തിരുവനന്തപുരം: പ്ലസ്ടുവിനുശേഷം ജര്‍മ്മനിയില്‍ സൗജന്യമായും സ്‌റ്റൈപ്പന്റോടെയുമുള്ള നഴ്‌സിങ് പഠനത്തിനും തുടര്‍ന്ന് ജോലിയ്ക്കും അവസരമൊരുക്കുന്ന നോര്‍ക്ക റൂട്ട്‌സ് 'ട്രിപ്പിള്‍ വിന്‍ ട്രെയിനി പ്രോഗ്രാമി'ന്റെ ഭാഗമായി തിരഞ്ഞെടുത്ത വിദ്യാര്‍ത്ഥികള്‍ക്കുള്ള കോണ്‍ട്രാക്ട് കൈമാറി. നോര്‍ക്ക വകുപ്പ് ഡയറക്ടറും നോര്‍ക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസറുമായ ആസിഫ് കെ. യൂസഫ്, ജനറല്‍ മാനേജര്‍ പ്രകാശ് പി. ജോസഫ് എന്നിവര്‍ ചേര്‍ന്ന് വിദ്യാര്‍ത്ഥികള്‍ക്ക് കോണ്‍ട്രാക്ട് നല്‍കി. 2026 ഫെബ്രുവരിയില്‍ നടത്തിയ അഭിമുഖങ്ങളിലൂടെ തിരഞ്ഞെടുത്ത 15 പേര്‍ക്കാണ് കോണ്‍ട്രാക്ട് ലഭിച്ചത്.

വിദ്യാര്‍ത്ഥികള്‍ക്ക് ലഭിച്ചിട്ടുള്ള സ്ഥാപനങ്ങള്‍ ഇയാണ്: ബയേണ്‍ സ്റ്റേറ്റ് (ആള്‍ട്ടന്‍ഹില്‍ഫെ ഓഗ്‌സ്ബര്‍ഗ്): അനുശ്രീ കെ. ജ്യോതി, നന്ദന വിനീഷ്, ക്രിസ്റ്റീന ജിബു, മരിയ ജോര്‍ജ്, ശ്രീലക്ഷ്മി വിനോദ്കുമാര്‍. നോര്‍ഡ്റൈന്‍-വെസ്റ്റ്ഫാലന്‍ സ്റ്റേറ്റ് (ലൂയിസന്‍ ഹോസ്പിറ്റല്‍ ആഹന്‍): സാരംഗ് ചോടോപ്പറമ്പില്‍, മരിയ ലിസ്ബത്ത് ജെയ്സണ്‍, ഗംഗ മഞ്ജുഷ. റൈന്‍ലാന്‍ഡ്-ഫാല്‍സ് സ്റ്റേറ്റ് (മാരിയന്‍ക്രാങ്കന്‍ഹൗസ് കോഹം ഹോസ്പിറ്റല്‍): അല്‍ഫോന്‍സ ജോയ്, അഞ്ജന ശ്രീധരന്‍, ദേവനാരായണന്‍ രജിമോന്‍, മാളവിക ശ്രീജ, നിഷ നൈനാന്‍, അനഘ സുരേഷ്, അബീന വര്‍ഗീസ്. ഇവര്‍ മൂന്നു വര്‍ഷത്തെ നഴ്‌സിങ് പഠനത്തിനായി നടപടിക്രമങ്ങള്‍ പൂര്‍ത്തിയാക്കി ഓഗസ്റ്റോടെ ജര്‍മ്മനിയിലെത്തും.

നോര്‍ക്ക റൂട്ട്‌സ്, ജര്‍മ്മന്‍ ഫെഡറല്‍ എംപ്ലോയ്‌മെന്റ് ഏജന്‍സി, ജര്‍മ്മന്‍ ഏജന്‍സി ഫോര്‍ ഇന്റര്‍നാഷണല്‍ കോ-ഓപ്പറേഷന്‍ (GIZ) എന്നിവ സംയുക്തമായാണ് ട്രിപ്പിള്‍ വിന്‍ ട്രെയിനി പ്രോഗ്രാം സംഘടിപ്പിക്കുന്നത്. ജര്‍മ്മനിയില്‍ രജിസ്റ്റേര്‍ഡ് നഴ്‌സായി പ്രാക്ടീസ് ചെയ്യുന്നതിനുള്ള വൊക്കേഷണല്‍ നഴ്‌സിങ് ട്രെയിനിംഗാണ് പദ്ധതി വഴി ലഭിക്കുന്നത്. നിയമന പ്രക്രിയയിലുടനീളമുള്ള പിന്തുണ, ജര്‍മ്മനിയുടെ ആരോഗ്യ പരിപാലന മേഖലയിലെ തൊഴില്‍ സാധ്യത, പഠനകാലയളവില്‍ പ്രതിമാസ സ്‌റ്റൈപ്പന്റ് എന്നിവ ഈ പദ്ധതിയുടെ പ്രത്യേകതകളാണ്. കേരളീയരായ വിദ്യാര്‍ത്ഥികള്‍ക്കാണ് ഈ പ്രോഗ്രാമിലേക്ക് അപേക്ഷിക്കാന്‍ കഴിയുക. ട്രിപ്പിള്‍ വിന്‍ ട്രെയിനി പ്രോഗ്രാമിന്റെ ഭാഗമായി ഇതുവരെ തിരഞ്ഞെടുത്ത 87 വിദ്യാര്‍ത്ഥികളില്‍ 72 പേര്‍ ഇതിനകം ജര്‍മ്മനിയിലെത്തിക്കഴിഞ്ഞു.