റിയാദ്: പ്രമുഖ സൗദി ഫുട്‌ബോള്‍ ക്ലബ്ബായ 'അല്‍ ഹിലാലി'ന്റെ നീല ജേഴ്സിയണിയാന്‍ യോഗ്യത നേടിയ മലയാളി മിടുക്കി കീര്‍ത്തജയ്ക്ക് റിയാദ് ടാക്കീസ് അനുമോദന സദസ്സ് സംഘടിപ്പിച്ചു. അല്‍ ഹിലാലിന്റെ അണ്ടര്‍-15 വനിതാ ടീമിലേക്ക് തിരഞ്ഞെടുക്കപ്പെട്ട കീര്‍ത്തജ, റിയാദ് ഇന്ത്യന്‍ സമൂഹത്തിന്റെയും പ്രവാസി മലയാളികളുടെയും അഭിമാനമായി മാറിയിരിക്കുകയാണ്. ഇടുക്കി കട്ടപ്പന സ്വദേശിനിയും റിയാദ് ഇന്റര്‍നാഷണല്‍ ഇന്ത്യന്‍ സ്‌കൂളിലെ എട്ടാം ക്ലാസ് വിദ്യാര്‍ത്ഥിനിയുമാണ് ഈ മിടുക്കി. കീര്‍ത്തജയെ കായികരംഗത്ത് ഉയരങ്ങളിലേക്ക് നയിച്ച പരിശീലകരെയും രക്ഷിതാക്കളെയും ചടങ്ങില്‍ സംസാരിച്ചവര്‍ അഭിനന്ദിച്ചു.
റിയാദ് ടാക്കീസ് രക്ഷാധികാരി അലി ആലുവ, പ്രസിഡന്റ് റിജോഷ് കടലുണ്ടി എന്നിവര്‍ ചേര്‍ന്ന് കീര്‍ത്തജയെ പൊന്നാട അണിയിച്ച് ആദരിച്ചു. സെക്രട്ടറി അനസ് വള്ളിക്കുന്ന്, ട്രഷറര്‍ സോണി ജോസഫ് എന്നിവര്‍ ഉപഹാരം സമ്മാനിച്ചു.
വൈസ് പ്രസിഡന്റ് ഹരി കായംകുളം, കോര്‍ഡിനേറ്റര്‍ ഷൈജു പച്ച, ഷമീര്‍ കല്ലിങ്കല്‍, സജീര്‍ സമദ്, അന്‍വര്‍ യൂനസ് ഇടുക്കി, ഉമറലി അക്ബര്‍, ഹുസൈന്‍ സാപ്പി, അബ്ദുല്‍ റഹ്‌മാന്‍, ജോസ് മാസ്റ്റര്‍, ജോമി ചെങ്ങന്നൂര്‍ എന്നിവരും, റിയാദ് ഇന്ത്യന്‍ ഇന്റര്‍നാഷണല്‍ സ്‌കൂള്‍ സ്‌പോര്‍ട്‌സ് പരിശീലകനും യൂത്ത് സോക്കര്‍ അക്കാദമി അമരക്കാരനും മുന്‍ അന്താരാഷ്ട്ര കളിക്കാരനുമായ ഷഫീഖ് ഇസ്മായിലും ചടങ്ങില്‍ ആശംസകള്‍ നേര്‍ന്നു.
അനുമോദന സദസ്സിന് കീര്‍ത്തജയും പിതാവ് വിനോദും അമ്മ സുമിതയും സഹോദരന്‍ കാര്‍ത്തിക്കും നന്ദി രേഖപ്പെടുത്തി.
.jpg)
Related News
