റിയാദ്: സൗദി അറേബ്യയുടെ പുതിയ ദേശീയ വിമാനക്കമ്പനിയായ 'റിയാദ് എയര്‍', തങ്ങള്‍ക്കായി പ്രത്യേകം രൂപകല്‍പ്പന ചെയ്ത ആദ്യ രണ്ട് ബോയിങ് 787-9 ഡ്രീംലൈനര്‍ വിമാനങ്ങള്‍ ഏറ്റുവാങ്ങി. വാണിജ്യ പ്രവര്‍ത്തനങ്ങള്‍ വിപുലീകരിക്കുന്നതിനും റിയാദിനെ ആഗോള വ്യോമയാന കേന്ദ്രമാക്കി മാറ്റുന്നതിനുമുള്ള സൗദിയുടെ ലക്ഷ്യത്തിലെ സുപ്രധാന നാഴികക്കല്ലാണിത്.

റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തിലെത്തിയ വിമാനങ്ങള്‍ക്ക് പരമ്പരാഗതമായ 'വാട്ടര്‍ കാനന്‍' സല്യൂട്ട് നല്‍കി സ്വീകരിച്ചു. 'HZ-RXAA', 'HZ-RXAB' എന്നീ രജിസ്ട്രേഷന്‍ നമ്പറുകളിലും 'റിയാദ് 1', 'റിയാദ് 2' എന്നീ കോള്‍ സൈനുകളിലും എത്തിയ ഈ വിമാനങ്ങള്‍, റിയാദ് എയര്‍ ഓര്‍ഡര്‍ ചെയ്ത 72 വിമാനങ്ങളില്‍ ആദ്യത്തേതാണ്.

സൗദി പബ്ലിക് ഇന്‍വെസ്റ്റ്മെന്റ് ഫണ്ട് പൂര്‍ണ്ണമായും ഉടമസ്ഥത വഹിക്കുന്ന ഈ വിമാനക്കമ്പനി, സൗദിയുടെ വിഷന്‍ 2030-ന്റെ ഭാഗമായി സമ്പദ്വ്യവസ്ഥയെ വൈവിധ്യവല്‍ക്കരിക്കുന്നതിനും വ്യോമയാന-ടൂറിസം മേഖലകളെ ശക്തിപ്പെടുത്തുന്നതിനുമാണ് ലക്ഷ്യമിടുന്നത്. 'ഞങ്ങള്‍ ഒരു വിമാനക്കമ്പനിയെ കെട്ടിപ്പടുക്കുക മാത്രമല്ല, സൗദിയുടെ ഹൃദയഭാഗത്ത് നിന്ന് ലോകത്തേക്കുള്ള പുതിയൊരു കവാടം തുറക്കുക കൂടിയാണ് ചെയ്യുന്നത്,' എന്ന് റിയാദ് എയര്‍ സി.ഇ.ഒ ടോണി ഡഗ്ലസ് പറഞ്ഞു.

2030-ഓടെ നൂറിലധികം അന്താരാഷ്ട്ര നഗരങ്ങളിലേക്ക് സര്‍വീസ് നടത്താനും വിമാനങ്ങളുടെ എണ്ണം 180-ല്‍ അധികമാക്കാനും റിയാദ് എയറിന് പദ്ധതിയുണ്ട്. ഏഷ്യ, ആഫ്രിക്ക, യൂറോപ്പ് എന്നീ ഭൂഖണ്ഡങ്ങളുടെ സംഗമസ്ഥാനത്തുള്ള സൗദിയുടെ ഭൂമിശാസ്ത്രപരമായ അനുകൂല സാഹചര്യം ഉപയോഗപ്പെടുത്തി, ഈ വര്‍ഷാവസാനത്തോടെ ഇരുപതോളം നഗരങ്ങളിലേക്ക് സര്‍വീസ് നടത്താനാണ് കമ്പനി ലക്ഷ്യമിടുന്നത്.

ജൂലൈ ഒന്നിന് റിയാദ്-ലണ്ടന്‍ (ഹീത്രൂ) റൂട്ടില്‍ സര്‍വീസ് ആരംഭിക്കാന്‍ റിയാദ് എയര്‍ നേരത്തെ തന്നെ ടിക്കറ്റ് ബുക്കിങ് തുടങ്ങിയിരുന്നു. പുതിയ ഡ്രീംലൈനര്‍ വിമാനങ്ങള്‍ ഉപയോഗിച്ച് സര്‍വീസ് നടത്തുന്ന ആദ്യ റൂട്ടായിരിക്കും ഇത്. ബിസിനസ് എലൈറ്റ്, ബിസിനസ്, പ്രീമിയം ഇക്കോണമി, ഇക്കോണമി എന്നിങ്ങനെ നാല് ക്ലാസുകളിലായി സജ്ജീകരിച്ചിരിക്കുന്ന വിമാനങ്ങളില്‍ അത്യാധുനിക ഇന്‍-ഫ്‌ലൈറ്റ് എന്റര്‍ടൈന്‍മെന്റ് സംവിധാനങ്ങളും ഹൈ-സ്പീഡ് ഡിജിറ്റല്‍ സേവനങ്ങളും ലഭ്യമാണ്.

2023-ല്‍ പബ്ലിക് ഇന്‍വെസ്റ്റ്മെന്റ് ഫണ്ട് സ്ഥാപിച്ച റിയാദ് എയറിന് 2025 ഏപ്രിലിലാണ് സിവില്‍ ഏവിയേഷന്‍ അതോറിറ്റിയില്‍ നിന്നും എയര്‍ ഓപ്പറേറ്റര്‍ സര്‍ട്ടിഫിക്കറ്റ് ലഭിച്ചത്. സൗദിയുടെ എണ്ണ ഇതര സമ്പദ്വ്യവസ്ഥയിലേക്ക് ഏകദേശം 20 ബില്യണ്‍ ഡോളര്‍ സംഭാവന നല്‍കാനും, രണ്ട് ലക്ഷത്തിലധികം തൊഴിലവസരങ്ങള്‍ സൃഷ്ടിക്കാനും റിയാദ് എയറിന് കഴിയുമെന്ന് അധികൃതര്‍ കണക്കുകൂട്ടുന്നു. പബ്ലിക് ഇന്‍വെസ്റ്റ്മെന്റ് ഫണ്ട് ഗവര്‍ണര്‍ യാസിര്‍ അല്‍-റുമയ്യാനാണ് കമ്പനിയുടെ ചെയര്‍മാന്‍.