മുംബൈ: ഇന്ത്യന്‍ ടി20 ടീമില്‍ വമ്പന്‍ മാറ്റങ്ങളോടെ അയര്‍ലന്‍ഡ്, ഇംഗ്ലണ്ട് പര്യടനങ്ങള്‍ക്കും ഏഷ്യന്‍ ഗെയിംസിനുമുള്ള ടീമിനെ പ്രഖ്യാപിച്ച് ബിസിസിഐ. ശ്രേയസ് അയ്യരെ ഇന്ത്യന്‍ ടി20 ടീം ക്യാപ്റ്റനായി പ്രഖ്യാപിച്ചു. സമീപകാലത്ത് ഫോം കണ്ടെത്താന്‍ വിഷമിച്ച സൂര്യകുമാര്‍ യാദവിന് ടീമില്‍പോലും ഇടമില്ല. 15-കാരന്‍ വൈഭവ് സൂര്യവംശിക്ക് സീനിയര്‍ ടീമിലേക്ക് ആദ്യമായി വിളിയെത്തിയതാണ് ശ്രദ്ധേയമായ കാര്യം. പ്രഖ്യാപിച്ച മൂന്ന് ടീമിലും വൈഭവ് ഇടംനേടി. സഞ്ജു സാംസണും മൂന്ന് ടീമുകളിലും ഇടംനേടി. ജസ്പ്രീത് ബുംറയെ ഏഷ്യന്‍ ഗെയിംസിനുള്ള ടീമില്‍ മാത്രമാണ് ഉള്‍പ്പെടുത്തിയിരിക്കുന്നത്.

മുംബൈയിലെ സെലക്ഷന്‍ കമ്മിറ്റി യോഗത്തിനു ശേഷം മുഖ്യ സെലക്ടര്‍ അജിത് അഗാര്‍ക്കര്‍, സെക്രട്ടറി ദേവ്ജിത് സൈകിയ എന്നിവരാണ് ടീമിനെ പ്രഖ്യാപിച്ചത്. തിലക് വര്‍മയാണ് മൂന്ന് ടീമുകളുടെയും വൈസ് ക്യാപ്റ്റന്‍.

ടി20 ലോകകപ്പ് വിജയത്തിന് തൊട്ടുപിന്നാലെയാണ് സൂര്യകുമാര്‍ യാദവിന് ടീമിലെ സ്ഥാനം തന്നെ നഷ്ടമായത്. വിവിധ ഐപിഎല്‍ ഫ്രാഞ്ചൈസികളെയും ആഭ്യന്തര ടീമുകളെയും നയിച്ച അയ്യരുടെ അനുഭവസമ്പത്താണ് അദ്ദേഹത്തെ ഈ സ്ഥാനത്തേക്ക് എത്തിച്ചത്. അയ്യര്‍ ഈ സ്ഥാനത്തേക്ക് ഒരു മികച്ച തിരഞ്ഞെടുപ്പാണെന്നും ക്യാപ്റ്റന്‍ എന്ന നിലയില്‍ ആവശ്യമായ പരിചയസമ്പത്ത് അദ്ദേഹത്തിനുണ്ടെന്നും ചീഫ് സെലക്ടര്‍ അജിത് അഗാര്‍ക്കര്‍ വ്യക്തമാക്കി.

റെക്കോര്‍ഡുകള്‍ തകര്‍ത്ത ഐപിഎല്‍ പ്രകടനമാണ് വൈഭവിന് ടീമിലേക്കുള്ള വഴിതുറന്നത്. വരാനിരിക്കുന്ന ഏഷ്യന്‍ ഗെയിംസും അടുത്ത ടി20 ലോകകപ്പും ലക്ഷ്യമിട്ടുള്ള ഒരു തലമുറ മാറ്റത്തിന്റെ തുടക്കമായാണ് ഈ നീക്കത്തെ കാണുന്നത്.

ശ്രേയസ് 2023 ഡിസംബറിന് ശേഷം ഇന്ത്യക്കായി ടി20 കളിച്ചിട്ടില്ലെങ്കിലും കഴിഞ്ഞ ഐപിഎല്‍ സീസണില്‍ താരം മികച്ച പ്രകടനമാണ് കാഴ്ചവെച്ചത്. 55.23 ശരാശരിയിലും 168.81 സ്ട്രൈക്ക് റേറ്റിലും 498 റണ്‍സ് അദ്ദേഹം നേടി. നേതൃത്വപരമായ മികവിനൊപ്പം ഈ ബാറ്റിങ് ഫോമും അദ്ദേഹത്തിന് തുണയായി.

അയര്‍ലന്‍ഡിനെതിരായ പരമ്പരയ്ക്കുള്ള ടീം:

ശ്രേയസ് അയ്യര്‍ (ക്യാപ്റ്റന്‍), തിലക് വര്‍മ (വൈസ് ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍ (വിക്കറ്റ് കീപ്പര്‍), ഇഷാന്‍ കിഷന്‍ (വിക്കറ്റ് കീപ്പര്‍), വൈഭവ് സൂര്യവംശി, ശിവം ദുബെ, നിതീഷ് കുമാര്‍ റെഡ്ഡി, അക്ഷര്‍ പട്ടേല്‍, വാഷിങ്ടണ്‍ സുന്ദര്‍, വരുണ്‍ ചക്രവര്‍ത്തി, രവി ബിഷ്ണോയി, മുഹമ്മദ് സിറാജ്, ഹര്‍ഷിത് റാണ, അര്‍ഷ്ദീപ് സിങ്, പ്രിന്‍സ് യാദവ്.

ഇംഗ്ലണ്ടിനെതിരായ പരമ്പരയ്ക്കുള്ള ടീം:

ശ്രേയസ് അയ്യര്‍ (ക്യാപ്റ്റന്‍), തിലക് വര്‍മ (വൈസ് ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍ (വിക്കറ്റ് കീപ്പര്‍), ഇഷാന്‍ കിഷന്‍ (വിക്കറ്റ് കീപ്പര്‍), വൈഭവ് സൂര്യവംശി, ശിവം ദുബെ, നിതീഷ് കുമാര്‍ റെഡ്ഡി, അക്ഷര്‍ പട്ടേല്‍, വാഷിങ്ടണ്‍ സുന്ദര്‍, വരുണ്‍ ചക്രവര്‍ത്തി, രവി ബിഷ്ണോയി, മുഹമ്മദ് സിറാജ്, ഹര്‍ഷിത് റാണ, അര്‍ഷ്ദീപ് സിങ്, പ്രിന്‍സ് യാദവ്.

ഏഷ്യന്‍ ഗെയിംസിനുള്ള ഇന്ത്യന്‍ ടീം:

ശ്രേയസ് അയ്യര്‍ (ക്യാപ്റ്റന്‍), തിലക് വര്‍മ (വൈസ് ക്യാപ്റ്റന്‍), അഭിഷേക് ശര്‍മ, സഞ്ജു സാംസണ്‍, ഇഷാന്‍ കിഷന്‍, വൈഭവ് സൂര്യവംശി, ശിവം ദുബെ, നിതീഷ് കുമാര്‍ റെഡ്ഡി, അക്ഷര്‍ പട്ടേല്‍, വാഷിങ്ടണ്‍ സുന്ദര്‍, വരുണ്‍ ചക്രവര്‍ത്തി, രവി ബിഷ്ണോയി, ജസ്പ്രീത് ബുംറ, ഹര്‍ഷിത് റാണ, അര്‍ഷ്ദീപ് സിങ്.