റിയാദ്: യുഎസ്-ഇറാന്‍ സംഘര്‍ഷത്തെത്തുടര്‍ന്നുണ്ടായ ജിയോപൊളിറ്റിക്കല്‍ പിരിമുറുക്കങ്ങള്‍ അയഞ്ഞതോടെ, ഗള്‍ഫ് സഹകരണ കൗണ്‍സില്‍ (ജിസിസി) രാജ്യങ്ങളിലെ നിക്ഷേപ-ഗ്രേഡ് ബോണ്ട്, സുക്കൂക് സ്‌പ്രെഡുകള്‍ സംഘര്‍ഷത്തിന് മുന്‍പുള്ള നിലവാരത്തിലേക്ക് മടങ്ങിയതായി ഫിച്ച് റേറ്റിംഗ്സ് അറിയിച്ചു. ബോറോയിംഗ് ചെലവ് ഇപ്പോഴും ഉയര്‍ന്ന നിലയില്‍ തുടരുന്നുണ്ടെങ്കിലും വിപണിയില്‍ വലിയ ആശ്വാസമാണ് പ്രകടമാകുന്നത്.

എസ് ആന്‍ഡ് പി (S&P) ജിസിസി സുക്കൂക് സൂചികയും യുഎസ് ട്രഷറി ബോണ്ട് സൂചികയും തമ്മിലുള്ള യീല്‍ഡ് സ്‌പ്രെഡ് ജൂണ്‍ 15-ഓടെ 67 ബേസിസ് പോയിന്റായി കുറഞ്ഞു. മാര്‍ച്ച് 23-ന് ഇത് 100 ബേസിസ് പോയിന്റായിരുന്നു. സംഘര്‍ഷത്തിന് തൊട്ടുമുമ്പ് ഫെബ്രുവരി 27-ന് ഇത് 70 ബേസിസ് പോയിന്റായിരുന്നു എന്നതില്‍ നിന്ന് വിപണി പഴയ നിലയിലേക്ക് മടങ്ങുകയാണെന്ന് വ്യക്തമാണ്. അതുപോലെ, എസ് ആന്‍ഡ് പി ജിസിസി ബോണ്ട് സൂചികയുടെ സ്‌പ്രെഡ് മാര്‍ച്ചിലെ 126-ല്‍ നിന്ന് 89 ബേസിസ് പോയിന്റായി കുറഞ്ഞു.

യുഎസും ഇറാനും തമ്മിലുള്ള കരാര്‍ ഒപ്പുവെക്കുകയും അത് നടപ്പിലാക്കുകയും ചെയ്താല്‍, നിലവിലുള്ള ജിയോപൊളിറ്റിക്കല്‍, ക്രെഡിറ്റ്, വിപണി അപകടസാധ്യതകള്‍ ഗണ്യമായി കുറയുമെന്ന് ഫിച്ച് റേറ്റിംഗ്സ് വിലയിരുത്തുന്നു. എന്നാല്‍, സ്‌പെക്യുലേറ്റീവ് ഗ്രേഡ് ജിസിസി സുക്കൂക്കുകളിലെ റിസ്‌ക് പ്രീമിയം ഇപ്പോഴും സംഘര്‍ഷത്തിന് മുന്‍പുള്ളതിനേക്കാള്‍ കൂടുതലായി തുടരുന്നു.

പലിശ നിരക്കുകള്‍ വിപണിയെ സ്വാധീനിക്കുന്നു
യുഎസ് ഫെഡറല്‍ റിസര്‍വ് പലിശ നിരക്കുകള്‍ 3.50% മുതല്‍ 3.75% വരെയായി ഈ വര്‍ഷം മുഴുവന്‍ നിലനിര്‍ത്തുമെന്നാണ് ഭൂരിഭാഗം സാമ്പത്തിക വിദഗ്ധരുടെയും വിലയിരുത്തല്‍. ഗള്‍ഫ് രാജ്യങ്ങളിലെ ഭൂരിഭാഗം കറന്‍സികളും യുഎസ് ഡോളറുമായി ബന്ധിപ്പിച്ചിട്ടുള്ളതിനാല്‍ , ജിസിസിയിലെ കടപ്പത്ര യീല്‍ഡുകള്‍ യുഎസ് ട്രഷറി നിരക്കുകളുമായി ചേര്‍ന്നുനില്‍ക്കുന്നു.