്യല്‍ നിക്ഷേപങ്ങള്‍ വര്‍ദ്ധിപ്പിക്കുന്നതിനും പദ്ധതിയുടെ വികസന തന്ത്രങ്ങള്‍ നടപ്പിലാക്കുന്നതിനും വേണ്ടിയാണ് ഈ നീക്കം.

ഇന്ന് തദാവുല്‍ (സൗദി സ്റ്റോക്ക് എക്‌സ്‌ചേഞ്ച്) വഴി പുറത്തുവിട്ട പ്രസ്താവനയിലാണ് കമ്പനി ഇക്കാര്യം വ്യക്തമാക്കിയത്. 2026 ജൂണ്‍ 18-നായിരുന്നു (1448 മുഹറം 3) ഈ കരാറുകള്‍ ഒപ്പുവെച്ചത്. വില്‍പന നടത്തിയ മൂന്ന് പ്ലോട്ടുകളുടെയും ആകെ വിസ്തീര്‍ണ്ണം 6,904.62 ചതുരശ്ര മീറ്ററാണ്.

ഇടപാടിന്റെ വിശദാംശങ്ങള്‍ ഒറ്റനോട്ടത്തില്‍:

ഒന്നാം പ്ലോട്ട്: 75.13 മില്യണ്‍ റിയാല്‍

രണ്ടാം പ്ലോട്ട്: 77.27 മില്യണ്‍ റിയാല്‍

മൂന്നാം പ്ലോട്ട്: 87.44 മില്യണ്‍ റിയാല്‍


ആദ്യത്തെ രണ്ട് പ്ലോട്ടുകള്‍ ഉമ്മുല്‍ ഖുറ ഡെവലപ്മെന്റ് കമ്പനി നേരിട്ടാണ് വിറ്റത്. മൂന്നാമത്തെ പ്ലോട്ട് ഉമ്മുല്‍ ഖുറയുടെ പൂര്‍ണ്ണ ഉടമസ്ഥതയിലുള്ള 'അലിന്‍മ മക്ക ഫസ്റ്റ് ഡെവലപ്മെന്റ് ഫണ്ടിന്' വേണ്ടിയുള്ള സ്‌പെഷ്യല്‍ പര്‍പ്പസ് വെഹിക്കിളായ 'അലിന്‍മ ഫസ്റ്റ് ഡെവലപ്മെന്റ് കമ്പനി ലിമിറ്റഡ്' ആണ് വിറ്റത്. അല്‍ രാജ്ഹി കാപ്പിറ്റല്‍ നിയന്ത്രിക്കുന്ന റിയല്‍ എസ്റ്റേറ്റ് ഫണ്ടിന് വേണ്ടിയുള്ള സ്‌പെഷ്യല്‍ പര്‍പ്പസ് വെഹിക്കിളായ 'അസാസ് അബ്രാജ് ബവാബത് അല്‍ റഹ്‌മാനിയ കമ്പനി' ആണ് ഈ മൂന്ന് പ്ലോട്ടുകളും വാങ്ങിയിരിക്കുന്നത്.

മസാര്‍ ഡെസ്റ്റിനേഷന്‍ കൂടുതല്‍ വികസിപ്പിക്കുന്നതിനുള്ള ശ്രമങ്ങളുടെ ഭാഗമായാണ് ഈ കരാറെന്ന് ഉമ്മുല്‍ ഖുറ സ്ഥിരീകരിച്ചു. പുതിയ ഉടമകള്‍ ഈ ഭൂമിയില്‍ മൂന്ന് വലിയ റെസിഡന്‍ഷ്യല്‍ ടവറുകള്‍ വികസിപ്പിക്കും. ഇത് പദ്ധതിയുടെ നഗരവികസനത്തിന് വലിയ സംഭാവന നല്‍കും.