തിരുവനന്തപുരം: യുഡിഎഫ് സര്ക്കാരിന്റെ 'ഇന്ദിരാ ഗ്യാരണ്ടി' പദ്ധതിയുടെ ഭാഗമായി കെഎസ്ആര്ടിസി ഓര്ഡിനറി ബസുകളില് സ്ത്രീകള്ക്കും ട്രാന്സ്ജെന്ഡറുകള്ക്കും സൗജന്യ യാത്ര അനുവദിക്കാന് മന്ത്രിസഭാ തീരുമാനം. 'പ്രിയദര്ശിനി' എന്ന് നാമകരണം ചെയ്തിരിക്കുന്ന ഈ പദ്ധതി ജൂണ് 15 മുതല് നിലവില് വരും.
വരുമാനമോ പ്രായമോ പരിഗണിക്കാതെ എല്ലാ വിഭാഗം സ്ത്രീകള്ക്കും ട്രാന്സ്ജെന്ഡര് വിഭാഗത്തിനും ഈ ആനുകൂല്യം ലഭിക്കും. പരീക്ഷണാടിസ്ഥാനത്തില് ആദ്യ 100 ദിവസത്തേക്ക് ഓര്ഡിനറി ബസുകളില് മാത്രമായിരിക്കും സൗജന്യയാത്ര. തുടര്ന്ന് ഇതിന്റെ പ്രവര്ത്തനം വിലയിരുത്തിയ ശേഷം തുടര് നടപടികള് സ്വീകരിക്കും.
പദ്ധതി നടപ്പിലാക്കുമ്പോള് കെഎസ്ആര്ടിസിക്കുണ്ടാകുന്ന നഷ്ടം സര്ക്കാര് നേരിട്ട് നികത്തും. പ്രതിമാസം 65 മുതല് 75 കോടി രൂപ വരെയും, വര്ഷത്തില് ഏകദേശം 750 മുതല് 800 കോടി രൂപ വരെയും അധികബാധ്യതയാണ് ഇതിനായി കണക്കാക്കുന്നത്. നിലവില് കെഎസ്ആര്ടിസിയുടെ പ്രവര്ത്തനങ്ങള്ക്കായി വര്ഷം 1500 കോടി രൂപ സര്ക്കാര് നല്കുന്നുണ്ട്.
പദ്ധതിയുടെ നടത്തിപ്പ് കൃത്യമായി നിരീക്ഷിക്കുന്നതിനായി എല്ലാ മാസവും അവലോകന യോഗങ്ങള് ചേരുമെന്നും മുഖ്യമന്ത്രി അറിയിച്ചു. ഓരോ ജില്ലയില് നിന്നുമുള്ള കണക്കുകള് പരിശോധിക്കുകയും അപാകതകള് ഉണ്ടെങ്കില് ഉടന് പരിഹരിക്കുകയും ചെയ്യും. കെഎസ്ആര്ടിസിയുടെ വരുമാനം വര്ധിപ്പിക്കുന്നതിനായി പരസ്യങ്ങള് ഉള്പ്പെടെയുള്ള മാര്ഗ്ഗങ്ങളിലൂടെ ആറുമാസത്തിനുള്ളില് പുതിയ പദ്ധതികള് ആവിഷ്കരിക്കുമെന്നും അദ്ദേഹം കൂട്ടിച്ചേര്ത്തു.
Related News
