കൊച്ചി: സിഎംആര്‍എല്‍-എക്സാലോജിക് കേസില്‍ വീണാ വിജയനെ കേന്ദ്ര അന്വേഷണ ഏജന്‍സിയായ ഇഡി ഉടന്‍ ചോദ്യം ചെയ്തേക്കും. കേസുമായി ബന്ധപ്പെട്ട നടപടികള്‍ ഇഡി വേഗത്തിലാക്കിയിട്ടുണ്ട്. വീണക്ക് ഉടന്‍ സമന്‍സ് നല്‍കുമെന്നാണ് വിവരം. കഴിഞ്ഞ ദിവസം ഇഡി ഡയറക്ടര്‍ രാഹുല്‍ നവീന്‍ കൊച്ചിയില്‍ നടത്തിയ യോഗത്തില്‍ കേസിലെ നടപടികള്‍ വേഗത്തിലാക്കാന്‍ ഉദ്യോഗസ്ഥര്‍ക്ക് നിര്‍ദേശം നല്‍കിയിരുന്നു. ഹൈക്കോടതി ഡിവിഷന്‍ ബെഞ്ചിന്റെ പച്ചക്കൊടി ലഭിച്ച സാഹചര്യത്തിലായിരുന്നു നിര്‍ദേശം.

അടുത്തിടെ നടത്തിയ റെയ്ഡിനു പിന്നാലെ മരവിപ്പിച്ച 242 അക്കൗണ്ടുകളിലെ 18.36 കോടി രൂപ കണ്ടുകെട്ടാനുള്ള നടപടികളിലേക്കും ഇഡി കടന്നിട്ടുണ്ട്. മരവിപ്പിച്ച അക്കൗണ്ടുകളിലൊന്ന് വീണയുടേതാണ്. എച്ച്ഡിഎഫ്‌സി ബാങ്കിലെ അക്കൗണ്ടിലെ പണം ഉള്‍പ്പെടെ ഇഡി കണ്ടുകെട്ടിയേക്കും. ഇതിനായി വരുംദിവസങ്ങളില്‍ അഡ്ജൂഡിക്കേറ്റിങ് അതോറിറ്റിക്ക് ഔദ്യോഗിക റിപ്പോര്‍ട്ട് നല്‍കാനുള്ള ഒരുക്കത്തിലാണ് ഇഡി.

ചോദ്യം ചെയ്യുന്നതിന് മുന്നോടിയായി വീണയുടെ ബാങ്ക് ലോക്കര്‍ പരിശോധിക്കാനും ഇഡി ആലോചിക്കുന്നുണ്ട്. ഇതിന് ശേഷം വീണക്ക് ചോദ്യംചെയ്യലിനായി സമന്‍സ് നല്‍കും. റെയ്ഡുകളിലൂടെ പിടിച്ചെടുത്ത ഇലക്ട്രോണിക് ഉപകരണങ്ങളും ബാങ്ക് രേഖകളും നിലവില്‍ ഉദ്യോഗസ്ഥരുടെ വിശദമായ പരിശോധനയിലാണ്. സിഎംആര്‍എല്‍ സുപ്രീം കോടതിയെ സമീപിക്കാന്‍ സാധ്യതയുള്ളതിനാല്‍ കൃത്യമായ തെളിവുകളോടെ പഴുതടച്ച അന്വേഷണമാണ് ഇഡി നടത്തുന്നത്.

സി.എം.ആര്‍.എല്‍. കമ്പനി വീണാ വിജയന്റെ ഉടമസ്ഥതയിലുള്ള എക്സാലോജിക് സൊലൂഷന്‍സ് എന്ന കമ്പനിക്ക് ഇല്ലാത്ത സേവനത്തിന് പ്രതിഫലം നല്‍കിയെന്നതാണ് കേസ്.