അഗത്തി: ലക്ഷദ്വീപ് അഡ്മിനിസ്‌ട്രേഷന്റെ ജനവിരുദ്ധ നയങ്ങള്‍ക്കും ഏകപക്ഷീയമായ തീരുമാനങ്ങള്‍ക്കുമെതിരെ അഗത്തിയില്‍ കോണ്‍ഗ്രസ് പ്രവര്‍ത്തകരുടെ നേതൃത്വത്തില്‍ വന്‍ പ്രതിഷേധം. 48 മണിക്കൂര്‍ മുമ്പ് അനുമതി തേടിയിട്ടും ജനാധിപത്യപരമായ സമരം നടത്താന്‍ അധികൃതര്‍ അനുവാദം നല്‍കിയില്ല. ഇതേത്തുടര്‍ന്ന്, മുഹമ്മദ് ഹംദുള്ള സഈദ് എം.പിയുടെ നേതൃത്വത്തില്‍ പ്രവര്‍ത്തകര്‍ നിരോധനാജ്ഞ മറികടന്ന് പ്രതിഷേധ മാര്‍ച്ച് നടത്തി. ഡെപ്യൂട്ടി കളക്ടര്‍ ഓഫീസിലേക്ക് നടത്തിയ മാര്‍ച്ചില്‍ പോലീസും പ്രവര്‍ത്തകരും തമ്മില്‍ ഉന്തും തള്ളുമുണ്ടാവുകയും, ലാത്തിചാര്‍ജില്‍ മൂന്ന് കോണ്‍ഗ്രസ് പ്രവര്‍ത്തകര്‍ക്ക് പരിക്കേല്‍ക്കുകയും ചെയ്തു.
ലക്ഷദ്വീപിലെ ജനജീവിതം ദുസ്സഹമാക്കുന്ന അഡ്മിനിസ്‌ട്രേഷന്റെ നടപടികള്‍ക്കെതിരെ പാര്‍ലമെന്റിന് അകത്തും പുറത്തും ശക്തമായ പ്രതിഷേധം തുടരുമെന്ന് മുഹമ്മദ് ഹംദുള്ള സഈദ് എംപി വ്യക്തമാക്കി. കഴിഞ്ഞ പത്ത് വര്‍ഷമായി തുടരുന്ന ജനവിരുദ്ധ നടപടികളുടെ ഭാഗമായി, കൃഷിഭൂമിയിലെ തെങ്ങുകള്‍ വെട്ടിമാറ്റുമ്പോള്‍ അര്‍ഹമായ നഷ്ടപരിഹാരം പോലും നല്‍കാതെ ജനങ്ങളെ കുടിയൊഴിപ്പിക്കുകയാണെന്നും അദ്ദേഹം ആരോപിച്ചു.
കൂടാതെ, യാതൊരു മുന്നറിയിപ്പുമില്ലാതെ നിരവധി പേരെയാണ് ജോലിയില്‍ നിന്ന് പിരിച്ചുവിട്ടിരിക്കുന്നത്. കോടതി ഉത്തരവുകളെപ്പോലും അട്ടിമറിച്ചുകൊണ്ട് അഡ്മിനിസ്‌ട്രേഷന്‍ നടത്തുന്ന ഇത്തരം ധാര്‍ഷ്ട്യപരമായ പ്രവര്‍ത്തനങ്ങള്‍ക്കെതിരെ ശക്തമായ പ്രക്ഷോഭം തുടരുമെന്ന് കോണ്‍ഗ്രസ് പ്രവര്‍ത്തകര്‍ മുന്നറിയിപ്പ് നല്‍കി. ജനങ്ങളുടെ അവകാശങ്ങള്‍ ഹനിക്കുന്ന അഡ്മിനിസ്‌ട്രേഷന്റെ ഭരണപരിഷ്‌കാരങ്ങള്‍ ഉടനടി നിര്‍ത്തിവെക്കണമെന്ന് പ്രതിഷേധക്കാര്‍ ഒന്നടങ്കം ആവശ്യപ്പെട്ടു.
.jpg)
Related News
