ന്യൂജേഴ്സി: ലോകകപ്പ് ഉദ്ഘാടന മത്സരത്തില് ബ്രസീലിന് വമ്പന് നാണക്കേടില് നിന്ന് രക്ഷ. ന്യൂയോര്ക്ക് ന്യൂജേഴ്സി സ്റ്റേഡിയത്തില് നടന്ന മത്സരത്തില് മൊറോക്കോയ്ക്കെതിരെ വിനീഷ്യസ് ജൂനിയറിന്റെ തകര്പ്പന് ഗോളിലാണ് അഞ്ച് തവണ ചാമ്പ്യന്മാരായ ബ്രസീല് സമനില പിടിച്ചുവാങ്ങിയത്. ഇതോടെ ലോകകപ്പിലെ ആദ്യ മത്സരങ്ങളില് പരാജയപ്പെടാത്ത ബ്രസീലിന്റെ 92 വര്ഷം നീളുന്ന അപരാജിത റെക്കോര്ഡ് തുടരുന്നു. 1934-ന് ശേഷം ആദ്യമായാണ് ലോകകപ്പ് ഉദ്ഘാടന മത്സരത്തില് ബ്രസീല് തോല്വിയുടെ വക്കില് നിന്ന് രക്ഷപ്പെടുന്നത്.
മത്സരത്തിന്റെ 21-ാം മിനിറ്റില് ഇസ്മായില് സൈബാരിയിലൂടെയാണ് മൊറോക്കോ ആദ്യം മുന്നിലെത്തിയത്. ബ്രസീല് ഗോള്കീപ്പര് ആലിസണ് ബെക്കറും പ്രതിരോധ താരങ്ങളായ ഗബ്രിയേലും മാര്ക്കിന്യോസും തമ്മിലുള്ള ആശയക്കുഴപ്പം മുതലെടുത്ത സൈബാരി, ബോക്സിന് പുറത്തുനിന്നുള്ള മനോഹരമായ ചിപ്പിലൂടെ പന്ത് വലയിലെത്തിച്ചു. ലോകകപ്പില് ഒരു സൗത്ത് അമേരിക്കന് ടീമിനെതിരെ മൊറോക്കോ നേടുന്ന ആദ്യ ഗോളാണിത്.
തുടര്ന്ന് ആക്രമിച്ച് കളിച്ച മൊറോക്കോ ആദ്യ 30 മിനിറ്റിനുള്ളില് 12 തവണയാണ് ബ്രസീലിയന് ഗോള്മുഖത്തേക്ക് പായിച്ചത്. 2018-ല് മെക്സിക്കോയ്ക്കെതിരായ മത്സരത്തിന് ശേഷം ഇത്രയധികം സമ്മര്ദം ബ്രസീല് നേരിടുന്നത് ആദ്യമായാണ്.
എന്നാല്, ആദ്യ പകുതി അവസാനിക്കാന് 13 മിനിറ്റ് ശേഷിക്കെ ബ്രസീലിന്റെ രക്ഷകനായി വിനീഷ്യസ് ജൂനിയര് അവതരിച്ചു. തന്റെ 50-ാം അന്താരാഷ്ട്ര മത്സരത്തിനിറങ്ങിയ വിനീഷ്യസ്, ബ്രൂണോ ഗ്വിമാറസില് നിന്ന് ലഭിച്ച പന്ത് അതിമനോഹരമായി കണ്ട്രോള് ചെയ്ത് ബോക്സിനുള്ളിലേക്ക് കുതിച്ചു. മൊറോക്കന് ഗോള്കീപ്പര് യാസീന് ബോനുവിനെ കാഴ്ചക്കാരനാക്കി വിനീഷ്യസ് തൊടുത്ത ഉജ്ജ്വലമായ ഷോട്ട് വലയില് പതിച്ചു.
ബ്രസീലിന്റെ 2002 ലോകകപ്പ് ജേതാക്കളായ റൊണാള്ഡോ, കാക്ക, റോബര്ട്ടോ കാര്ലോസ് തുടങ്ങിയവര് ഗാലറിയിലിരുന്ന് മത്സരം വീക്ഷിക്കുന്നുണ്ടായിരുന്നു. രണ്ടാം പകുതിയില് കാര്ലോ ആന്സലോട്ടി പരിശീലിപ്പിക്കുന്ന ബ്രസീല് കൂടുതല് ഉണര്ന്നു കളിച്ചെങ്കിലും വിജയിക്കുന്ന ഗോള് കണ്ടെത്താനായില്ല. ഗ്വിമാറസിന്റെ ക്രോസ് കണക്ട് ചെയ്യാന് റാഫിഞ്ഞയ്ക്ക് സാധിക്കാതെ പോയത് ബ്രസീലിന് തിരിച്ചടിയായി.
ഈ സമനിലയോടെ ലോകകപ്പിലെ ആദ്യ മത്സരത്തില് വിജയം എന്ന മൊറോക്കോയുടെ സ്വപ്നം വീണ്ടും നീണ്ടുപോയി. അതേസമയം, 92 വര്ഷമായി കാത്തുസൂക്ഷിക്കുന്ന അഭിമാനകരമായ റെക്കോര്ഡ് നിലനിര്ത്താന് സാധിച്ചതിന്റെ ആശ്വാസത്തിലാണ് ബ്രസീല്.
